¹ دوای ئەوەی ڕزگارمان بوو زانیمان ئەو کەناراوەی کە گەیشتینە ئەوێ دوورگەی ماڵتایە. ² خەڵکی ئەو دوورگەیە بە میهرەبانییەکی زۆرەوە پێشوازییان لێکردین. کاتێک باران دەباری و کەش و هەوا سارد بوو، ئاگرێکیان بۆ داگیرساندین و پێشوازییان لێکردین. ³ پۆڵس دارکانی کۆکردەوە و فڕێیدایە ناو ئاگرەکەوە ولەناکاو بەهۆی گەرما مارێکی ژەهراوی لە دارەکە هاتە دەرەوە و دای بە دەستیەوە . ⁴ ئینجا خەڵکی ماڵتا مارەکەیان بینی کە بە دەستیەوە دابووە، بە یەکتریان گوت:« ئەم پیاوە دەبێ بکوژ بێت، چونکە دوای ئەوەی لە دەریا ڕزگاری بوو دادپەروەری نەیهێشت بژی». ⁵ بەڵام پۆڵس مارەکەی فڕێدایە ناو ئاگرەکەوە بەبێ ئەوەی زیانی پێ بگەیەنێت. ⁶ چاوەڕێی ئەوە بوون جەستەی هەڵئاوسێت یان لەناکاو بمرێت. زۆر چاوەڕێیان کرد، بێ ئەوەی هیچ زیانێکی پێ بگات، بۆیە بۆچوونیان لەبارەیەوە گۆڕی و گوتیان: «ئەو خودایە!» ⁷ لە نزیک کەنارەکە کە لەوێ دابەزین کێڵگەکانی فەرمانڕەوای دوورگەکە، پۆبلیۆس بوو، بانگهێشتی کردین و بۆ ماوەی سێ ڕۆژ میوانداری کردین. ⁸ باوکی پۆبلیۆس لە جێگادا بوو بەهۆی تا و سکچوونی توندەوە نەخۆش بوو. پاشان پۆڵس سەردانی کرد و نزای کرد و دەستەکانی لەسەر دانا، چاکی کردەوە. ⁹ پاشان هەموو نەخۆشەکانی دیکەی ئەو دوورگەیەش هاتن و چاکبوونەوە. ¹⁰ چەندین دیارییان پێداین، لە کاتی ڕۆشتندا ئەو شتانەیان بۆ دابین کردین کە پێویستمان بوو بۆ گەشتەکەمان. ¹¹ دوای سێ مانگ لە ئەسکەندەریەوە بە کەشتییەکەوە بەڕێکەوتین، وێنەی دووانە (واتە دوانە)مان پێبوو، کە جستانی لە ماڵتا بەسەر بردبوو. ¹² کاتێک گەیشتینە شاری سیراکیوز سێ ڕۆژ لەوێ بووین، ¹³ پاشان بە کەشتی ڕۆیشتین و بە پێ لە کەنارەکەوە تا گەیشتینە شاری ریگیۆن. ڕۆژی دواتر بای باشوور هەڵیکرد و بە دوو ڕۆژ گەیشتینە شاری پوتیۆلی. ¹⁴ لەوێ هەندێک برامان دۆزیەوە، داوایان لێکردین حەوت ڕۆژ لەگەڵیان بەسەر بەرین. و بەم شێوەیە گەیشتینە ڕۆما. ¹⁵ کاتێک براکان هەواڵی هاتنی ئێمەیان بیست، هاتنە دەرەوە بۆ گۆڕەپانی ئەپیۆس و لە سێ میوانخانەکەدا پێشوازیان لێکردین. کاتێک پۆڵس ئەوانی بینی سوپاسی خودای کرد و هانی دان. ¹⁶ کاتێک چووینە ناو ڕۆما سەرپەلەکە ڕێگەی بە پۆڵس دا لە ماڵێکی تایبەتدا بمێنێتەوە ولەگەڵ سەربازەێک کە پاسەوانی دەکرد. پۆڵس لە ڕۆما لە ژێر چاودێریدا وتاری دەدا ¹⁷ دوای سێ ڕۆژ پۆڵس بانگەوازی بۆ کەسایەتییە دیارەکانی یەهودییەکان کرد و پێی گوتن: «ئەی برایان،هەرچەندە هیچ شتێکی خراپم لە گەل گەل، و ڕێوڕەسمی باوباپیرانمان نەکردووە، بەڵام لە یورشەلایم زیندانی و ڕادەستی رۆمانییەکان کرام، ¹⁸ لێپرسینەوەیان لەگەڵدا کردم و دەیانویست ئازادم بکەن، چونکە هیچ شتێک نەبوو بەوە شایستەی لە سێدارەدان بم. ¹⁹ بەڵام یەهودییەکان ناڕەزایەتیان دەربڕی، بۆیە ناچار بووم داوای پێداچوونەوە لە قەیسەر بکەم. ئەمە بەو مانایە نییە کە من گلەیی لە هاونیشتمانیانم دەکەم. ²⁰ هەر بۆیە داوام کرد بتابینم و قسەتان لەگەڵ بکەم؛ چونکە من بەم زنجیرە بەستراومەتەوە لە پێناو هیوای یەسرائیل». ²¹ گوتیان: «لە یەهودیاوە هیچ پەیامێکمان لەبارەی ئێوەوە پێنەگەیشتووە، هیچ نێردراوێک لە برایانمانەوە نەهات هیچ شتێکمان پێ بڵێت، یان گلەیی لە تۆ بکات. ²² بەڵام ئێمە بە گونجاو دەزانین بۆچوونی تۆ ببیستن، چونکە دەزانین کە خەڵک لە هەموو شوێنێک دژایەتی ئەم رێبازە دەکەن!» ²³ بۆیە کاتێکیان بۆ کۆبوونەوەیەکی داهاتوو دیاری کرد، کە تێیدا لەگەڵ زۆر کەس هاتنە ماڵی پۆڵس. بۆیە لە بەیانییەوە تا ئێوارە شایەتی بۆ دەدان، بابەتەکانی شانشینی خودای بۆ ڕوون دەکردنەوە و هەوڵیدەدا بابەتەکانی تایبەت بە یەشوایان پێ بسەلمێنێت بە پشتبەستن بە تەوڕاتی موشە و پەرتوکی پێغەمبەران. ²⁴ هەندێکیان بە قسەکانی بڕوایان دەکرد، و هەندێکیان بڕوایان نەدەکرد. ²⁵ بۆیە لە نێوان خۆیاندا ناکۆک بوون، و ڕۆیشتن دوای ئەوەی پێی گوتن: «گیانی پیرۆزراستی دەکرد کاتێک لە ڕێگەی ئیشایا پێغەمبەرەوە بە باوباپیرانتانی گوت: ²⁶ بڕۆنە لای ئەم گەلە و پێیان بڵێن: دەبیستن بەڵام تێناگەن! وە دەڕوانن، بەڵام نایبینن! ²⁷ چونكه‌ دڵی ئه‌م گه‌له‌ ڕه‌ق بووه‌، گوێیان گران بووه‌، چاویان نوقاندووه‌، نه‌وه‌ک به‌ چاویان ببینن وبه‌ گوێیان ببیستن، به‌ دڵیان تێبگه‌ن و بگه‌ڕێنه‌وه‌، منیش چاكیان بكه‌مه‌وه‌!» ²⁸ پۆڵس لە کۆتایی قسەکانیدا گوتی: «کەواتە بزانن کە خودا ئەم ڕزگاربوونەی خۆی بۆ گەلانی دیکە ناردووە، ئەوانیش گوێی لێدەگرن!» ²⁹ کاتێک ئەم قسانەی گوت، یەهودییەکان رۆیشتنە دەر و بە توندوتیژی مشتومڕیان دەکرد. ³⁰ پۆڵس دوو ساڵی تەواو لەو خانووەدا ژیا کە بەکرێی گرتبوو، پێشوازی لە هەموو ئەوانە دەکرد دەهاتن بۆ سەردانی ، ³¹ مزگێنی بە شانشینی خودا دەدا، وبابەتەکانی تایبەت بە پەروەردگار یەشوای مەسیحی فێر دەکرد بە هەموو بوێرییەک و بەبێ بەربەست.