1 وِأَمَّا يَسُوعْ، رَاحْ لِجَبَلْ الْزَّيْتُونْ. 2 وَعِنْدْ الْفَجْرْعَادْ لِلْهَيْكَلْ، فَاجْتَمَعْ حَولَهْ جُمْهُورْ الْشَّعْبْ، فَجَعَدْ يِعَلِّمْهُمْ. 3 وِجَابْ لِيهْ مُعَلِّمِينْ الْشَّرِيعَةْ وِالْفَرِّيسِيُّونْ إِمْرَأَةْ إِتْمَسَكَتْ وَهِيَّ إِبْتِزْنِي، وِوَجَّفُوهَا وَسْطِيهُمْ، 4 وِجَالُو لَهْ: "يَا مُعَلِّمْ، الْمَرْأَة دَايْتِي مَسَكْنِهَا وَهِيَّ إِبْتِزْنِي. 5 وِوَصَّانَا مُوسَى فِي شَريعَتَهْ إِللِّي زَيْ دَايْتِي نِرْجِمْهَا بِالْحِجَارَةْ، وِانْتَ آيْهْ جُوْلَكْ؟" 6 سَأَلوُهْ عَلَشَانْ يِحْرِجُوهْ وَيِلاجُو تُهْمَةْ يِحَاكْمُوهْ بِيهَا. وَلَكِنْ هُوَّ إِنْحَنَى وِبَدا يِكْتُبْ بِإِصْبَعَهْ عَلَى الأَرْضْ. 7 وَلَكِنَّهُمْ أَلَحُّو عَلِيْهْ كَتِيرْ بِالسُؤَالْ، فَاعْتَدَلْ وِجَامْ وِجَالْ لَهُمْ: "إِللِّي مِنْكُمْ مِنْ غَيرْ خَطِيَّةْ يِرْمِيهَا فِي الأَوَّلْ بِالْحَجَرْ!" 8 وِرَاحْ إِنْحَنَى تَانِي وِعَادْ يِكْتُبْ عَالأَرْضْ. 9 فَلَمَّا سِمْعُو الْكَلامْ دَايْتِي مَشُو كِلَّاتْهُمْ وَاحِدْ بَعَدْ الْتَّانِي، وِبَدُو مِنْ الْشُّيُوخْ. وِبَجَى يَسُوعْ وَحْدهْ مَعْ الْمَرْأَةْ، وِالْمَرْأَةْ وَاجْفَةْ فِي مَكَانْهَا. 10 فَاعْتَدَلْ يَسُوعْ وِجَامْ وِجَالْ لَهَا: "وَيْنْ هُمْ يَا إِمْرَأَة؟ مَا حَكَمْ عَلِيْكِ حَدَاً مِنْهُمْ؟" 11 وِجَاوَبَتْ الْمَرْأَةْ وِجَالَتْ: " مَا حَداً يَا سِيدِي". فَجَالْ لَهَا: "وِآنِي كَمَانْ مِشْ هَاحْكُمْ عَلِيْكِ. رُوحِي وَلَا إِتْعُوْدِي تِخْطِي تَانِي!" 12 وِكَلَّمَهُمْ يَسُوعْ كَمَانْ وِجَالْ: "آنِي نُورْ الْعَالَمْ. مِينْ يِتْبَعْنِي فَلا يِتْخَبَّطْ فِي الْعَتْمَةْ لَكِنْ يِكُونْ لِيهْ نُورْ الْحَيَاةْ". 13 فَاعْتَرَضَهُ الْفَرِّيسِيِّينْ وِجَالُو: "أَنْتَ دَلْوَكِيتِي تَشْهَدْ لِنَفْسَكْ، وِشَهَادْتَكْ مَا إِبْتِنْفَعْ". 14 وِأَجَابْ: "مَعْ أَنِّي بَشْهَدْ لِنَفْسِي إِنِّي شَهَادْتِي صَحِيحَةْ، عَلَشَانْ آنِي بَعْرِفْ مِنْ وَيْنْ جِيتْ وِلَوِيْنْ أَرُوحْ؛ لَكِنْ أَنتُمْ مَا إِبْتَعْرِفُو لَا مِنْ وَيْنْ جِيتُمْ وَلا لَوِيْنْ إِتْرُوحُو. 15 وِعَلَشَانْ إِكْدِهْ تَحْكَمُونْ عَليِّ بَحَسَبْ الْبَشَرْ، وِآنِي مَا بَحْكُمْ عَلَى حَدَاً، 16 مَعْ أَنُّ لَوْ حَكَمْتْ لَكَانْ حُكْمِي إِجَي عَادِلْ، عَلَشَانْ مَا بَحْكُمْ لِوَحْدِي، لَكِنْ آنِي وَالآبْ إِللِّي بَعَتْنِي. 17 وِمَكْتُوبْ فِي شَرِِيْعََتْكُمْ إِنَّ شَهَادِةْ شَاهِديْنْ صَحِيحَةْ: 18 فَآنِي أَشْهَدْ لِنَفْسِي،وِكَمَانْ الآبْ يِشْهَدْ لِي إِللِّي بَعَتْنِي". 19 وِسَأَلوُهْ: "وَيْنْ أَبُوكْ؟" فَأجَابْ: "أَنْتُمْ لَا تَعْرِفُونِي، وَلا تَعْرِفُونْ أَبُويْ. وَلَوْ عَرَفْتُونِي كُنْتُمْ عَرَفْتُمْ أَبُويْ كَمَانْ". 20 جَالْ يَسُوعْ الْكَلامْ دَايْتِي فِي الْهِيْكَلْ عِنْدْ الْصَّنْدُوجْ الْعَطَى. وِمَا حَدَاً جَبَضْ عَلِيْهْ، لأَنْ سَاعْتُهْ مَا إِجِتْ بَعَدْ. 21 وِجَالْ لَهُمْ يَسُوعْ: "آنِي هَامْشِي وِانْتُو هَتْدَوْرُو عَلِيِّ، وِمَا تِجْدَرُو تِيجُو لِي فِي مَكَانِي، لَكِنْ إتْمُوتُو فِي خَطِيِتْكُمْ". 22 وِالْيَهُودْ إِللِّي كَانُو وَاجْفِينْ بَدُو يِتْسَاءَلُو: "آيْهْ إِللِّي عَمَّا يِجُولُو دَايْتِي مَا تِجْدَرُو تِيجُو عَنْدِي فِي مَكَانِي؟ هَلْ هَيِنْتِحِرْ؟" 23 وِأَجَابْهُمْ وِجَالْ: "أَنْتُمْ مِنْ الأَرْضْ. أَمَّا آنِي مِنْ فُوجْ. أَنْتُمْ مِنْ الْعَالَمْ دَايْتِي. وِآنِي مِشْ مِنَّهْ. 24 عَلَشَانْ إِكْدِهْ جُلْتُلْكُمْ هَتْمُوتُو فِي خَطَايَاكُمْ، عَلَشَانْ أَنْتُمْ إِنْ لَمْ تَآمْنُو بِأَنِّي آنِي هُوَّ، رَاحْ إِتْمُوتُو فِي خَطَيَاكُمْ". 25 وِسَأَلُوهْ: "مِينْ أَنتَ؟" أَجَابْ يُِسوعْ: "جُلْتُلْكُمْ مِنْ الْبِدَايَِةْ! 26 وِعَنْدِي حَاجَاتْ كَتيرَةْ أَجُولْهَا وِأَحْكُمْ بِيهَا عَلِيْكُمْ. وَلَكِنْ إِللِّي أَرْسَلْنِي هُوَّ حَجْ، وِمَا أَجُولُهْ لِلْعَالَمْ هُوَّ إِللِّي سِمِعْتُهْ مِنَّهْ". 27 وَلَمْ يَفهَمُو إنَّ يَسُوعْ بِجُولُهْ دَايْتِي كَانْ بِيجْصُدْ الآبْ. 28 عَلَشَانْ إِكْدِهْ جَالْ لَهُمْ يَسُوعْ: "لَمَّا إتْعَلَّجُو إِبْنْ الإِنْسَانْ عَلَى الْصَّلِيبْ تَعْرِفُو إِنِّي أَنَا هُوَّ، وِأَنِّي مَا بَعْمِل شَيْ مِنْ نَفْسِي، لَكِنْ أَجُولْ الْكَلامْ إِللِّي عَلَّمْنِي إِيَّاهْ أَبُويْ. 29 إِللِّي أَرْسَلْنِي هُوَّ مَعِيْ، وَمَا بِيِتْرِكْنِي وَحْدِي، عَلَشَانْ دَايْمَاً بَعْمِلْ إللِّي يِرْضِيهْ". 30 وِلَمَّا يَسُوعْ كَانْ بِيتْكَلَّمْ آمَنْ بِيهْ نَاسْ كَتيَرةْ. 31 فَجَالْ لِلْيَهُودْ إللِّي آمَنُو بِيهْ: "إِنْ ثَبَتُّمْ فِي كِلْمِتِي، كُنْتُمْ بِالْحَجْ تَلامِيذِي. 32 وِإِبْتَعْرِفُو الْحَجْ، وِالْحَجْ يِحَرِّرْكُمْ". 33 فَرَدْ عَلِيْهْ الْيَهُودْ: "إِحْنَا أَحْفَادْ إِبْرَاهِيمْ، وِمَا إِسْتَعْبَدْنَا أَبَدَاً لِحَدَاً! كِيْفْ بِتْجُولْ لِينَا: إِنَّكُمْ هَتْكُونُو أَحْرَارَاً؟" 34 أَجَابْهُمْ يَسُوعْ: "الْحَجْ الْحَجْ أَجُولْ لُكُمْ: إِللِّي بِيَعْمِلْ الْخَطيَّةْ بِكُونْ عَبْدْ لِيهَا. 35 وِالْعَبْدْ لَا يِبْجَى فِي بَيْتْ سِيِدَهْ دَايْمَاً؛ وَلَكِنْ الإِبْنْ يَعِيشْ فِيهْ لِلأَبَدْ. 36 فَإنْ حَرَّرَكُمْ الإِبْنْ إِتْصِيرُو بِالحَجِيجَةْ أَحْرَاراً. 37 آنِي عَارِفْ إِنَّكُمْ أَحْفَادْ إِبْرَاهِيمْ. وَلَكِنَّكُمْ عَاوْزِينْ تِكْتِلُونِي، عَلَشَانْ كِلْمِتِي مَالْهَاشْ مَكَانْ فِي جُلُوبْكُمْ. 38 آنِي إِتْكَلَّمْ بَاللِّي شِفْتُو عَنْدْ الآبْ، وِانْتُمْ تَعْمَلُونْ إِللِّي سِمِعْتُوهْ مِنْ أَبُوكُمْ". 39 فَأَعْتَرَضَوهُ وِجَالُو: "أَبُونَا هُوَّ إِبْرَاهِيمْ!" وِجَالْ: "لوْ كُنْتُمْ أَوْلادْ إِبْرَاهِيمْ كُنْتُمْ عَمَلْتُو أَعْمَالْ إِبْراهِيمْ. 40 وِانْتُمْ عَاوْزِينْ تِكْتِلُونِي وِآنِي إِنْسَانْ كَلَّمْتُكُمْ بِالْحَجْ إِللِّي سِمِعْتُهْ مِنْ اللهْ. ودَايْتِي لَمْ يَفْعَلَهْ إِبْرَاهِيمْ. 41 إِنْتُمْ تَعْمَلُونْ أَعْمَالْ أَبُوكُمْ!" فَجَالُو لَهْ: "إِحْنَا مَا إِتْوَلَدْنَا مِنْ زِنَى! لِينَا أَبْ وَاحِدْ هُوَّ اللهْ". 42 فَجَالْ يَسُوعْ: "لَوْ كَانْ اللهْ أَبُوكُمْ كُنْتُو إِتْحِبُّونِي، عَلَشَانْ خَرَجْتْ مِنْ اللهْ وَجِيتْ. آنِي مَا جِيتْ مِنْ نَفْسِي، لَكِنْ هُوَّ أَرْسَلْنِي. 43 لِيهْ مَا إِبْتِفْهَمُو كَلامِي؟ عَلَشَانْ مَا إبْتْطِيجُو تِسْمَعُو كَلامِي! 44 أَنْتُمْ أَوْلادْ أَبُوكُمْ إِبْلِيسْ، وِعَاوْزِينْ تَعْمِلُو شَهَوَاتْ أَبُوكُمْ. وِهُوَّ كَانْ مِنْ الْبِدَايَةْ جَتَّالْ لِلْنَّاسْ، وِمَا ثِبِتْ فِي الْحَجْ لأَنُّهْ مَا فِيهْ حَجْ! وِلَمَّا بِيِتْكَلَّمْ بِالْكِدْبْ هُوَّ بِيطَلِّعْ إِللِّي جُوَّاهْ، لأَنَّهْ كَدَّابْ وِأَبُو الْكِدْبْ! 45 وِآنِي عَلَشَانْ بَجُولْ الْحَجْ، مَا بِتْصَدِّجُونِي. 46 مِينْ مِنْكُمْ يِبَرْهِنْ إِنِّي عَمَلْتْ خَطِيَّةْ؟ آنِي دَايْمَاً بَجُولْ الْحَجْ، لِيهْ مَا بِتْصَدِّجُونِي؟ 47 إِللِّي مِنْ اللهْ بِالْحَجْ، يِسْمَعْ كَلامْ اللهْ. وِعَشَانْ إكْدِهْ تُرْفُضُو كَلامْ اللهْ، عَلَشَانْ إِنْتُمْ مِشْ مِنْ اللهْ!" 48 فَجَالْ الْيَهُودْ: "إِحْنَا مِشْ مِنْجُولْ الْحَجْ لَمَّا بِنْجُولْ إِنَّكْ أَنْتَ سَامِيرِيِ وَفِيكْ إِشْطَانْ؟" 49 جَاوَبْهُمْ: "مَا فِيَّ إِشْطَانْ، عَلَشَانْ إِكْدِهْ أَكْرِمْ أَبُويِّ وِانْتُمْ إِتْهِينُونِي. 50 آنِي مَا بَطْلُبْ مَجْدْ لِنَفْسِي، فَهَنُكَّ مِينْ يِطَالِبْ وَيِجْضِي لِي. 51 الْحَجْ الْحَجْ أَجُولْ لُكُمْ: إِللِّي يِطِيعْ كَلامِي مَا بِشُوفْ الْمُوتْ أَبَدَاً". 52 وِجَالْ الْيَهُودْ: "دِلْوَقِيتِي تأَكَّدْنَا أَنَّ فِيكْ إِشِطَانْ. مَاتْ إِبْرَاهِيمْ وِمَاتْ الأَنْبِيَا، وِانْتَ إِتْجُولْ إِللِّي يِطِيعْ كَلامَكْ مَا بِدُوجْ الْمُوتْ أَبَداً؟ 53 أَنْتَ إِتْكُونْ أَعْظَمْ مِنْ أَبُونَا إِبْرَاهِيمْ إِللِّي مَاتْ؟ حَتَّى الأَنبِيَا مَاتُو؛ وَمِينْ إِتْظُنْ نَفْسَكْ؟" 54 أَجَابْهُمْ: "آنِي لًوْ كُنْتْ أُمَجِّدْ نَفْسِي، مَجْدِي لَا شَيْ. لَكِنْ أَبُويْ هُوَّ إِللِّي يِمَجِّدْنِي. وِانْتُمْ إِتْجُولُو إِنَّهْ إِلَهْكُمْ، 55 مَعْ إِنَّكُمْ مَا إِبْتَعِْرفُوهْ. لَكِنْ آنِي عَارْفَهْ. وَلَوْ جُلْتُلْكُمْ إِنِّ مَا بَعْرِفُهْ لَكُنْتْ كَدَّابْ كِيفُكُمْ. لَكِنِّي أَعْرِفُهْ وِاعْمِلْ بِكِلْمِتَهْ. 56 أَبُوكُمْ إِبْرَاهِيمْ فِرِحْ عَلَشَانْ عَنْدُو رَجَاءْ إِنَّهْ يِشُوفْ يُومِي، وِشَافَهْ وِفِرِحْ". 57 وِجَالْ لَهْ الْيَهُودْ: "أَنْتَ مِشْ عُمْرَكْ خَمْسِينْ سَنَةْ كِيفْ شُفْتْ إِبْرَاهِيمْ؟" 58 جَاوَبْهُمْ: "الْحَجْ الْحَجْ أَجُولْ لَكُمْ: آنِي جَبْلْ إِبْرَاهِمْ مَوْجُودْ". 59 فَأَخَذُو حِجَارَةْ عَلَشَانْ يِرْجِمُوهْ، وَلَكِنَّهْ إِخْتَفَى وِخَرَجْ مِنْ الْهِيْكَلْ.