¹ जहेमारे मिर भैया, मए तुमके माया करत हौ, और तुमर चहाना करत हौ, तुम मिर् आनन्द और मुकुट हौ । मिर् प्रिय, अइसी प्रभुमे स्थिर रहौ । ² मए इयोदिया और सुन्तुखे के प्रभुमे एक मनको होमए कहिके आग्रहपुर्वक बिन्ती करत हौ । ³ विश्‍वासी सहकर्मी, मए तुमके फिर अनुरोध करत हौ, कि जे बैयरनके मदत करओ, काहेकी जे संगएसंग सुसमाचारको काममे क्लेमेससंग और मिर और बाँकी सहकर्मीनके संग परिश्रम करी हँए, जौनक् नाउँ जीवनको पुस्तकमे हए । ⁴ प्रभुमे रोज आनन्द करओ मए फिर कहात हौ, आनन्द करओ| ⁵ तुमर सहनशीलता सब आदमीके पता होबए| प्रभु ढिंगै हए| ⁶ कोइ बात मे चिन्तित मत होबओ, पर सब बातमे प्रार्थना और निवेदनसे धन्यवाद सहित तुमर बिन्ती जाहेर होबए, ⁷ और समझ भ्यान नाए सिकनबालो परमेश्वरको शान्ति तुमर हृदय और तुमर मनके येशूमे रक्षा करैगो| ⁸ अन्तिममे भैया हो, जौन् बात सत्य हए, जौन् बात आदरणीय हए, जौन् बात न्यायसङ्गत हए, जौन् बात शुध्द हए, जौन् बात प्रेम-योग्य हए, जौन बात कृपामय हए, अगर कोइ श्रेष्ठता, प्रसंशाको योग्य कोइ हए कहेसे जे बातके विचार करओ| ⁹ तुम जौन बात मोसे सिखे, और ग्रहण करे और सुने और मोके देखे, बहे करओ, और शान्तिको परमेश्वर तुमरसंग होबैगो| ¹⁰ मए प्रभुमे गजब आनन्दित हौ, कि अब गजब दिनपिच्छु मोए प्रति तुमर वास्ता फिर पलाए गओ हए| तुम नेहत्व मिर ताहिँ चिन्तित रहओ, पर तुमके मौका नाए मिलो| ¹¹ जरुरि पाडो कहिके मए गुनासो नएकरो हौ, काहेकी जैसो परिस्थिति होएसे फिर मए बोमे सन्तुष्ट रहान मए सिखो हौ| ¹² कैसे झुकन और कैसे बढन् मए जान्त हौ| परिपूर्णतामे होए या भूकप्यासमे होए, प्रश्स्तमे होए या अभाबमे होए, सब परिस्थितिमे सन्तुष्ट रहन रहस्य मए सिखो हौ| ¹³ जुन मोके शक्ति देतहए, बोमे मए सब बात करन् सिकत हौ| ¹⁴ ताहुँ फिर मिर कष्टमे तुम सहभागी भए, जा असल करे| ¹⁵ तुम् फिलिप्पी अपने फिर जान्त हौ, कि सुसमाचारके सुरुमे मए माकेडोनियासे बिदा होत, देन और लेन काममे, तुमर बाहेक कोइ मण्डलीको सहाभागी मिर् संग नाए भव रहए, ¹⁶ काहेकी थेसलोनेकेमे फिर तुम मोके एक पटकसे जद्धि मिर ताहिँ सहयोग पठाए| ¹⁷ मए भेटी नाए ढुंडो हौ, पर मए त तुमरमे अइसो फलको आशा कर्त हौ, जो तुम्री हिसाबमे जम्मा होतजाए| ¹⁸ मए पानसे जद्धा पाओ हौ| इपाफ्रोडीटसे पठाओ गव तुमर मिठो बास्ना भव, और परमेश्वरके मनपडन् बालो और ग्रहणयोग्य बलिदान पाएके मए तृप्त भव हौ| ¹⁹ मिर परमेश्वर अपन महिमामे बोको सम्पति अनुसार तुमर सब खाँचो ख्रीष्ट येशूमे पूरा करदेबैगो| ²⁰ अब हमर परमेश्वर और पिताके सदासर्वादा महिमा होबए| आमेन | ²¹ ख्रीष्ट येशूमे सब सन्तके अभिवादन देबओ| मिर संग होनबारे भैया तुमके अभिवादन पठाई हँए| ²² सब सन्त और खास करके कैसरके घरानाके तुमके अभिवादन पठइँ हँए| ²³ पभु येशू ख्रीष्टको अनुग्रह तुमर आत्मा संग होबए|