¹ Jehova wakambuula a Mozesi, wakati, ² "Ambula a Aloni abana bakwe balombe, baambile kuti basosoloke kuzintu zisalala zyabantu baku Isilayeli, eezyo nzibakabambila kuli ndime. Tabelede kuubawusya zina lyangu lisala. Ndime Jehova. ³ Ubaambile kuti, 'Kuti umwi walunyungu lyako mubuzyalane boonse wasika kuzintu zisalala eezyo bantu ba Isilayeli nzibabambila Jehova, aawo nasofweede, ooyo muntu welede kugwisigwa kunembo lyangu: Ndime Jehova. ⁴ Takwe mulunyungu lwa Aloni uli abulwazi bwachikumba butabukila, naa kuti chilwazi chisensa kuzwa mumubili wakwe, uukonzya kulya chimwi chazipayizyo zyachitilwa Jehova ado asalale. Kufumbwa uujata kufumbwa chintu chisofweede kwindila mukugumana abafwide, naa kuti mukugumana amwaalumi usensa igoni, ⁵ naa kuti kufumbwa uuguma kufumbwa chinyama chiyavula eecho chimupa kusofwaala, naa kufumbwa musyobo wabusofwaazi bunooliwo - ⁶ mpawo mupayizi utakagume kufumbwa chisofweede uyosofwaala mane golezya. Tayelede kulya kufumbwa chazintu zisalala, ado kuti asambe mubili wakwe mumaanzi. ⁷ Aawo izuba nilyabbila, unooli wasalala. Musule akubbila kwazuba ukonzya kulya kufumbwa kuzintu zisalala, nkambo nzyakulya kwakwe. ⁸ Tayelede kulya kufumbwa chintu chajanika kachifwide naa kuti chajayigwa amunyama wamulusaka, eezyo nzyakonzya kulisofwaazya anzizyo. Ndime Jehova. ⁹ Mupayizi welede kutobelela malayile aangu, kuti pe balaba basimulandu wachibi alimwi bakonzya kufwa akaambo kakundinyansya. Ndime Jehova ubachita kuti basalale. ¹⁰ Takwe muntu aanze ampuli yamupayizi, kuswanizya beenzu bamupayizi na kuti babelesi mbawulide, ibakonzya kulya kufumbwa chintu chisalala. ¹¹ Pesi kuti mupayizi wawula kufumbwa muzike a mali yakwe, ooyo muzike ukonzya kulya kuzintu zyabambilidwe Jehova. Bampuli yamupayizi abazike bazyedwe mung'anda yakwe, abalabo balakonzya kulya anguwe kuli eezyo zintu. ¹² Kuti mwana musimbi wamupayizi kakwetwe awumwi muntu utali mupayizi, takonzyi pe kulya chimwi chamwaabo wazipo zisalala. ¹³ Pesi kuti mwana musimbi wamupyizi ngu muka mufu, kuti wakalekwa, alimwi kuti takwe mwana, akuti wakabweeda kukukkala kung'anda yawisi mbuli mubusimbi bwakwe, ukonzya kulya chakulya chawisi. Pesi takwe muntu utali wamumpuli yamupayizi ukonzya kulya chakulya chamupayizi. ¹⁴ Kuti muntu walya chakulya chisalala katazizi, aawo weelede kuchibbadalila kumupayizi; welede kuyungizya kamwi kumusanu wacho alimwi achibweedezye kumupayizi. ¹⁵ Bantu baku Isilayeli tabelede kunyasya zintu zisalala eezyo nzibakanyampula mujulu akupedekezya kuli Jehova, ¹⁶ akulichita kuti babweze chibi eecho chiyoobapa kulibeteka mukulya chilyo chisalala, nkaambo ndime Jehova uubachita kuti basalale." ¹⁷ Jehova wakaambuula kuli Mozesi, wakati, ¹⁸ "Ambuula a Aloni abana bakwe balombe, akubantu boonse ba Isilayeli ubaambile kuti, 'Kufumbwa muna Isilayeli nkana kuti muna sinabbanga ukkala muIsilayeli, aawo nibapedekezya zipayilo - na nchakuzuzikizya chizuminano, na kuti chipo chakuliyandila, kana bapedekezya Jehova chipayizyo chakutenta, ¹⁹ kuti kachelede kutambulika, beelede kupedekezya munyama uutakwe kampenda kuzwa kung'ombe, mbelele, na impongo. ²⁰ Pesi toyelede kupa kufumbwa chili aakampenda. Nsikoyochitambula pe kachiimina nduwe. ²¹ Kufumbwa uupa chipayizyo chazipo zyakubungana kuzwa kutanga na kulutanga kuya kuli Jehova kukuzuzikizya chizuminano, na kuti mbuli chipo chakuliyandila, tacheelede kuba akampenda kakutatambulika. Takwelede pe kuba abulima mumunyama. ²² Toyelede pe kupa munyama uutakuboni, mulima, kana uutyokede, na kuti uli aabukoto, zilonda kana kuti bweele. Toyelede pe kupa zili boobu kuliJehova mbuli chipayizyo chamulilo aachipayililo. ²³ Ukonzya kupedekezya mbuli chipo chakuliyandila musune kana mbelele eeyo yachiimo chinyongene naa kaniini, pesi chipo chili boobo tachikoyotambulika pe kuchizuminano. ²⁴ Utapi kufumbwa munyama ukubukide, upwayidwe, udelukide na kuti uzibidwe kuli Jehova. Utachiti boobo mukati kanyika yako. ²⁵ Utapedekezyi chibunge chaLeza wako kuzwa kukuboko kwamuzwakule. Aabo banyama banyongene alimwi bali abulima muli mbabo, tabakoyootambulika pe kuchiimo chako." ²⁶ Jehova wakambula kuli Mozesi akwamba kuti, ²⁷ "Chiindi mwana wang'ombe na kuti mbelele na kuti mpongo wazyalwa, welede kukkalilila abanyina kwamazuba musanu aabili. Mpawo kuzwa mubuzu bwamusanu amazuba otatwe kaziya kunembo, ukonzya kutambulika mbuli chipayizyo kuchipo chichitwa amulilo kuliJehova. ²⁸ Utajayi ng'ombe nzyazi na kuti mbelele aantomwe amwana wayo, zyobile mubuzuba boomwe. ²⁹ Aawo nowaba chipo chakulumba kuli Jehova, welede kuchaaba munzila iitambulika. ³⁰ Yeelede kulyigwa mubuzuba bomwe oobo mbuchaabwa. Toyelede kusiya kampanzi kayo kuti kabuchesye. Ndime Jehova. ³¹ Nkinkaako welede kubamba milawu yangu akuyitobelezya. Ndime Jehova. ³² Toyelede kusofwaazya zina lyangu lisalala. Ndeelede kuzibinkana mbuli musalali abantu baku Isilayeli. Ndime Jehova uukuchita kuti usalale, ³³ ooyo wakamweeta aanze aanyika ya Ijipiti kuti ndibe Leza wanu: Ndime Jehova.