¹ عیسی مسیحْ خدا پسرِ انجیلْ اَطو شروع بِهِه. ² هَطو کی اِشعیایِ نبی کیتابِ میَأن بأمو دَأره:«من می رسولَ پیشاپیش اوسَه کونم تا تی راهَ ترِه بازَه کونه. ³ ندا کوننده ای بیابانِ میَأن فریاد کونه کی؛ خداوندِ راهَ هموارَ کونید و اونِ راهْ مسیرَ بازَه کونید.» ⁴ اَ شخصْ یحیی تعمید دهنده بو کی بیابانِ میَأن زندگی کوده و اعلام کوده کی مردمْ وَأستی توبه بوکوند و غسلِ تعمید بیگیرد. ⁵ مردم جی شهرِ اورشلیم و همۀ سرزمین یهودیه شُدِه بیابان میَأن اونِ ورجَه و خوشَأنِ گوناهانَ اعتراف کودد و اُردنِ رودِ دورون اونِ دسِ جَه غُسل تعمید گیفتد. ⁶ یحیی رَخت، شُترِ پشمِ جَه بو و ایته کمربندِ چرمی هم خو کمرَ دَوَستِه، و اونِ غذا هم مَلخ و عَسلِ صحرایی بو. ⁷ اون مردمَ اَطو موعظه کوده:«بعدِ من کسی اَیِه کی اونِ مقام می جَه خیلی بوجُر تره، من حتی لایق نییِم خمَ بُم و اونِ کفشِ بندَ وَأکونم. ⁸ من شمره آبِ مرَه تَعمید بدَم ولی اونْ شمرَه روح القدس اَمرَه تعمید دِهِه.» ⁹ در اَ موقعْ عیسی جی شهرِ ناصره کی اُستانِ جلیلِ میَأن نَهَه بو بأمو یحیی ورجَه و رودِ اُردنِ دورون اونِ دسِ جَه تَعمید بیگیفت. ¹⁰ وختی عیسی آبِ جَه بیرون بأمو، بیدِه کی آسمان بیشکافت و روح القدس ایتَه کبوترِ مَأنَستَأن اونِ رو نازل بوبُست. ¹¹ و ندایی آسمانِ جَه بَأمو کی:«تو می عزیزِ پسری کی تی جَه راضیم» ¹² بعدِ اَ جریانْ خدا روحْ عیسی یَ بوبورد بیابانِ میَأن. ¹³ و چهل شبانه روز بیابانِ میَأن ایسَه بو و شیطانْ اونَ وسوسه کوده و فقط حیواناتِ وحشی اویَ ایسَه بود و فرشته یان اونَ خدمت کودد. ¹⁴ بعدِ مدتی وختی یحیی بازداشت بوبُست، عیسی بأمو اُستانِ جلیل و مردمِ رِه موعظه کوده و خدا ملکوتَ بشارت دَئِه ¹⁵ و گوفته:«وخت تومامَ بوست و خدا ملکوت نزدیکه. پس شیمی گوناهانِ جَه توبه بوکونید و اَ خبرِ خوشَ ایمان بَأوردید.» ¹⁶ وختی عیسی جلیلِ دریاچِه کنار قدم زَئِه «شمعون» و اونِ برَأر «آندریاسَ» بیدِه کی دریا میَأن دام تَأوأدَه ئِد چره کی مالا بود. ¹⁷ عیسی اوشَأنَ بوگوفت:«می دونبال بَأئید کی شمرَه مردمِ صیاد چَأکونم» ¹⁸ اوشَأنم هو موقع خوشَأنِ دامانَ وِلَ کودد و اونِ دونبال سر راه دکفتد. ¹⁹ و ایبچِه جولوتر جی اویَ، عیسی، یعقوبْ زِبِدی پسرْ و اونِ برأر یوحنایَ بیدِه کی کرجی دورون ایسَه بود و خوشَأنِ دامانَ تعمیر کودد. ²⁰ هو موقع اوشَأنم دعوت بوکود. پس اوشَأنم خوشَأنِ پِئرْ زِبِدیَ اونِ کارگرانِ اَمرَه کرجی میَأن وِلَ کودد و اونِ دونبال بوشود. ²¹ بعدْ عیسی و اونِ شاگردان بوشود شهرِ کفرناحوم و شنبه صبحْ کی روزِ سَبَّت بو کنیسه دورون حاضر بوبُستد و عیسی شروع بوکود تعلیم دَئَن. ²² مردم اونِ تعلیم دَئَنِ جَه تعجب بوکودد، چون یهودِ مُلایانِ مَأنَستَأن موعظه نوکوده، بلکی اقتدارِ اَمرَه تعلیم دَئِه. ²³ اونْ کنیسه دورون ایتَه دیوانه ایسَه بو کی وختی عیسی یَ بیدِه ایمرتبه فریاد بزَه ²⁴ و بوگوفت:«ای عیسایِ ناصری، اَمی اَمرَه چی کار دَأری؟ خَأیی اَمرَه هلاکَ کونی؟ من ترَه شنَأسم تو کیسی! ای خدا قدّوس» ²⁵ عیسی توندی اَمرَه اونَ بوگوفت:«ساکتَ بون و اونِ جَه بیرون بیَأ» ²⁶ اون روحِ شریر هو لحظه اون مردایَ به حالت صرع تَأوَأدَه و نَعره ای بزَه و اونِ جَه بیرون بأمو. ²⁷ مردم همه تَه حیران ایسَه بود فأندرستد و همدیگرِ جَه وَأورسه ئِد:«اَ دِ چیسه؟ اَن دِ چوجور تازه تعلیمیه کی ارواحِ شریر قدرت اَمرَه فرمان دِهِه و اوشَأنم اونَ ایطاعت کوند.» ²⁸ فوری عیسی نام کُلِ اُستانِ جلیلِ دورون بِپیچَست. ²⁹ کنیسه جَه کی بیرون بأمود، فوری یعقوب و یوحنا مرَه بوشود شمعون و آندریاسِ خانه. ³⁰ شمعونِ زن¬مار تَب بوکوده بو و خوفته بو، وختی عیسی فأرسه اویَ، اونَ خبر بدَأد کی اون زنِ حال بده. ³¹ عیسی بوشو اونِ ورجَه و اونِ دسَ بیگیفت و اونَ ویریزَأنِه، هو لحظه اونِ تب قطعَ بوست و ویریشت و مهمانانِ جَه پذیرایی بوکود. ³² غروب دمِ رِه، مردم خوشَأنِ مریضان و دیوانه یانَ عیسی ورجَه بأوردد تا اوشَأنَ شفا بده. ³³ و شهرِ همۀ مردمان بأمو بود و خانه درِ جولو جمعَ بوسته بود. ³⁴ عیسی مریضایِ زیادی یَ کی انواع مریضیانَ دَأشتِدْ شفا بدَه و دیوهایِ زیادی یَ دیوانه یانِ جَه بیرون تَأوَأده و وَأنأشت کی دیوَأن گب بزند چون اونَ شناختِد. ³⁵ فردایی صبح هنوز آفتاب نزَه بو کی عیسی ویریشت و بوشو بیرون، و ایته خلوت خرابه یَ فَأرِسِه و هویَ دوعا کودَأنَ مشغول بوبُست. ³⁶ شمعون و اونِ همراهان اونِ دونبال بگردستد. ³⁷ وختی اونَ پیدا کودد بوگوفتد:«همه تی دونبال گردد.» ³⁸ عیسی اوشَأنَ بوگوفت:«بیشیم شهر و دهاتِ اطرافْ تا اویَ هم موعظه بوکونم، چون هَنِه وَسی بأمو دَارم» ³⁹ عیسی همۀ جلیلَ گردَستِه و کنیسه یانِ دورون موعظه کوده و دیوأنَ بیرون تَأوَأدَه ئه و دیوانه یَانَ شفا دَئِه. ⁴⁰ ایته روز ایته جُذامی بأمو عیسی ورجَه و زانو بزَه و کمک بخَأستْ، اون بوگوفت:«اگر بِخَأیی تَأنی مرَه پاکَ کونی!» ⁴¹ عیسی دیل اونِ رِه بوسوخت و خو دسَ درازَ کود و اونَ لمس بوکود و بوگوفت:«بله کی خَأیم، پاکَ بون!» ⁴² فوری اونِ جُذام خوب بوبُست و شفا پیدا کود. ⁴³ بعدْ عیسی اونَ مُرخصَ کود ⁴⁴ و تاکید اَمرَه اونَ بوگوفت:«کسی یَ حرفی نزنی، بوشو کاهنِ ورجَه و ترَه نیشان بدن و تی پاکَ بوستَأنِ وَسی هو مقدار قربانی کی موسی حُکم بوکوده یَ تقدیم بوکون تا تی شفا رِه شهادتی بیبه.» ⁴⁵ ولی اون مرد هَطو کی شوئون دوبو داد زَئِه و مردمَ گوفته کی شفا پیدا کودِه. هَنه وَسی مردم عیسی دور جمعَ بوستد، جوری بوبُست کی عیسی دِ نِتَأنِستِه مردمِ عادی مَأنستَأن بَأیه شهرِ دورون، و مجبور بوبُست بیرونِ شهر بیابانانِ میَأن بِئسِه، ولی مردم جی همه جا شوده اونِ ورجَه.