¹ Yaqmo Pol ya iyow Timoti inaq i giger Krais Yesus ago kabibiy matawta iyim i sansandek ka mar tonim eman uliq Filipay-ib God ago on mataw tawonta Krais Yesus inaq soqotim osayta na teq in gigo mataw danmebta na teq in gigo kabibiy matawta nagan bunmo gigo hib lehaq. ² I Gimam God teq i gigo Iyahta Yesus Krais inaq in gigem dumunta negad in ne gigen emid kiskismo usan. ³ Kam bunmo ya ne ginadin emad yaqmo God esey ugaiqta. ⁴ Esey ugad sirisirimo ya ne bunmo ginan inad dimniysaq ne gimen God bulonaiqta. ⁵ Na izaqgo mebmebmo ne Yesus awagamun huritiyta nabmo ne ya inaq wastonim i araqibmo wagam dumunta na akabiyan emyauqta. Emad luwim bo muran i kabiy na garibmo tisor tutauq. ⁶ God-mo kabiy dumunta na alulin ne gilikmanib amta. Emim inmo kabiy na wamuzad oseq le Krais Yesus ta boldaqta akamanib nab teq in emid tihiqiy bugdaq. ⁷ God agem dumunta igad ago kabiy i gibenab eman ya ginaq i araqibmo kabiy na emauqta. Saq ya iqirquran uliq kab ossaq ne yaqgo afaqan na sorad ne bilaqne giqirquran os nog iyaymo. Ad mataw Yesus awagamun geg ugsaq ya amenin emad gibilen sireqsaq ne ya ibunib turayta. Turad ne ya ilumsihsaq i araqibmo wagam dumunta na zaway ugsaq in awaz timeqniyaq. Ya ne giloyinsaq ne ya inan ginad diq bilaqaqta. Nazaq iyan ya kazaq inad dumun diqta ne bunmo negaiqta ka in daq dumunta. ⁸ God ameb ya helmo bilaqaiq. Krais Yesus ne ginan anad bilaqaqta nazaqmo ya ne bunmo ginan inad bilaqsaq ginadin diq emaiqta. ⁹ Ya ne gimen God bulonad kazaq bilaqaiq, God haqaiq, ni mataw na gilumsihad ginad emid hastitaysaq in an anan ginad bilaqgo ginad em hasiy haqaiq. Ginad em hasaq daq na in gilikmanib ayahmo iyan haqaiq. ¹⁰ Ad in daq bunmo gilum kemad emnanta naqmo amomo in emadosiy haqaiq. In nazaq emad oseq le Krais ta boldaqta akaman nab in gigemab ginumlan haiq diq iysaq in giholib daq araq ananin waq daqayta hiqusan haqaiq. ¹¹ Ad kam nab Yeusu abin titnonta naqmo amomo in giholib ayahmo usan haqaiq. In on mataw nazaq diqta iyid teq ni nibin ayahta in gigo hib waqsaq on mataw bunmo ninmo nibin tuquluw daqay haqaiq. ¹² Ya imaqbaban, ne hurit kemiy. Daq kawa ya iholib gatimta ka in Yesus awagamun a hiwasihaq. Haiqgam. In leh tutaq. ¹³ Nazaq iyan uliq kab Sisa ago bab matawta na teq in ago gavman mataw bunmo teq on mataw ta asor na bunmo in yaqgo tuhuritiy. Huritim in ya inan ginad kazaq tiqemay, Pol Krais asen muzinad ago kabiy emaqta na ago in irquran osaq haqay. ¹⁴ Teq uliq kab ya imaqbaban Iyahta ago on matawta na kabemmo in ya iqirquran ossaq ibiyad in zaway diq tiqiyay. Zaway iyad in a hirabad God ago .gamuk aturanmo bilaqayta. ¹⁵ Helmo, mataw na gigo asor ginad miqinta yagad in ya ibin wazid woqsaq in gibin ayah iydaq haqad in Krais awagamun bilaqayta. Saq ta asor ginad dumunta yagad in Krais awagamun bilaqayta. ¹⁶ Mataw ginad dumunta na in yaqgo tuhurit kemay. Ad in ginad emay, God-mo bilaqan Pol gavman matawta na Yesus awagamun gibilen sireqgo haqad in bit giqirquran osayta nab osaq haqay. Haqad in ya inan ginad bilaqsaq in Krais awagamun bilaqayta. ¹⁷ Ari mataw gihar yagayta na in on mataw gihureqid in ya ihuloseq in gigo hib lehnan haqad in Krais awagamun bilaqayta. In ginad dumunta ussaq nazaq a hiqemayta. Haiqgam. Ya iqirquran kab ossaq in ya iholib afaqan ta araq emid ya inad ayahmo meqniydaq haqad in nazaq emayta. ¹⁸ Teq ya inad a himeqniyaq. Mataw asor na ginad miqinta usaq in Yesus awagamun bilaqayta. Ta asor na daq helta emayta. Teq in bunmo Krais awagamun bilaqsaq on mataw kabemmo huritayta. Nazaq iyan ya inad dimniysaq osaiq. Teq ya inad dimniyaqta na ahihulosdaiq. ¹⁹ Haiqgam. Ya inad kazaq diq emaiq. Ne yaqmen God bulonsaq in Yesus Krais ago Bugaw Dumunta yagsaq ya zaway iyeq osad a hiwoqdaiq haqaiq. In ya ilumsihsaq afaqan kawa ya iholib usaqta ka le tihiqiyid ya dumunmo God ameb toqosdaiq haqaiq. ²⁰ Ya inad emaiq, In ya ilumsihsaq ya imeqbay asit a hiwoqdaq haqaiq. Ya zaway diq iyeq ossaq Krais abin ayahta yaqgo hib tuwaqdaq haqaiq. Nazaq iyid teq ya kayeqmo osdaiq o haiq, mataw ya inol emid moqsaq, daq bunmo ya iholib gatiqdaqta na amalib ya Krais abin emid ayah tiqiydaq haqaiq. Haqad ya God amen emad ihol tuhusisiqaq. ²¹ Na izaqgo ya og kab kayeqmo osad na ya Krais inaq tisoqotim dumunmo osaiqta. Ari ya moqeq na ya tidimniy hasdaiq. ²² Teq ya isan ka kayeqmo osad ya God ago kabiy emad on mataw kabemmo gilumsihaiqta. Ya naga danteqin diq muzindaiq? Danteq giger na dumun. ²³ Nazaq iyan ya inad giger tiqemaiq. Ya isan ka huloseq leheq Krais inaq osnan inad ayahmo usaqta. Ya Krais inaq osdaiqta na in og ka ago os uriyameq dumun diqmo iydaqta. ²⁴ Teq ya ne ginadin emaiqmo. Na izaqgo ya kayeqmo osad ne tigilumsihdaiqta haqad. Ari ya gihuloseq leheq ya ne a ta higilumsihdaiq. ²⁵ Nazaq iyan ya inad emaiq, Ya ne gihuloseq a hilehdaiq haqaiq. Haiqgam. Ya ne bunmo ginaq og kab toqos tutdaiq haqaiq. Osad ya ne gilumsihsaq ne ginad helmo haqayta na ayah iysaq ne ginad dimniysaq toqos daqay. ²⁶ Nazaq iyid teq ya le ne gigo hib a ta gatiqid ne ya inan ginad dimniysaq Krais Yesus abin tuquluw daqay. ²⁷ Ari ya ne gigo hib leheq nenaq os daiq o haiq ya kab ne gigo hib pisanmo osaq tuteqmo ne daq kazaq emad osiy. Ne gigo luw os bunmo Krais awagamun na inaq rireneqmo lehan. Saq ne gigem amilikmo iyeq giwaz meqniyeq turiy. Ad ne ginad amilikmo iyeq ne an ulumsihad mataw Yesus awagamun wazbiliynan tonsaq ne wagam na anononmo gibilen kemiy. ²⁸ Teq ne gigo bab na gihar negsaq ne higirabuniy. Ne nazaq emsaq teq ya le ne gibiydaiq o haiq ya ne gigo hib pisanmo osad ya ne gibin dumunta nazaq tuhuritdaiq. Ari ne nazaq giwaz meqniyad tursaq ne gigo bab ne gibiyad in gihol loyinim ginad emay, I teq timeqniyam daqagya haqay. Saq negmo ginad emay, God-mo i giqeman i kazaq giwaz meqniyim turauqta haqay. Nazaq iyan i teq leheq inaq dumunmo toqosam haqay. ²⁹ God ne ginad eman hastitayan ne Krais anan helmo tihaqayta. Teq ne Krais anan haqgomo haqad in ne a higiwamta. Haiqgam. Ne Krais anan helmo haqad in abinib santitiy sor daqaymo haqad in ne giwamta. ³⁰ Kaziqmo Krais ababun bab yagsaq ne ya ibiy yaqayta. Teq muran ya bab na em tutsaq ne huritad bab amilik nabmo ne tituraymo.