¹ Simoni Pitolosi, mupika no mwa apositola wa Jesu Kilesite, kukwenu amwe mutambula shitawa shoshiwa weci omu tutambwela natwe, shitawa sho kututwala sha Nyambi wetu no muyoishi wetu Jesu Kilesite. ² Shihemo no kuliyala ibule mukulu mu kulimuka Nyambi na Jesu Fumu wetu. ³ Muukolo wenji wouhe, enu yoihe yo moyo nei ya Nyambi inapiwa kukwetu mu ku limuka pyu natwisha mukutethzima kwenji no owa. ⁴ Mwei onatupa ikulupelisho yo shokulu yoiwa, ci namwe mutweshe kuliwana muitongaula yo kumupepo, mukupanduka kuola oku kuli mukaye oku kunaletishiwa maayalo omango. ⁵ Mukonda wei, okwame nawa kuekethza owa ku shitawa shoe, kalo kuuwa woe oekethzeko kulimuka, ⁶ kulimuka oekethzeko kuwa mucima, kukuwa mucima opakeko kulitanalisha, kukulitanalisha opako ya Nyambi, ⁷ kwei ya Nyambi opakepo kuhima aanu, kalo kukuhima aanu opakepo shihemo. ⁸ Ngecipo ei inue i opoikala kukoe no kukukulela, henge imipilisha oba no kumi kwangisha mo kupakela oshuka mu kulimuka Fumu wetu Jesu Kilesite. ⁹ Ambene yomuhe napili ei inuei popohuma mulimuke ci kamono nawa ne honine no kapuputwa, mukuvulama ci nakenishiwa ku shivi shenji sho kunyima. ¹⁰ Ne honine, apange, mukwame yoiwa ci kuishiwa no kuhanguliwa kwenu kumonahale ci kwashemwa, mukonda mukukwama ei enu i, kawa kutanuka. ¹¹ Mweli likun'weli apa okwama hengbeyo, henge opiwa shivaka shoshikulu shemwa sho kukengena mumuvuthso okukana kupwa wa Jesu Kilesite, Fumu no muyoishi wetu. ¹² Nehoni ne inaliloishela ci nimi anukishange ei inue i, shaanga ci mwai limuka, kalo shaanga ci munatanala mushemwa ethzi muli nathzo. ¹³ Shaanga kengeyo, naha ayala ci kuniyoya muno tende, naloela kumianukisha ei inu. ¹⁴ Mukonda nahalimuka ci papano shiye ethzi tende thzange, mukonda Fumu wetu Jesu Kilesite onaini monisha. ¹⁵ Henge nikwama momuhe omu nitweshela kuninga ci munyima thzo lifu lyange ci mutweshe kuakanga ei inu. ¹⁶ Mukonda kakuthzile no ethzimo, yo kukwamiwa no nyanyami, apa tunami limukisha okolo wa Fumu wetu Jesu Kilesite noku keya kwenji, unone neli twalimonena okulu wenji. ¹⁷ Mukonda kuma amupile likute kutethzima kutundelela kwa Nyambi Tata ou lyeile liywi kukwenji kutethzima kushokulu, ci, "Oyu yo mwanange nihima, oyu na katwa." ¹⁸ Yatwe shemwa twaliyuvelile eli liywi ku litunda kuwile kutuli nenji pa mukinya oukenu. ¹⁹ Kalo tuli no liywi lyo shipolofita lyolikolo nene, eli mutwesha kukwama nawa kutwalako mucima, ci lambi ethzi tumonisha mu shivaka sho mashiku, ne honine litungwethzi lyo lilungwe henge limonahala mu micima thzenu. ²⁰ Peulu thzei, waloela ci kwithsa shipolofita sho lin'olo eshi shitunda kwa munu mukutoka kwenji. ²¹ Mukonda kwithsa shipolofita eshi sheile mukihima ko munu, ambene anu kumana amba mukutongweliwa kwa Nyambi no mupepo wo ukenu okuwanekethza.