1 ولَمَّا كَانْ يَسُوعْ مَاشِى، شَافْ رَاجِلْ أَعْمَى مِنْ سَاعَةْ مَا إتْوَلَدْ، 2 فَسَأَلَهْ تَلامِيذَهْ: "يَا مُعَلِّمْ، مِينْ إِللِّي عَمَلْ خَطِيَّةْ، الْرَّاجِلْ دَايْتِي وَلاَّ أَبُوهْ وَامَّهْ عَلَشَانْ إِتْوَلَدْ أَعْمَى؟" 3 وِأَجَابْهُمْ يَسُوعْ: "هُوَّ مَا أَخْطَأ وَلا أَبُوهْ وَامَّهْ، وَلَكِنْ عَلَشَانْ تِظْهَرْ أَعْمَالْ اللهْ فِيهْ. 4 فَعَلِيَّ أَنِّي أََعْمِلْ أَعْمَالْ إِللِّي بَعَتْنِي مَادَامْ الوَكْتْ نَهَارْ. هَيِجِي الْلِّيْلْ، وِمَا حَدَاً يِجْدَرْ أَنْ يِشْتِغِلْ فِي الْلِّيْلْ. 5 وِمَادُمْتْ آنِي فِي الْعَالَمْ، فَآنِي نُورْ الْعَالَمْ". 6 جَالْ يَسُوعْ الْكَلامْ دَهْ، وَرَاحْ تَفَلْ فِي الْتُّرَابْ، وِعَمَلْ طِينْ مِنْ التُّفْلْ دَايْتِي، وِحَطَّهْ عَلَى عَيْنِيْ الأَعْمَى، 7 وِجَالْ لِلْرَّاجِلْ الأَعْمَى: "رُوحْ إِغْسِلْ عَيْنِيْكْ فِي بِرْكِةْ سِلْوَامْ"، يَعْنِي الْمُرسَلْ. وِرَاحْ الْرَّاجِلْ وَغَسَلْ عَيْنْيهْ وِعَادْ بَصِيرْ. 8 فَسَألْ الْجِيرَانْ وِإللِّي كَانُو بِشُوفُوهْ مِنْ جَبْلْ بِيِشْحَتْ: "مِشْ هُوَّ دَايْتِي نَفْسَهْ إِللِّي كَانْ جَاعِدْ عَلَشَانْ يِشْحَتْ؟ 9 "جَالْ بَعْضِيهِمْ: "هُوَّ دَايْتِي". وِنَاسْ تَانْيَةْ جَالُو "لآهْ، وَلَكِّنُّهْ شَبَهُ!" وَلَكِنْ رَدْ الْرَّاجِلْ وِجَالْ: "أَنَا هُوَّ" 10 فَجَالُو لَهْ: "وِكِيْفْ إِتْفَتَحِتْ عِينَكْ؟" 11 أَجَابْ الْرَّاجِلْ وِجَالْ: "فِي رَاجِلْ إِسْمُهْ يَسُوعْ عَمَلْ طِينْ وِدَهَنَ بِهْ عَيْنِيَّ، وِجَالْ لِي: رُوحْ لِبِرْكَةْ سِلْوَامْ وِاغْسِلْ عِيْنِيْكْ. فَرُحْتْ الْبِرْكَةْ وِغَسَلْتْ عِينِيِّ وَرِجِعْتْ بَصِيرْ!" 12 فَسَأَلُوهْ: "وَيْنْ هُوَّ دِلْوَكِيتِي؟" فَجَالْ: "مَا بَاعْرِفْ!" 13 فَأَخَدُو الْرَّاجِلْ إِللِّي كَانْ أَعْمَى لِلْفَرِّيسيِّينْ. 14 وَكَانْ الْيُومْ إِللِّي عَمَلْ فِيهْ يَسُوعْ الْطِّينْ وِفَتَّحْ عَيْنيَّ الأَعْمَى، يُومْ سَبْتْ. 15 فَسَأَلَهْ الْفِرِّيسِيِّينْ: "كِيفْ أَبْصَرْتْ؟". فَأَجَابْ: "رَاحْ الْرَّاجِلْ حَطْ طِينْ فِي عَيْنِيَّ، وَِغَسَلْتْ عَينَيَّ، وِآنِي أُبْصِرْ دِلْوَكِتِي" 16 فَجَالْ بَعْضْ الْفِرِّيسِييِّنْ: "مِشْ مُمْكِنْ يِكُونْ الْرَّاجِلْ دَايْتِي مِنْ اللهْ، لأَنَّهْ خَالَفْ وَصِيّةْ الْسَّبْتْ". وَلَكِنْ بَعْضِهِمْ جَالُو: "كِيفْ يِجْدَرْ رَاجِلْ خَاطِي يَعْمِلْ كُلْ الْمُعْجِزَاتْ دَايْتِي؟" وَجَعْ بِيْنَاتْهُمْ خِلافْ. 17 وِرَاحُو سَألوُ تَانِي إِللِّي كَانْ أَعْمَى: "آيْهْ رَأَيَكْ أَنْتَ فِيهْ لأنُّهْ فَتَّحْ عَيْنِيْكْ؟" فَأَجَابْهُمْ: "دَا نَبِي!" 18 وَرَفَضْ الْيَهُودْ أَنْ يِصَدَّجُو إِنَّهْ كَانْ أَعْمَى وَأَبْصَرْ، فَرَاحُو إِسْتَدْعُوا وَالِدِيْهْ 19 وِسَألُوهُمْ: "دَا وَلَدْكُمْ إِللِّي كَانْ أَعْمَى وَكيِفْ بِشُوفْ دِلْوَكِيتِي؟" 20 أَجَابْهُمْ الْوَالِدَانْ: "إِحْنَا عَارْفِينْ أنَّ وَلَدْنَا دَايْتِي إِتْوَلَدْ أَعْمَى. 21 وَلَكِنْ مَا إِمْنَعْرِفْ كِيفْ أَبْصَرْ وَمِينْ فَتَّحْ عَيْنَهْ. هُوَّ رَاجِلْ بَالِغْ الْسِّنْ وَرَشِيدْ، يِجِاوِبْكُمْ عَنْ نَفْسَهْ، فَسْأَلُوهْ" 22 وِجَالْ الْوَلَدِيْنْ الْكَلاَمْ دَايْتِي عَلَشَانْ كَانُو خَايْفِينْ مِنْ الْيَهُودْ، عَلَشَانْ الْيَهُودْ إِتَّفَجُو أَنَّ كُلْ إِنْسَانْ يِجُولْ إنُّ يَسُوعْ هُوَّ الْمَسِيحْ يِطْرِدُو مِنْ الْمَجْمَعْ. 23 عَلَشَانْ إكْدِهْ جَالْ وَالِديْنْ: "هُوَّ كَامِلْ الْسِّنْ وَرَشِيدْ فَاسْأَلوُهْ". 24 وِرَاحْ الْفرِّيسِيُّونْ طَلَبُو الْرَّاجِلْ إِللِّي كَانْ أَعْمَى مَرَّة تَانِي، وِجَالُو لَهْ: "أَعْطِي مَجْدْ للَهْ! إِحْنَا عَارْفِينْ أنَّ الْرَّاجِلْ دَايْتِي خَاطِي". 25 وِجَاوَبْهُمْ إِللِّي كَانْ أَعْمَى: "خَاطِي هُوَّ، أَنَا مَا بَعْرِفْ! وَلَكِنِّي عَارِفْ شَيْ وَاحِدْ: أَنِّي كُنْتْ أَعْمَى وَدِلْوَكِيتِي بَشُوفْ!" 26 فَسَألوهْ تَانِي: "آيْهْ إِللِّي عِمْلُو بِيكْ؟ كِيفْ فَتَّحْ عَيِنِيْكْ؟" 27 أَجَابْهُمْ الْرَّاجِل إِللِّي كَانْ أََعْمَى: "آنِي جُلْتِلْكُمْ وَمَا سِمِعْتُونِي، لِيهْ عَاوْزِينْ تِسْمَعُو منِّي مَرَّةْ تَانْيَةْ؟ أَنْتُوعَاوْزِينْ إِتْكُونُو تَلامِيذْ لِلْرَّاجِلْ دَايْتِي؟" 28 فَشَتَمُوهْ وِجَالُو لَهْ: "أَنْتَ تِلْمِيذَهْ! لَكِنْ إِحْنا تْلامِيذْ مُوسَى. 29 إِحْنَا عَارْفِينْ أَنَّ مُوسَى كَلَّمَهُ اللَّهْ؛ لَكِنْ الْرَّاجِلْ دَايْتِي، مَا إِمْنَعْرِفْ أَصْلَهْ!" 30 فَأَجَابْهُمْ الْرَّاجِلْ: "فِي ذَلِكْ عَجَبْ إنُّ فَتَّحْ عَينِيِّ، وِتْجُولُو لا تَعْلَمُو لَيهْ أصْلْ! 31 إِحْنَا عَارْفِينْ أَنَّ اللَّهْ مَا بِيَسْتَجِيبْ لِلْخَاطِييِنْ، لَكِنْ يَِسْمَعْ لَمِينْ يَتَّجِيهْ وِيَعْمَلْ إِرَادْتَهْ، 32 وِمَا سِمِعْنَا لِوَكْتْ طَوِيلْ أَجْيَالْ كَتِيرْ أَنَّ حَدَاً فَتَّحْ عَيْنْ مَوْلُودْ أَعْمَى! 33 لَكِنْ إِنْ كَانْ هُوَّ مِشْ مِنْ اللهْ مَا كَانْ جِدِرْ يَعمِلْ شَيْ". 34 فَصَرَخُو عَلِيْهْ: "أَنْتَ كُلَّكْ إِتْوَلَدْتْ فِي الْخَطِيَّةْ وِتْعَلِّمْنَا إِحْنَا؟" وَرَاحُوا طَرَدُوهْ بَرَّةْ الْمَجْمَعْ. 35 وِعِرِفْ يَسُوعْ إِنَّهُمْ طَرَدُوهْ خَارِجْ الْمَجْمَعْ، فَرَاحْ لِيهْ يَسُوعْ وِسَأَلَهْ: "إِتْآمِنْ بِابْنْ اللَّهْ؟" 36 أَجَابَهْ : "مِيِنْ هَوَّ يَا سِيدِي عَلَشَانْ أَآمِنْ بِيهْ؟" 37 وِجَالْ لَهْ يَسُوعْ: "إِللِّي شُفْتَهْ وِإللِّي بيِكَلَّمَكْ، هُوَّ نَفْسَهْ!" 38 فَجَالْ لَهْ الْرَّاجِلْ : "آنِي بِآمِنْ يَا سِيدِي!" وِسَجَدْ لِيهْ. 39 وِجَالْ يَسُوعْ: "عَلَشَانْ دَيْنُونَةْ جِيتْ لِلْعَالَمْ دَايْتِي عَلَشَانْ يِفَتِّحْ الْعُمْيَانْ وِيَعْمَى إِللِّي بِيشُوفُو" 40 وِسِمِعْ الْكَلامْ دَايتِي بَعَضْ الْفَرِّيسِيِّينْ إِللِّي كَانُو مَوْجُودِينْ وِسَألُوهْ: "وِإِحْنَا كَمَانْ عَمْيَانْ؟" 41 أَجَابْهُمْ يَسُوعْ :" لَوْكُنْتُمْ عَمْيَانْ بِالْحَجْ، مَا كَانَتْ عَلِيْكُمْ خَطِيِّةْ. لَكِنْ إِتْجُولُو إِحْنَا بَاصِيرِينْ، عَلَشَانْ إِكْدِهْ خَطِيِّتكُمْ بَاجِيَةْ".