¹ بەبیر باوەڕداران بهێنەوە کە گوێڕایەڵی فەرمانڕەوا و دەسەڵاتداران بن، گوێڕایەڵی یاسا بن، ئامادەبن بۆ هەموو کارێکی باش، ² قسەی خراپ بە کەس نەڵێن، دژایەتی نەکەن، بەڵکو میهرەبان بن و بە نەرم و نیانی تەواو مامەڵە لەگەڵ هەموواندا بکەن. ³ چونکە ئێمەش لە ڕابردوودا نەزان و گوێڕایەڵ نەبوین و لە خراپە و تاریکیدا بووین، کۆیلە بووین خزمەتی هەوەس و چێژە جۆراوجۆرەکانمان دەکرد، لە خراپەکاری و ئیرەییدا دەژیاین، خۆشەویست نەبوین و ڕقمان لە یەکتربوو. ⁴ بەڵام کاتێک میهرەبانی خودای ڕزگارکەرمان، و خۆشەویستییەکەی بۆ مرۆڤەکان دەرکەوت، ⁵ ڕزگاری کردین، نەک لەسەر بناغەی کارە ڕاستودروستەکان کە کردوومانە، بەڵکو بەهۆی بەزەییەکەیەوە، بەتەواوی شۆردراینەوە تا ببینە دروستکراوێکی نوێ بە گیانە پیرۆزەکە، ⁶ ئەوەی بەدەوڵەمەندی بەسەرمانیداڕژاند بە یەشوای مەسیحی ڕزگارکەرمان. ⁷ کە کاتێک بە بەخششی ئەو بێتاوان دەبین، دەبینە میراتگر، بەگوێرەی هیوامان بە ژیانی هەتاهەتایی. ⁸ ئەم وتەیە ڕاستە! وە دەمەوێت ئەم بابەتانە بە شێوەیەکی یەکلاکەرەوە یەکلایی بکرێتەوە، تاکو ئەوانەی باوەڕیان بە خودا هەیه وریا بن لە هەوڵدان بۆ ئەنجامدانی کارە چاکەکان. ئەم شتانە باشن و بەسودە بۆ خەڵکی. ⁹ دەربارەی بابەتی گەمژانە، وەک ڕەچەڵەک، و دوژمنایەتی، و دووبەرەکی لەسەر تەوڕات، خۆتان بەدوور بگرن، چونکە بێ سودە و پۆچە. ¹⁰ ئەوەی گومڕایی بڵاو دەکاتەوە، پەیوەندیی لەگەڵدا بپچڕێنە دوای ئەوەی بۆ جاری یەکەم و دووەم ئاگادارت کردەوە، ¹¹ دەزانن ئەوانە لادەرن و لە گوناهەدا دەمێننەوە وخۆیان بڕیار لەسەر خۆیان دەدەن! ¹² هەر کە ئارتیماس یان تیخیکۆسم بۆ ناردی، هەوڵبدە بێیتە لام بۆ شاری نیکۆپۆلیس، چونکە بڕیارم داوە زستان لەوێ بەسەر بەرم. ¹³ هەوڵێک بدە بۆ ئەوەی یارمەتی زیناس پارێزەر و ئەپۆلۆس بدەیت بۆ ئازادبوونیان، پاشان دڵنیا بیت لەوەی هەموو پێداویستیان دابین کراوە. ¹⁴ خێزانەکانمان فێربن کاری چاکە بن بۆ دابینکردنی پێداپێویستەکانیان، بۆ ئەوەی بێ بەرهەم نەبن. ¹⁵ هەموو ئەوانەی لەگەڵمن سڵاوتان لێدەکەن. سڵاو لە هەموو خۆشەویستان بکە لە باوەڕدا. بەخشش لەگەڵ هەمووتان بێت!