¹ Awa nahima, elipo lin'olo lyo mushili eli nina min'olela,ne aman'olo oahe akumivulukithsa kupindula mayalo enu oakenu ² ci mulivulukishe maywi a ambiwa kukwenu kale ko wa apolofita no kutumina kwa Fumu wetu muyoishi na apiwa ka apositola. ³ Muilimuke eyi tango, ci akwa ku shomolola henge akukeya mumayuwa omahulelelo. Henge a kushomolola no kutwalelela mwifota yo. ⁴ Henge akuamba ci, "Kupishili shi kulupelisho sho kukahuka kukwenji? Kutunda apa nafela atata wetu okukale, enu yoihe inakala mofoci kokukana kupiluka, kutunda ku matatekelo apa yombiwile?" ⁵ Nalivulamisha ka mavomu ci kukale ko liywi lya Nyambi liwilu no kaye ya kalileko kutundelela mu meyu no ko meyu, ⁶ kao litunda nalipishiwa. Kokuminishiwa ko meyu. ⁷ Ko lyo liywi lyofoci mawilu no kaye ana tulekeliwa liyuwa lyo katulo no kwipishiwa kwa anu oku kana kutawa kwa Nyambi. ⁸ Kaloelile ku mipothsomoka, amwe nahima ci liyuwa lyofoci lya FUmu lya pitula ci ita likumi (1000), no myaka thzo ita likumi ya ninga ci liyuwa lyofoci. ⁹ Fumu kakatapisha ekulupelisha yenji, ci eli amweya ana ayala ci yakatapa. Ne honine, ko kutwala atwala enu kulupala mukonda wetu. Kafotile ci yumweya ku kwenu ci afe, unone munu no awane ndau thzo kuhumba. ¹⁰ Henge kengeyo, liyuwa lya Fumu henge lya kukeya ci mwithzi: Mawilu henge akupwa ko muyoyo o ukulu. Enu henge ya kupya ko mulilo, no kaye ne kwama yaka. Henge mwa kukala mukungulu ¹¹ Shaanga ci enu yoihe henge yaku umbululiwa munu kalo okenge, wangu mwa kukala anu ongepi? Mwa loela kukala owa kenu no kuyoya moyo ukenu. ¹² Waloela kutatelela no kuyokololisha liyuwa lyo kukeya kwa Nyambi. Mwelyo liyuwa elyo mawilu henge aku umbululiwa ko mulilo, enu henge ya ku nyongoloka ko kupya. ¹³ Unone, kokuthza ke kulupelisha yenji twa tatelela mawilu no kaye kokape, omu aku kala anu owawa. ¹⁴ Uno honi, awa na hima, mukutatelela enu, mulitanaishe ci muwanahale okupila kapongonyi nawa okukana kushomolo uwa pameho enji, mukuliyala, ¹⁵ kalo mulimuke ci kukatapa kwa Fumu po kuyoyishiwa kwa anu, ci na min'olela mwapetu Paulusi, kuthza ko nyanyami ou napiwa. ¹⁶ Paulusi ona iamba mu man'olo enji oahe, omu ili enu yoikalu kuiyuvishisha. Akwa kukana kufundisha na kwakukana ku kolopa ayipeteka, ci omu ana kwamena man'olo amweya ko kuyonga kwo. ¹⁷ Uno honi, awa nahima, uno inu naiyuvishiwa enu, mu linyunge mwa shinda ci katale muyembaanishiwe ke angela ya anu okupila mulao no kuyawa shitawa kwenu. ¹⁸ Unone mukule no shihemo no mukulimuka. Kwa Fumu Jesu Kilesite. Kutethzima kukale ku kwenji pano tuli no mushikati shokana kupwa. Ameni.