¹ Ari yaqmo Pol. God-mo anad bilaqan ya Krais Yesus ago Aposel iyta. Ya sansandek ka God ago on mataw tawonta uliq Efesus-ib Kraus Yesus ago nan huritad muzinayta na gimen mar tonim eman le negaq. ² I Gimam God teq i gigo Iyahta Yesus Krais inaq in gigem dumunta negad in ne gigem emid kiskismo usan. ³ I God abin uluwuq. In i gigo Iyahta Yesus Krais ago God teq in Yesus amamtamo. In i gigeman i Krais aholib soqotim inaq ossaq in i giwitan gidimun tonim ago os dumunta Heven-ib usaqta na tiqig bug. ⁴ Na in Kazaq. Kaziq diqmo God og ka hiqemadmo in i Yesus inaq soqoteq osamta na ago tibilaqan usta. In i ginan anad am, In Yesus inaq soqoteq teq in ya imeb yaqgo on mataw tawonta iyeq os daqay ham. Osad daq araq ananin waq daqayta in giholib haiq iysaq in ya inan ginad diq bilaqsaq os daqay ham. God i gimen daq nazaq diq tiqem igdaq haqad in aholyon i gitowun tiqamta. ⁵ Gitowun emim in Yesus Krais ago kabiy amalib i giwirinan i inmo ago onmin tigatiw, in kaziqmo anad bilaqan usta nazaq. ⁶ God in atatin Yesus anan anad diq bilaqsaq in agem dumunta ugaqta. Nazaq iyan i Yesus inaq soqotim ossaq God agem dumunta atatin ugaqta nazaqmo in agem dumunta samanmo naw nog i igaqtamo. Igsaq i in ago agem dumunta ayahmo igaqta na anadin emad i abin uluwauqta. ⁷ Yesus Krais inmo ahol anedan hulosim i gizayim giwamta. Giwaqan muran i in aholib soqotim inaq ossaq in anedan na i gigo daq miqinta tisohol bugan God in anadin a ta hiqemaqta. God agem dumunta ignan haqad in nazaq i gimen danteq dumun diqta na am. ⁸ Emad in agem dumunta nawa na ayahmo diq igan giynin bugan i ginad tihastitay. Hastitayan God anad ulilemim usta na in i giqisuhunan i ginad tiqem has. ⁹ Na izaqgo God i gilumsihnan anad bilamta na Krais ago hib ulal iysaq i ahol waqim God anad ulilemabta na ago tuhurit. ¹⁰ Teq God anad na in kazaq. In nagah bunmo giwamuzad dan ugeq ugeq le in anad usta nazaqmo in tigatiq bugdaq. Gatiq bugid nab teq nagah bunmo Heven-ibta teq ogibta inaqmo in Krais ahenib iyeq wastitayeqmo toqos bug daqay. ¹¹ God nagah bun diqmo giwamuzad giqemsaq in tekomo anad tiqamta nazaqmo diq in gatiqayta. Ad kaziqmo in anad am, Juda on mataw teq danmeb Krais anan helmo haqsaq ya ihol yon giwaqid in yaqgo on matawmo diq iyeq toqos daqay ham. ¹² Ossad ya in gidimun tonta na ago in anadin emad in tuteqmo ya ibin tuquluw daqay ham. Nazaq iyan God in i Juda asor ginan anad amta nazaqmo in bilaqan i in anad na muzinim danmeb Krais anan helmo tihawta. ¹³ Ari ne on mataw Juda a haiqta na, ne inaqmo Yesus awagamun dumunta na tuhuritiytamo. Ne God ago gamuk helta na huritim ginad emiy, God i inaqmo tigiwaqdaq haqad ne Krais anan helmo tihaqiy. Haqad ne Krais inaq soqotim ossaq God in ago Bugaw Dumunta na tinag, in ago on mataw bunmo negnan hel diqmo bilamta nazaq. Negan ne ginad emay, Helmo, i God ago on matawmo diq tiqiyim osauqta haqay. ¹⁴ I Yesus anan helmo haqauqta na bunmo i God ago Bugaw Dumunta tuwawta. Waqim inaq osad i ginad emauq, God ago Bugaw i giholib usaqta ka in God ago os dumunta in teq igdaqta na atowun nog i giholib usaqta haqauq. God ago Bugaw Dumunta ka i giholib ussaq le God i giwaqid i in ago on mataw tiqiy hasamta haqauq. Haqad God i gidimun tonta na i anadin emad abin tutimmo uluwauqta. ¹⁵ Ari mataw ne gibin kazaq bilaqsaq ya huritta. Ne Iyahta Yesus anan helmo haqad ne God ago on mataw tawonta na bunmo ginan ginad bilaqaqta. ¹⁶ Ya ne gibin nazaq huritim tutimmo ya God inaq gamuk emad esey ugaiqta. ¹⁷ I gigo Iyahta Yesus Krais ago God in i Gimam iyim uliq Heven-ib abin teq ahol anuwan ayahta inaq osaqta. Nazaq iyan ya in inaq gamuk emad ya ne ginadin emad kazaq bulonaiq, God haqaiq ni ninad dumunta Efesus on mataw na negsaq in ginad awaz meqniyan haqaiq. Awaz meqniysaq ni ningo gamuk alulin ulilemim usaqta na emid in gimeb ulal iysaq in ningo hurit hasiy haqaiq. ¹⁸ Ad ni in ginad emid hastitayanmo haqaiq. Hastitaysaq ni in giwaqeq gidimun tonan haqad gililewunta na ago in ginad emiy haqaiq. Ginad emad in ningo os dumunta abin inaqta na ago huritiy haqaiq. Ningo on mataw tawonta bunmo in ningo os dumunta na tuwaqim in mataw ginaghan inaqta nog iyim osayta haqaiq. ¹⁹ Teq ya God kazaq bulonaiqmo, Efesus mataw na in ningo zaway awaz miqinta i on mataw ni ninan helmo haqauqta giholib kabiy emaqta na ago i loyiniymo haqaiq. Loyinad ningo zaway in nagah ayah diqmo iyan in a hiqulum kem daqayta na ago in ginad em hasiymo haqaiq. ²⁰ Zaway naqmo kaziqmo Krais aholib kabiy eman in hodhodab usim ta eramta. Eraqan God ago zaway naqmo Krais eman in Heven-ib galehim God aben aqabun ban toqos woqim osaqta. ²¹ Osad muran in bbugaw aseseqta zaway amo amo wazayta nagan teq angelo giwaz miqmiqinta maror nog iyim ulilib osayta nagan bunmo giquriyamim in ulilibmo diq osaqta. Osad in nagah aseseqta gibin inaqta nagan bunmo giquriyamad kam muturta teq gatiqdaqta nab in abin nazaqmo tuqus tutdaqtamo. ²² God in on mataw Krais ago nan huritayta na ginadin emad in nagah bunmo giqeman in Krais ahenib tiqiy bugsaq in Krais eman nagah na bunmo gifiqin tiqiy. ²³ Teq on mataw Krais ago nan huritayta na in Krais anon iyim in Krais ahol bunmo iyim osayta. Saq Krais-mo in og kait inaq tuwaq bugim osaqtamo.