¹ Fotini orande acnayempaci Banabasinuc Taitasinuc yivic manarec Jerusalemic yeveke ureuc. ² Sena urekunai, ayofaganim bayakaci, yenamac manar antekaran emam bayaya mapac iniya baintauc kimi sekunave. Seyakaci acnonic ugeyou namac secumpe, macnem indic ogobare seni sesic siyintac bayabam iyen iyayeci iyen iyayonte umpe. ³ Afo Taitusivage beni Krikim bemi senamac bani o akecyano bani erarukami eno. ⁴ Umac baintauc emami yefece soneno, yike unamac Kraisi Jisasinic ayin dukekuna. Yemi yiyikarac mevami ikeunamac manam fayan yokam baintaic irani, ⁵ afo yeunamac yen yirafim make iyen bego, macnem fugasigam mam baya iken namac banovare. ⁶ Afo iyeuyac acnonic ukau beyafo (yeni nec beyafo senkaci anon anecne baino, Kocti yempagic iyen intemino) - yenana acnoni ukauye sekunouni, senkaci mana anecne ba beyaone. ⁷ Ena asapaci, yeni sonaci yu iye akecyage youni mam bayakim dafic yinkage umpe, macnem Pita ma yu akecyage youna mam bayakim dafic yinkageninic urege. ⁸ Kocti beni Pita kinkaci yu akecyage yousimi yokemi, senkin kacbaci mapac iniya baintauc kimi yokemi. ⁹ Jems va Cifasi va Joniu, mam mac uvarana yonaic ugeyouni, onaic meno mini avacbac sen simikenimi, benkim munkir anda yey yiyan ugan namaci Banabasin de simeno. Mapac iniya baintauc kim bono vani mana uvareno, micnureni yeni yu akecyage yo bampaci binteno. ¹⁰ Andanda iye duke you yan nana indeno bani yeni indaeno, ma mini andanda ugan uvararan siyevane. ¹¹ Afo Cifasi Antiokic yeraci, ben ogan kaci secu, nevarafi beni iyen antegaci. ¹² Icnayemi manaca baintauc Jemsi bampate yeno fo, Cifasi mapac baintauc namaci nem bami. Afo ma mini bayintauc yeraomi, beni ecemi mapac iniya baintauc namac iyem bami. Yu akecyago ban seyou yigani fegemino. ¹³ Afo umacden Ju'uc ma kantan yivan dukeyo usimi agackano. Yenyic kantan yivan tinkena bayayuc manom Banabasim baci mandan yenamac minigin deno. ¹⁴ Afo sena yonekunai yenyic avucavac mano fugasiren mam baya sigenima iye avakuroci, umacden yen yugankaci Cifasinan secumpe, "Ena Ju bema mapac iniya baintauc kacna be Juc kege iye bei, inkenic ure erarina yaci mapatena iniya bainta Ju kege bante yafo?" ¹⁵ Mayauni mactin karaci Jium becumpe mapac iniya baintauc manda kim beyouyaono; ¹⁶ Yeunamac omaren indecu loic yokantac maya iyen anteckantemifo andun Jisas Kraisin kim munkuinam manai. Mayau yabac yunai Kraisin kin sindun munkuinaci anteckantecu Kraisin kin sindun munkurec manai loic yogaruc mano bai. Loic yogaruc mano mana bu iyen antekantemino. ¹⁷ Afo ikeunama Kraisin kin anteckara ir afakeci, ikeunamac baci, sonaman manda iniya baintaic ugecumpe, mini i Kraisi manda andac manam yanic enafi? Iyeukamino! ¹⁸ Afo sena mini anecneuc anankare gunauc yevekec uvareci, seyani manam yoyivigeci lo ukare baunom becu. ¹⁹ Mini'i lo kinke seni lo kimi fuckego, micnureci seni Koctin kim bantec umpe. ²⁰ Seni Kraisin namaci fuckeumpe. Seni ba bageguno ba begaune, Kraisin senkim bemino Mage mana bani mana bugim begunai Koctin Agac kimi sindun munkurec becumpe, iyefi senar ayiren beyar simiyine. ²¹ Seni Koctinic avacbac manar avafac iyen decumpe, logima anteckenin anda manar iyenac inami,afo Kraisinic fugini fayaric mintemino!