¹ Kay buot kong masayod kamo kung unsa kadako ang pagpakigbisog nga ania kanako alang kaninyo, alang niadtong anaa sa Laodicea, ug alang sa kadaghanan nga wala pa makakita sa akong nawong diha sa unod. ² Namuhat ako aron nga ang ilang mga kasingkasing madasig pinaagi sa panaghiusa diha sa gugma ug ngadto sa bug-os nga kadato sa hingpit nga pagsalig sa pagpasabot, ngadto sa kahibalo sa tinago nga kamatuoran sa Dios, mao kana, si Cristo. ³ Nga kaniya ang tanang mga bahandi sa kaalam ug kahibalo natago. ⁴ Ako kining isulti aron nga walay usa nga maglimbong kaninyo uban sa madanihon nga pagpamulong. ⁵ Bisan paman dili ako uban kaninyo diha sa unod, hinuon ako uban kaninyo diha sa espiritu. Malipayon ako nga nagtan-aw sa inyong maayong pagkahan-ay ug ang kalig-on sa inyong pagtuo kang Cristo. ⁶ Ingon nga inyong gidawat si Cristo nga Ginoo, paglakaw diha kaniya. ⁷ Magpagamot kamo diha kaniya, matukod kamo diha kaniya, magmalig-on kamo sa pagtoo ingon nga kamo gitudloan, ug magmadagayaon sa pagpasalamat. ⁸ Pagmatngon nga walay bisan kinsa nga makadakop kaninyo pinaagi sa pilosopiya ug walay pulos nga limbong, sumala sa tradisyon sa mga tawo, nga nahiuyon sa mga espiritu sa sinugdan sa kalibutan, ug wala mahiuyon kang Cristo. ⁹ Kay diha kaniya nagapuyo ang kinatibok-an sa Dios sa lawasnong porma. ¹⁰ Ug kamo napuno diha kaniya. Siya ang ulo sa matag gahom ug awtoridad. ¹¹ Diha kaniya kamo usab natuli uban sa usa ka pagtuli nga wala gihimo pinaagi sa mga tawo sa pagkuha sa lawasnong unod, apan diha sa pagkatinuli kang Cristo. ¹² Kamo gilubong uban kaniya diha sa pagbawtismo. Ug diha kaniya gibanhaw kamo pinaagi sa pagtuo diha sa gahom sa Dios, nga nagbanhaw kaniya gikan sa mga patay. ¹³ Sa dihang namatay kamo sa inyong mga kalapasan ug sa dili pagkatinuli sa inyong unod, siya naghimo kaninyo nga buhi uban kaniya ug nagpasaylo kanatong tanan sa atong mga kalapasan. ¹⁴ Iyang gipapas ang nahisulat sa natala nga mga utang ug ang mga regulasyon nga batok kanato. Gikuha niya kining tanan ug gilansang kini ngadto sa krus. ¹⁵ Iyang gidis-armahan ang mga gahum ug mga awtoridad ug gihimo silang usa ka talan-awon sa publiko, nga nagdaog batok kanila pinaagi sa krus. ¹⁶ Busa, ayaw tugoti nga adunay mohukom kaninyo sa pagkaon o sa pag-inom, o mahitungod sa adlaw sa kombira o sa usa ka bag-ong bulan, o mahitungod sa Adlaw nga Igpapahulay. ¹⁷ Kini usa ka anino sa mga butang nga umaabot, apan ang unod mao si Cristo. ¹⁸ Ayaw itugot nga si bisan kinsa nga gusto sa pagpaubos ug sa pagsimba sa mga anghel maghukom kaninyo gikan sa inyong ganti. Ang maong tawo mosulod sa mga butang nga iyang nakita ug magpaburot tungod sa iyang unodnong panghunahuna. ¹⁹ Siya wala magpabilin ngadto sa ulo. Gikan sa ulo nga ang tibuok lawas ug ang tanan nga mga lutahan ug sa mga kaugatan naghatag ug naggunit niini; kini motubo uban ang pagtubo nga gihatag sa Dios. ²⁰ Kung kamo namatay uban kang Cristo ngadto sa mga espiritu sa kalibotan, nganong nagkinabuhi man kamo ingon nga gikinahanglan gayod sa kalibotan: ²¹ "Ayaw pagkupot, ni motilaw, ni mohikap?" ²² Ang tanan niining mga butanga gitagana alang sa pagkadunot uban sa paggamit, sumala sa pahimangno ug mga pagtulon-an sa mga tawo. ²³ Kini nga mga lagda adunay kaalam sa hinimo sa kaugalingon nga relihiyon ug pagpaubos ug pagsakit sa lawas. Apan wala silay bili batok sa pagpatuyang sa unod.