¹ Unya kung ang Dios nagbanhaw kaninyo uban kang Cristo, pangitaa ang mga butang sa sa ibabaw, diin si Cristo nagalingkod sa tuong kamot sa Dios. ² Paghunahuna mahitungod sa mga butang sa ibabaw, dili mahitungod sa mga butang sa kalibotan. ³ Kay kamo namatay, ug ang inyong kinabuhi natago kang Cristo diha sa Dios. ⁴ Sa dihang si Cristo makita, nga mao ang inyong kinabuhi, unya kamo usab makita uban kaniya sa himaya. ⁵ Busa, patya ang mga bahin nga ania sa yuta—ang pakighilawas, kahugawan, kaibog, daotang tinguha, ug kahakog, nga mao ang pagsimba sa diosdios. ⁶ Kini mao ang mga butang nga ang kasuko sa Dios moabot sa mga anak sa pagkamasinupakon. ⁷ Kini mao ang mga butang nga kamo usab sa maka-usa naglakaw sa dihang nagpuyo kamo uban kanila. ⁸ Apan karon kinahanglan nga inyong wad-on kining tanang mga butanga—ang kapungot, ang kasuko, ang daotan nga tinguha, ang pagtamay, ug ang malaw-ay nga pagpamulong nga gikan sa inyong mga baba. ⁹ Ayaw kamo pamakak sa matag-usa, tungod kay gihukas na ninyo ang karaan nga pagkatawo uban sa iyang mga naandan. ¹⁰ Ug gisul-ob ninyo ang bag-o nga pagkatawo, nga gibag-o sa kahibalo sumala sa dagway niadtong usa nga nagbuhat kaniya. ¹¹ Dinhi diin walay Greyigo ug Judio, tinuli ug dili-tinuli, dumuduong, taga-Scita, ulipon, tawong may kagawasan, apan si Cristo mao ang tanan, ug anaa sa tanan. ¹² Busa, ingon nga mga pinili sa Dios, balaan ug hinigugma, isul-ob ang kasingkasing sa kaluoy, pagkamaayo, pagpaubos, kalumo, ug pagkamapailubon. ¹³ Pag-inantosay kamo sa usag-usa. Magmapuanguron sa usag usa. Kung adunay usa nga anaay sumbong batok sa uban, pagpasaylo sa paagi nga ang Ginoo nagpasaylo kaninyo. ¹⁴ Ug labaw niining mga butanga, pagbaton ug gugma, nga mao ang bugkos sa pagkahingpit. ¹⁵ Tugoti nga ang kalinaw ni Cristo modumala sa inyong mga kasingkasing. Alang niini nga kalinaw nga kamo gitawag diha sa usa ka lawas. Ug pagmapasalamaton. ¹⁶ Tugoti nga ang pulong ni Cristo mopuyo kaninyo sa kadato gayod. Uban sa tanang kaalam pagtinudloay ug pagtinambagay kamo sa usag-usa uban sa mga salmo ug mga himno ug sa mga espirituhanon nga mga alawiton. Pag-awit uban sa pagkamapasalamaton sa inyong mga kasingkasing ngadto sa Dios. ¹⁷ Ug bisan unsa ang inyong buhaton, sa pulong o sa buhat, buhata ang tanan sa ngalan ni Ginoong Jesus. Pasalamati ang Dios nga Amahan pinaagi kaniya. ¹⁸ Mga asawa, pagpasakop sa inyong mga bana, kay mao kini ang angay ninyong buhaton diha sa Ginoo. ¹⁹ Mga bana, higugmaa ang inyong mga asawa, ug ayaw ninyo sila pasakiti. ²⁰ Mga anak, tumana ang inyong mga ginikanan sa tanang butang, tungod kay kini makapahimuot sa Ginoo. ²¹ Mga amahan, ayaw pagsuk-a ang inyong mga anak, aron dili sila mawad-an sa kadasig. ²² Mga ulipon, tumana ninyo ang inyong mga agalon sumala sa unod sa tanang mga butang, dili pakitang tawo, sa ingon nga magpadayeg sa mga tawo, apan uban sa matinud-anon nga kasingkasing. Kahadloki ang Ginoo. ²³ Bisan unsa ang inyong pagabuhaton, buhata gikan sa kalag ingon nga alang sa Ginoo, ug dili alang sa mga tawo. ²⁴ Nasaayod kamo niana nga inyong madawat gikan sa Ginoo ang ganti sa panulundon. Ang Ginoong Cristo nga inyong gialagaran. ²⁵ Kay ang matag usa nga nagbuhat ug dili matarong makadawat ug silot alang sa dili matarong nga iyang gibuhat, ug walay gipalabi niini.