¹ VaFarisi nevamweni vevanyori vakabva Jerusarema, vakaungana kaari Jesu. ² Vakaona kuti vamweni vevadzidzi vake vairya chingwa ngenyara dzaka swipa, ukwo kunoti dzisikazi kushambwa. ³ (Ngokuti vaFarisi nevaJudha veshe avadyi vasikazi kunasa kushamba kakurutu nyara dzavo, vechibatirira mitoo yemadzibabamukuru. ⁴ Naapo vabva kumusika, avarwi vasikazikushamba; neimweni mitoo mijinji iripo yevakaashira kuingwarira, kudai ngokusuka tsani nehari nendiro dzethusi.) ⁵ VaFarisi nevanyori vakamubvunza Jesu vechiti:“Vadzidzi vako avateeri ngenyi mitoo yemadzibabamukuru, asi vanorwa chingwa ngenyara dzine tsvina?”, ⁶ Wakati kwavari:“Isaya wakanasa kuprofeta ndimwi, imwimwi vadziitisi, kudai ngezvezvakanyorwa kuti, “ ‘Ava vanhu vanondiremeredza ngemiromo yavo, asi mwoyo yavo iri kuretu neni. ⁷ Asi vanotera kundidira, vechidzidzisa tsika dzevanhu kudai ngezvidzidzo kwazvo.’ ⁸ “Munorekera mipango yaMwari, mwechibatirira mitoo yevanhu.” ⁹ Wakati kwavarizve:“Munoramba yaamho mipango yaMwari, kuti mubatirire tsika dzenyu! ¹⁰ Ngokuti Mosi wakati, ‘Remeredza baba ako namai ako,’ zve, ‘Naye unotuka baba kunyazwi mai ngegwinyiso ngaafe mukufa.’ ¹¹ Asi imwimwi munoti: ‘Kudai munhu echiti kunababa ake nokuti kunamai ake, icho chewaida kuuyirwa ndicho kwendiri chiri Korbhani,’ (ukwo kunoti, ‘Chakapirwa kunaMwari.’), ¹² Ngokudaro amuchamutenderi kuti aitire chiro kunababa nokuti mai., ¹³ Ngokudaro munoita kuti izwi raMwari riite risina shwiro ngendaa yemitoo yenyu yemwakaashidzana. Nezvimweni zvizhinji zvakadaro zvomunoita.” ¹⁴ Wakadaidzazve mbungano kwaari akati kweiri, “Ndizwenyi, imwimwi mweshe, muzwisise. ¹⁵ Apana chiro chinobva ngokubanze kwomunhu cheshipinda mukati mwake chingamusvipisa, asi izvo zviro zvinobva mukati mwomunhu ndizvo zvinomusvipisa. ¹⁶ [“Iye unenzee dzokuzwa ngaazwe.”] ¹⁷ Apo apotera mumhatso, abva kunembungano, vadzidzi vake vakamubvunza ngomuedzaniso uyu. ¹⁸ Naye wakati kwavari, “Nemwiwo amuna kuzwisisa here? Amuoni here kuti kunyazwi chiinyi chinobva ngokubanze chechipotera mumunhu achingakoni kumusvipisa, ¹⁹ ngokuti achipinda mumwoyo mwake, asi mundani mwake, chechibudiswa mushango.” (Ngokudaro Jesu unochenesa kudya kweshe.) ²⁰ Wakati: “Icho chinobuda kubva kumunhu ndicho chinomusvipisa. ²¹ Ngokuti mukati mumwoyo yevanhu kunobuda mikarakadzo yakashata, kuhura, kuba, kuuraya, ²² kuomba, mbau, matsambo, kuchengedzera, kuemura, kutuka, kudzikudza, upenzi. ²³ Izvi zviro zveshe zvakashata zvinobuda kubva ngomukati, ndizvo zvinosvipisa munhu.” ²⁴ Wakamiruka kubvapo pavainga, akaenda kumigano yeThire neSidhoni. Wakapinda mumhatso, asaida kuti aziikanwe ngomunhu; asi aazi kukona kuti afishike. ²⁵ Paripo dzimai raiya nemwanasikana waro mudoko waiya nomweya wakashata, razwa ndiye Jesu, rakaguma rikawira patsoka dzake. ²⁶ Asi dzimai iro raiya muGiriki, ngokubarwa raiya muSurofoenikia. Naro rakamupota kuti aduse dhimoni kubva kumwanasikana waro. ²⁷ Iye wakati kweriri:“Vana ngavagutiswe kutanga, ngokuti akuzi kunaka kutora chingwa chevana kuchikandira kumatuhwa embwa.” ²⁸ Asi rakapingura, rikati kwaari: “Eya, Mambo; matuhwa embwa anodya pashi petafura matsekeneswa evana. ²⁹ Wakati kweriri: “Ngendaa yeizwi iri, enda; dhimoni rabuda kubva kumwanasikana wako.” ³⁰ Rakaenda kumhatso yaro, rakaona mwana akaradzikwa pamubhedhu, nedhimoni raiya rabuda kubva kwaari. ³¹ wakabudazve kubva kumigano yeThire, wakahamba ngepakati peSidhoni metsa kuguma kuruandhle rweGarire, kupotya pakati pemiganu yeDhekaporisi. ³² Vakaunza kaari umwe waiya dziiranzee raiya mbeveve, navo vakamupota kuti aise nyara yake padera paro. ³³ Wakaritora riri rega kubva pakati pembungano, wakaisa zvinwe zvake munzee dzaro, wakapfira mata, akagwama rurumi rwaro. ³⁴ Echiringira mudenga, wakaita mahwema, akati keriri:“Efata!” ukwo kunoti, “Beuka!.” ³⁵ Apapo nenzee dzaro dzakabeurwa, nemusungo worurumi rwaro wakasunhuka, naro rakaereketa zvinozwika. ³⁶ Iye wakavapanga kuti vasazoronzera munhu; asi echinyanya kuvapanga, vakanyanyisawo kuzviteketesa. ³⁷ Navo vakashamiswa kunopinda binzo vechiti:“Iye wakaita zveshe kuti zvinake; unoita kuti nedziiranzee rizwe nechimumumu kuti chierekete.”