¹ Yahuwe wakambula kuli Mozesi alimwi akuli Aaloni, kati, ² ''Wambula kubantu ba Izilayeli, utedi, 'Ezi nzezintu zipona nzimukonzya kulya akati kabanyama boonse balimunyika. ³ Mulakonzya kulya kufumbwa munyama ulensumba zyanzene alimwi kaselula. ⁴ Nekubabobo bamwi babanyama tabaseluli nikuba kabalensumba zyanzeene, alimwi tamwelede pe kubalya banyama bali mbuli nkamela nkambo ilaselula pesi tikwe nsumba zyandeene pe. Aboobo nkamela ilisofwede kulindinywe. ⁵ Alakwe chibila, nkambo ulaselula pesi takwe nsumba zyanzene, alakwe ulisofwede kulindinywe. ⁶ Akalako kasulwe, nkambo kalaselula pesi takakwe insumba zyanzeene, kalisofwede kulindinywe. ⁷ Ngulube nikuba ilansumba zyanzeene, tayiseluli, ilisofwede kulindinywe. ⁸ Tamwelede kulya kufumbwa nyama zyazyo, nikuba kuguma mituunta yazyo. Zilisofwede kulindinywe. ⁹ Banyama bakkala mumaanzi mbimukonzya kulya mbabo boonse balatuyambyo amakwa, nanka mulwizi nikuba mumilongo. ¹⁰ Pesi zyonse zilengwa zipona zitakwe tuyambilo amakwa mulwizi nanka mumilonga, kujatikizya zyoonse zyeenda mumaanzi alimwi azilengwa zipona zyoonse zili mumaanzi - zyeelede kumusesemya. ¹¹ Mbukunga zilamusesemya, tamwelede kulya nyama zyezyo; aboobo mitunta yazyo iyelede kumusesemya. ¹² Kufumbwa chikkala mumanzi alimwi kachitakwe tuyambyo amakwa chilasesemya kulindinywe. ¹³ Kubayuni tuyuni twelede kumusesemya alimwi ntomutelede kulya nkambo tulasesemya ntootu: chuungwe, ¹⁴ ikkubi alimwi a syatongo, biimbe, kufumbwa musyobo wabalubanze, ¹⁵ misyobo yoonse yabachikwangwala, ¹⁶ tumba alimwi achipolo, kadoondwe alimwi kufumbwa musyobo wamagumbe. ¹⁷ Mwelede kusesemwa alakwe sikabandwa, insika alimwi a siyaswimuumba, ¹⁸ syapililyo alimwi a sikusiku aba moomba, ¹⁹ tongola, kufumbwa amusyobo wankolekole, ing'angayabayuni, alimwi aka mpembelezya akalako. ²⁰ Toonse tuuka tulamababa twenda amawulu aane tulasesemya kulindinywe. ²¹ Mulakonzya kulya kufumbwa musyobo watuuka tuuluka oto lubo tweenda amawulu aane kupela na katujisi mawulu alempingu zyakusotoka anyika. ²² Mulakonzya kulya kufumbwa musyobo wansozi, nswabanda, ediingo nanka chamusokonia. ²³ Pesi toonse tuuka tuluka tulandyasyo zyone twelede kusesemya kulindinywe. ²⁴ Mulasofwala kuyosika goko abanyama aba na mwaguma mutunta wabo. ²⁵ Nabaani ubweza umwi wamitunta yazyo uyeleede kwaacha zisamo zyakwe alimwi ulaba usofwede mane kuyosika goko. ²⁶ Munyama woonse ulensumba zyanzeene kazitaanzene bumaninide nanka utaseluli ulisofwede kulindinywe. ²⁷ Kufumbwa chintu cheenda abula bwacho akati kabanyama boonse ane balisofwede kulindinywe. Nabaani uuguma mutunta uliboobu ulasofwala mane likabe goko. ²⁸ Kufumbwa ubweza mutunta ulibobo uyelede kwaacha zisamo zyakwe alimwi uyelede kwacha zisamo alimwi ulasofwala mane kukabe goko. Aba banyama bayosofwala kulindinywe. ²⁹ Kubanyama bayavula aansi anyika, aba mbibanyama banosofwede kulindinywe: silukobo, imbeeba, misyobo yoonse yabasyadolyo bapati, ³⁰ ziliinde, kalindibwami, ikkwamala, ibbulu, alimwi achamuntambwe. ³¹ Kubanyama boonse bayavula, aba mbibanyama batondwa kulindinywe. Kufumbwa ubaguma nibafwide uyosofwala manelikabe goko. ³² Na umwi wabo wafwa alimwi wawida alichimwi chintu, echo chintu chilasofwala, nichiba chakalundwa achisamu, mulembo, chikkumba, nikuba amasaka. Kufumbwa chichibelesegwa chelede kubikwa mumanzi, chiyosofwala manelikabe goko. Mpawo chiyosalala. ³³ Nkambo konse ikalongo kabulongo omo na awo munyama usofwede mpawida, kufumbwa chilimumo mukalongo chilasofwaala, alimwi mulelede kupwachula kalongo aako. ³⁴ Kufumba chakulya chinga chilaligwa pesi kulimanzi azwa mukalongo aka chilisofwede. Kufumbwa chinywigwa chizwa mukalongo kalibobu chilisofwede. ³⁵ Kufumbwa chintu awo umwi wamitunta eyii mpawida chilasofwala, nakuti ibe woveni nichiba chitofu chinini, chelede chipocholwe tube tufwapula zilisofwede alimwi zyelede kukkala kazisofwede kulindinywe. ³⁶ Kasensa nakuti chikala chitekwa manzi chikkala kachisalede; pesi kufumbwani uguma mutunta ulisofwede. ³⁷ Nakuti kufumbwa chimpanzi chamutunta chawida kufumbwa embuto zyakubyala, eyimbuto inochisalala. ³⁸ Pesi kuti na manzi abikwa embuto, alimwi na chimwi chimpanzi chamutunta chawida alinjiyo, awo imbuto ilasofwala kulindinywe. ³⁹ Na umwi munyama ngomuzumizigwa kulya wafwa, awo oyo uguma mutunta wawo ulasofwala manedo kukabe goko. ⁴⁰ Kufumbwa ulya umwi wamitunta uyelede kuyowacha zisamo zyakwe alimwi ulasofwala mane likabe goko. Kufumbwa muntu ubweza mutunta uliboobu ulawacha zisamo zyakwe alimwi ulasofwala mane kukabe igoko. ⁴¹ Munyama woonse uyavula anyika ulasesemya, tayelede pe kulyigwa. ⁴² Kufumbwa chintu cheenda aabula, alimwi, kufumbwa chenda amawulu aane, na kufumbwa chintu chilamawulu miingi - boonse banyama bayavula enyika, aba tamwelede kubalya, nkambo balasesemya. ⁴³ Tamwelede kulisofwazya azilenge zipona ezyo ziyavula; tamwelede kulisofwazya anzizyo, kuti mukachitwe babi anzizyo. ⁴⁴ Nkambo ndime Yahuwe Leza wenu. Mulelede kulibamba musalale, abobo, alimwi ngamusalale, nkambo ndasalala. Tamwelede kulisofwazya nobeni amusyobo kufumbwa wamunyama uyenda enyika. ⁴⁵ Nkambo ndime Yahuwe, wakamugwisya munyika yaku Ijiputi, kuti nzobe Leza wenu. Aboobo mulelede kusalala, nkambo ndilasalala. ⁴⁶ Oyu mulawu ulazyakuchita abanyama, tuyuni, zyoonse zilenge zipona ezyo zyeenda mumaanzi, alimwi ezilengwa zyoonse ziyavula anyika, ⁴⁷ Kuti kube kusiyanisigwa akati kazisofweede azisalala, akati kazintu zipona zinga zilaligwa azintu zipona zinga tazikoligwa.''