¹ An'athsile, mukwame nawa enu, komu limuka eci namwe muli no n'athsile wenu kuwilu. ² Mulombele ko muoto, mukandelele, ³ muliwane kutolombelelako natwe, eci Nyambi ayanjulule shelo liywi, eci to ambe eholeka ya Kilesite. Mukonda yana niangele. ⁴ Mulombele ei inoni amba iyuvahale nawa omu nina loela ku amba. ⁵ Muende ko nyanyami kwawa anakana kulitawa, komu likwashisha nawa eyi mulinayo. ⁶ Maywi enu akale no shihemo. Ape anu maayalo eci wangu mu limukelyo kutawa munu no munu. ⁷ Eci keyi yange, Tikikasi henge akumi imitongwela. Mwapange oyu nahimi ngamba omuwawa, no mungenjenji mupika wa Fumu. ⁸ Nina mutumu kukwene keyi, eci mulimuke ei ikwamahalekukwetu, eci na mikolopishe micima. ⁹ Nina mutumu na Onesimasi, naye mwapenu omu wawa no yunahima, mwenjenu, henge na mitongwela enu yoihe ina kwamahala kuno. ¹⁰ Aristarikasi, oyu nili nenji mukamenga, amivumenena, no Mareka, mwapa Barnabasi na mikutululanga; ou akukeya kukwenu mwa kuna mu tambule, ¹¹ kalo no Jesu oyu neshiwa Justus. Awa wafoci athza kumukanda wena kwa mano mumuvuthso wa Nyambi ana ni kwathsa nene. ¹² Epafarasi amivumenena. Naye mwethenu kalo mupika Kilesite Jesu. Aye shikati shoshihe afela paku milombelela, eci wangu muyuvishishe kokuyala no shwemwa wa Nyambi. ¹³ Mukunda natwesha kupaka eci amikwamena kokolo, kwawa limu Laodisi, nawa ali mu Hierapolisi. ¹⁴ Luka, nganga wetu oyu twahima no Demasi amivumenena. ¹⁵ Muni vumenene apange wetu oyu twahima no Demasi amivumenena. Muni vumenene apange awali mu Loadisi, nomu Nyimpha, no keleke athzi thzili munjiyo thzenji. ¹⁶ Ou mwakumana kutala eli lin'olo, mwa kalitalele no mukeleke thzo mu Laodisi, kalo mwa kamone eci namwe mwa tala eli lya kutunda ku Loadisi. ¹⁷ Muambele Arikipasi eci, "Omone ekwama eyo no tambula kwa Fumu, eyi ona loela kuyalishelela." ¹⁸ Namivumenena kokun'ola ko lioko lyange-ame Paulusi. Muvulama tungongolo twange. Shihemo sha Nyambi shikale nenu.