¹ Wakabuda kubvapo, akaguma munyika yekwake, nevadzidzi vake vakamuteera. ² pakaguma pa Sabatha, raguma wakadzidzisa mumhatso yokudira, nevazhinji vechimuzwa vakashamiswa. Vakati, “Munhu uyu wakazviona pari zveshe izvi? Kungwaranyi kwakapuwa kuneuyu munhu? Mishamiso yakakura yakadai inoitwa ngenyara dzake?. ³ Uyu andiyepi here mutsetsi, mwana waMaria, mukoma waJakobe, Jose, Judha naSimoni? Nevakunda vake avari pano nesu here?” Navo vakapumhunwa ndiye. ⁴ Jesu wakati kwavari, “Muprofeti aarekerwi kuremeredzwa, asi kwega munyika yake nokuhama dzake nomumhatso yake.” ⁵ Ena wainga asingafaniri kuita zvichamiso apapo asi akaisa nyara dzakepamusoro pevanhu wairwara vangaponeswa. ⁶ Wakashamiswa ngokusikatenda kwavo. Naye wakahamba pakati pemaguta avo echidzidzisa. ⁷ Wakadaidza kwaari vane gumi nevairi, akatanga kuvatuma vairi vairi, naye wakavapa simba rokukurira mweya yakashata. ⁸ Akavapanga kuti vasazotora chiro parwendo rwavo, asi mudondoro wega; vasatora chingwa nokuti nyede nokuti mare muzvikwama zvavo. ⁹ Asi kuti vapfeke magwada, vasazopfekazve mabhachi mairi. ¹⁰ Wakati kwavari, “Kunyazwi ngepari pomunopotera mumhatso, garaipo metsa mubvepo. ¹¹ Kunyazwi ngeiri ndau yomusikazoashirwi nokuti kupurutanwa, mwoobvapo zuwai bukuta pashi petsoka dzenyu kuti riite chapupu kwavari. ¹² Vakabuda, vakachumaira kuti vanhu vatenderuke. ¹³ Vakadusa madhimoni mazhinji, vakadzodza mafuta vazhinji vairwara, vakavaponesa. ¹⁴ Mambo Herodhi wakazvizwa, ngokuti zina raJesu raiya rateketeswa. vangwe Vaiti: “Johani Mubhabhatidzi wamuka kwevakafa, ndizvo mishando iyi ine simba inoshandwa ndiye.” ¹⁵ Asi vamweni vakati, “NdiErija.” Nevamweni vakati, “Muprofeti wakadai ngoumwe wevaprofeti vekare. ¹⁶ Ngekuti uyu Herodhi azwa wakati: “NdiJohani, uwo wendakagura soro inini, wamukazve.” ¹⁷ Ngokuti uyu Herodhi waiya akatuma kumubata Johani kuti amuyise mujere, ngenyayaye pamusoro paHerodhiasi mukadzi waFiripu munun'una wake, ngokuti iye waiya amutora. ¹⁸ Ngokuti Johani waiya akati kunaHerodhi:“Akutenderwi kwouri kuti utore mukadzi womunununa wako.” ¹⁹ NaHerodhiasi waiya akamuzonda, akadisisa kumuuraya, asi wakakorera. ²⁰ Herodhi waimutya Johani, echizia kuti waiya munhu wakarurama, wakacheneswa, wakamungwarira. Apo amuzwa, wakatambudzika kakurutu, asi wakamuzwa ngokudakara. ²¹ Asi raguma zuva rakanaka, apo Herodhi ngezuwa rokubarwa kwake wakaitira dhiri nhunge dzake nenduna dzake nevakuru vegarire. ²² Mwanasikana waHerodhiasi wakapotera akazvina, akamudakadza yaamho Herodhi naavo vaitseama naye pakudya; namambo wakati kunemusikana:“Kumbira kwendiri kunyazwi chiinyi chounoda, ininindinokupa. ²³ Naye wakapika kwaari kuti: “Kunyazwi chiinyi chounozokumbira kwendiri ndinozochipa kwouri, kunyazwi rupande rwoumambo hwangu.” ²⁴ Wakabuda, akati kunamai ake, “Ndokumbirenyi?” Naye wakati, “Soro raJohani Mubhabhatidzi.” ²⁵ Paripo wakapotera kunamambo ngokukasira, akarikumbira akati, “Ndinoda kuti mundipe zvinopano mundiro soro raJohani Mubhabhatidzi.” ²⁶ Namambo wakasvipa mwoyo kakurutu; asi ngendaa yekupika kwake nendaa dzavo yaichama nayo pakarwa, aazi kuda kumurambira. ²⁷ Paripo mambo wakatuma umwe wevarindi vake, akapanga kuti riunzwe soro raJohani. Naye wakaenda akagura soro rake arimujere. ²⁸ Wakaunza soro rake riri mundiro, akapa musikana, nomusikana wakaripa kunamai vake. ²⁹ Naapo vazwa vadzidzi vake vakauya, vakatora muiri wake, vakauisa muguwa. ³⁰ Navapostori vakaungana kunaJesu, vakashuma kwaari panezveshe nezvevaiya vadzidzisa. ³¹ Naye wakati kwavari:“Uyai imwimwi muri mwega pandau iri yega, mumbozorora padoko,” Ngokuti vazhinji vaiuya nokuenda, navo vaiya vasina nenguva yokudya. ³² Navo vakaenda ngechikepe kundau iri yega varivega., ³³ Nevanhu vazhinji vakavaona vechienda, vakavazia, vakarumba ngetsoka vechibva kumadhorobha eshe, navo vakavatangira kuguma. ³⁴ Abuda wakaona mbungano huru, wakakurudzwa ngepamusoro payo, ngokuti yaiya yakadai ngemakwai asina muushi; naye wakatanga kuidzidzisa zviro zvakawanda. ³⁵ Naro zuva rooda kubira, vadzidzi vake vakauya kwaari vechiti, “Panapa indau iri yega nezuva rotoda kubira. ³⁶ Vaendese munharaunda nomumizi, vadzitengere zvokudya. ³⁷ Asi Jesu, wakavapingura, akati kwavari:“Vapei imwimwi vadye.” Navo vakati kwaari:“Tinozoenda here isusu tivatengere zvingwa zvezvigurwa zvesirivha mazana mairi, tivape kuti vadye?”. ³⁸ Asi iye wakati kwavari, “Munezvingwa zvinganai? Endai muone.” Naapo vazvizia vakati: “Zvishanu nehove mbiri.” ³⁹ Wakavapanga kuti veshe vagare pashi ngezvikwata zvikwata padera pemwenje muishi. ⁴⁰ Navo vakagara pashi ngezvikwata zvezana nezvemakumimashanu. ⁴¹ Echitora zvingwa zvishanu nehove mbiri, wakaringira mudenga, akazvibonga. Wakagura zvingwa, akazvipa kuvadzidzi kuti vaise pamberi pavo; nehove mbiri akadzikoanisira veshe ⁴² Veshe vakarwa, vakaguta. ⁴³ Vakatonhera matsekeneswa akazara zvitundu gumi nazviiri ezvingwa nehowe. ⁴⁴ Navo vakarwa zvingwa vaiya vamuna makumi emazana mashanu. ⁴⁵ Paripo wakaangiridza vadzidzi vake kuti vapotere mungarava nokutungamira kuenda ruseri rweBhethisaidha, iye emene echiendesa ungano eshe. ⁴⁶ Pawakabidisa wakaenda pamutunhu kookumbira. ⁴⁷ Amadhekoni, chikepe chaiwa pakati poruandhle, naye waiya ega panyika. ⁴⁸ Echivaona vechitambudzika ngokuhluza ngarava, ngokuti dutu raiya rechipesana navo, kwaa kuda kuita murindo wechina wousiku, iye wakaguma kwavari echihamba padera poruandhle. Waida kuvapinda. ⁴⁹ Asi apo vechimuona echihamba ngepadera poruandhle, vakakarakadza kuti raiya dzimudzangara, navo vakakarara. ⁵⁰ Ngokuti pavakamuzwa veshe, vakatwa. Asi paripo yena wakachingisa kwavari echiti, “Shingai, ndini, musatwa.” ⁵¹ Naye wakakwira kwavari mungarava nedutu rakaterama. Navo vakashamiswa kakurutu mukati mwavo. ⁵² Ngokuti avazi kuzwisisa ngendaa yezvingwa, ngokuti mwoyo yavo yaiya yakakonziswa. ⁵³ Apo vaambuka ruseri vakaguma kunyika yeGenesareta, navo vakasungira ngarava pahumbikumbi. ⁵⁴ Naapo vabuda kubva mungarava, paripo vanhu veyo vakamuzia. ⁵⁵ Navo vakarumba nhau yeshe, vakatanga kutwara ngemisengere avo vairwara, kuvaisa apo pevakazwa kutindipo paari. ⁵⁶ Kunyazwi ngepari paakapinda mumuzi nokuti mumadhorobha nokuti mundau, vakavaradzika vairwara pamusika, vakamupota kuti vabate kunyazwi mupendero wegauni rake; naavo veshe vakamubata vangaponeswa.