¹ Jehova wakaambula kuli Mozesi: ² ''Ambuula kubantu ba Izilayeli. alimwi waambe kuli mbabo, 'Aaya ngemapobwe akasalwa kuli Jehova, ngimweelede kwaamba mbuli mbungano zisalala; ngimapobwe aangu aazibikene. ³ Mulakonzya kubeleka mazuba ali musanu alimwi, pesi zuba lyamusanu aabili ndizuba lya Sabata lyakulyookezya, imbungano isalala. Tamweelede kubeleka pe akaambo kakuti ni Sabata ya Jehova mumasena woonse ngimukkala. ⁴ Aaya ngemapobwe asalidwe aJehova, imbungano zisalala nzimweelede kwaambilizya aachiindi cheelede: ⁵ Mumweezi mutanzi, mubuzuba bwa kkumi aane bwamweezi kulundindiwana, ni Pasika ya Jehova. ⁶ Mubuzuba bwakkumi amusanu bwamweezi nguwooyo ndi Pobwe lya Zibunge zitakwe busweezyo kuli Jehova. Kwamazuba ali musanu aabili muleelede kulya zibunge zitakwe bumena. ⁷ Zuba tanzi muleelede kutantamuka akuyoolibungania aantomwe; tamweelede kuchita milimu pe izibinkene. ⁸ Muleelede kutondeezya chipayizyo chazyakulya kuli Jehova kwamazuba ali musanu aabili. Zuba lya musanu aabili ndyakuswaanana libikidwe kumbali kuli Jehova, alimwi mubuzuba oobo tamweelede pe kuchita nikuba mulimu ulibuti ngomuzibide.''' ⁹ Jehova wakaambula kuli Mozesi, wati, ¹⁰ ''Ambuula kubantu ba Izilayeli alimwi utedi kulimbabo, ''Nimwayosika kunyika njesikamupe, alimwi mwayotebula, mpawo muleelede kweeta inkama yamichelo yakusanguna yazilyo kumupayizi. ¹¹ Uyoonyampula inkama yazilyo kunembo lya Jehova alimwi akiipe kuli nguwe, kuti ikakonzye kutambulika muchiimo chako. Muubuzuba kwiinda Sabata aawo mupayizi mpayoyinyampula akutondezya kulindime. ¹² Mubuzuba noyonyampula nkama yazilyo akwiitondezya kulindime, uleelede kupa mbelele n'enze ili amunyaka womwe wakuzyalwa alimwi itakwe kampenda mbuli chipayizyo chakutentwa kuli Jehova. ¹³ Chipayizyo chazilyo cheelede kuba tubili mukkumi muzisuwo zyafulawa nante iiswanizigilwe amafuta, chipayizyo chichitwa amulilo kuli Jehova, kuti chiigwisye bweema bununkilila, alimwi aantomwe azyakunywa zyachipayilo zya wayini, atunemulini. ¹⁴ Tamweelede kulya zibunge pe, nikuba zilyo zisanzidwe nikuba zitete, mane do mubuzuba mbubo mbumuyooyeta eechi chipayizyo kuli Leza wanu. Eechi chiyooba mulawu uukkalilide lyoonse kwiinda mumazyalane abantu, munyika zyoonse nzimukkkala. ¹⁵ Kutalikila kubuzuba butanzi liyamana Sabata - eelyo lyakalizuba nimweeta inkama yachakulya mbuli chipayizyo chakuvukuuzya - mubale mviki zizwide zili musanu azibili. ¹⁶ Mweelede kubala mazuba ali makkumi alimusanu, liyokonzya kuba zuba kakutanasika buzuba bwa Sabata. Mpawo muleelede kutondezya chipo chazilyo zipya kuli Jehova. ¹⁷ Muleelede kweeta zibunge kuzwa mumaanda zyobile zichitidwe kuzwa kuzibili mukkumi yachisuwo. Zyeelede kazichitidwe abusu bunante bwafulawa alimwi kaziyokedwe aantomwe abusweezyo; ziyooba chipayizyo chakuvukuuzya zyamichelo yakusanguna kuli Jehova. ¹⁸ Muleelede kweeta aantomwe azibunge bana bembelele zili musanu azibili zili amunyaka womwe wakuzyalwa alimwi kabatakwe tumpenda, womwe mupule muniini, alimwi bagutu bobile. Beelede kuba chipayizyo chakutentwa kuli Jehova, aantomwe achipayizyo chazilyo alimwi azipayizyo zyakunywa. chipayizyo chichitidwe amulilo alimwi chigwisya bweema bununkilila kuli Jehova. ¹⁹ Weelede kupa omwe pule wampongo chibe chipayizyo chazibi, mbuli chipayizyo chabulyidilano. ²⁰ Mupayizi weelede kuzivukuuzya aantomwe achibunge amichelo mitanzi kunembo lya Jehova, akuzitola kulinguwe mbuli chipo kulinguwe aantomwe ambelele zyobile. Chiyoba chipayizyo chisalala kuli Jehova kubapayizi. ²¹ Mweelede kuchita loompololo muzuba ndilyonya. Kuyooba imbungano iisalala, alimwi tamweelede kuchita milimu izibinkene. Ooyu uyooba mulawu uutakakkalilile kwalyoonse kubantu akumazyalane munyika zyoonse ooko nkumukkala. ²² Nimwayotebula munyika yanu, tamweelede kutebula chakumaninsya muzyooko zyamumunda, alimwi tamweelede kuvulula pe mukutebula kwanu. Mweelede kuzisiila bachete a beenzu. Ndime Jehova Leza wanu.''' ²³ Jehova wakaambula kuli Mozesi, wati, ²⁴ ''Ambuula kubantu ba Izilayeli alimwi utedi, 'Mumweezi wamusanu ayibili, izuba tanzi lyamweezi ooyo ndizuba lyakulyookezya lyenu, chichitiko chitanooli akulizya myeembo, alimwi embungano isalala. ²⁵ Tamweelede kuchita milimu pe njimuzibide, alimwi muleelede kupa chipayizyo chichitidwe amulilo kuli Jehova.''' ²⁶ Mpawo Jehova wakaambula a Mozesi, kuti, ²⁷ ''Lino zuba lyakkumi lyayoyu mweezi wqmusanu ayibili ndizuba lyakubwedulana. Lyeelede kuba mbungano iisalala, eelyo mweelede kulibombya lwenu beni alimwi akweeta kuli Jehova chipoayizyo chamulilo. ²⁸ Tamweelede kuchita mulimu mubuzuba oobo nkaambo mbuzuba bwakubwedulana, kuchita kubwedulana kwenu kunembo lya Jehova Leza wenu. ²⁹ Kufumbwa ooyo utalibombyi mubuzuba oobo weelede kutandwa kuzwa kubantu bakulimbabo. ³⁰ Kufumbwa ooyo uuchita umwi mulimu mubuzuba oobo, ime, Jehova, ndiyomunyonyoona kuzwa aakati kabantu bakuli mbabo. ³¹ Tamweelede pe kuchita mulimu niwuba ulibuti muzuba eelyo. Eechi chiyooba mulawu walyoonse kwiindila kumazyalane abantu bako mumasena mumukkala. ³² Eeli zuba liyooba kulindinywe i Sabata lyakulyookezya kwanchoozyo, alimwi mweelede kulibombya nobeni mubuzuba bwamusanu aane bwamweezi igoko. Kuzwa goko kuyosika goko muleelede kubamba Sabata yenu.'' ³³ Jehova wakaambula kuli Mozesi, wakati, ³⁴ ''Ambuula kubantu ba Izilayeli, kuti, 'Muzuba lyakkumi amusanu zuba lyamweezi liyooba Pobwe lya Ziyako kuli Jehova. Liyootola mazuba ali musanu aabili. ³⁵ Muzuba tanzi kweelede kuba mbungano isalala. Tamweelede kuchita milimu njimuzibide pe. ³⁶ Kwamazuba ali musanu aabili mweelede kupa chipayizyo chichitidwe amulilo kuli Jehova. Kuzuba lyamusanu aatatu kweelede kuba mbungano iisalala, akuchita chipayizyo chichitidwe amulilo kuli Jehova. Eeyi nimbungano yakusungwaala, alimwi tamweelede kubeleka pe milimu njimuzibide. ³⁷ Aya mapobwe aasalidwe kuli Jehova, aayo ngimweelede kwamba mbuli mbungano zisalala kukupa chipayizyo amulilo kuli Jehova, chipayizyo chakutentwa alimwi chipayizyo chazilyo, zituzyo azipayizyo zyakunywa, chimwi achimwi kuziba lyacho. ³⁸ Ayaa mapobwe anoli akuyungizya kuma Sabata a Jehova azipo zyenu, zyoonse zikonke zyenu, azipo zyanu nzimupa kukuyanda kwanu kuli Jehova. ³⁹ Zilangene aatala aPobwe lya Ziyako, mubuzuba bwakkumi amusanu bwamweezi wamusanu ayibili, nimwanoobungika michelo yamunyika, mweelede kubamba pobwe eeli lya Jehova mazuba ali musanu aabili. Zuba tanzi linoli lyakulyookezya, azuba lyamusanu aatatu alyalo lilaba lyakulyookezya kubotu. ⁴⁰ Muzuba tanzi mweelede kubweza michelo mibotu kuzwa kumisamu, mitabi yamupalumu, alimwi ntabi zili amatu zyamisamu iivwevwene, alimwi misamu yamutulonga, alimwi muyoobotelwa kunembo lya Jehova Leza wako kwamazuba ali musanu aabili. ⁴¹ Kwamazuba ali musanu aabili umwi awumwi munyaka mweelede kusekelela pobwe eeli lya Jehova. Eechi chiyoba mulawu ukkalila lyoonse kwiindila kumazyalane abantu bako mumasena woonse ooko nkomukkala. Mweelede kusekelela pobwe eeli mumweezi wamusanu ayibili. ⁴² Mulelede kukkala mutudumba tunini kwamazuba alimusanu aabili.Boonse bazyalilidwe mu Isilayeli belede kukkala mutudumba tunini kwamazuba ali musanu aabili, ⁴³ aboobo kuti luzubo azyalani azyalani,balayiya mbuli mbundakachita bantu baIsilayeli kuti bakkale mumadumba nindakabagwisya munyika yaIjipiti.Ndime Jehova Leza wanu.'' ⁴⁴ Muliyeyi nzila,Mozesi wakambilizya kubantu baIsilayeli mapobwe awambidwe aJehova.