¹ Saulu watabethele kuthsa chendi. Akuputuka kwa lije litangwa kwa kele kupaketha kwakama muje muchi kungulukilo cha mu Yelusalema; baka kutaba boshe bali shandothokele mumitambela ya lifuti lya Yudea na Samaliya, kutundithako miluwa. ² Baje baka kutaba manene ba thsindile Setefano na kumulingila mbimbi ya kama. ³ Oloje Saulu wethekele kunyongetha chikungulukilo. Cho wa kobelele munjubo, waka koka ngeyeye boshe banalume naba nakathi, cho wabakele mukamenga. ⁴ Oloje baka kukulahela baje bahishandokele baile na kwambulula lijwi. ⁵ Filipu waile kunganda ya Samaliya na kwambulula Kilisitu kuli bakebo. ⁶ Mbunga ya banu ba tolililile bije bye ndekele Filipu; ba muthzibile na mbunge imo, cho bamwene bije bi thibukitho bya lingile. ⁷ Minthzinthzime yaibi ya fumine muli babangi baje ba kele nayo, ya tambekele na lijwi lya kama, cho babangi bakatulepa naba kakutenguka baka ngukile. ⁸ Cho mwakele kujolela kwa kama muje mu nganda. ⁹ Oloni muje munganda mwakele munalume umo wa lithsina lya Simoni, wakele mukakutaha; wakele na kukomwetha banu bamu Samaliya wali mwekethele ikeye babenya kupwa munu wa kulema. ¹⁰ Boshe baka Samaliya, kufuma kuwa mundondo kuya kuwa kama kumanethelela, ba tolililile kuli ikeye; bendekele ngwabo, "Ou munalume ikeye ije nthzili ya Njambi iba thana ngwabo wakama." ¹¹ Ba thibilile kuli ikeye mwafwa waba komowethele a thimbu ya kama mukutaha kwendi. ¹² Oloni omu ba kulahelele Filipu omu mwakele na kwambulula munthzimbu wa ubwa wa numwene bwa Njambi na lithzina lya Yesu Kilisitu, baba mbwitikile, boshe banalume naba nakathzi. ¹³ Nambe Simoni bene wa kulahelele, ha kumanetha ku mumbwitia wa tumbamene na Filipu kwa kujeneka kulyandununa. Omwo wa mwene bithibikitho na bipangi bya kama ebi ba pwile na kulingika, wali komokelele. ¹⁴ Cho omu miluwa mu Yelusalemu bathzibile ngwabo Samaliya na tambula lijwi lya Njambi, baba tuminine Petulu na Yowano. ¹⁵ Omu mubethzile, baba lombelelele, mangana ba tambule munthzinthzime wa kujela. ¹⁶ Haje tekanda, Munthzinthzime Wakujela kanda ushuluke hali ba kebo; baba mbwitikile lika mulithzina lya Shukulu Yesu. ¹⁷ Cho Petulu na Yowano ba Kambekele maboko abo hali bakebo, cho nawa batambwile Munthzinthzime Wakujela. ¹⁸ Cho Simoni omwo wamwene ngwendi Munthzinthzime Wakujela bakele na kuwana kuli miluwa omu bakambekele maboko abo, wabanene bimbongo. ¹⁹ Wendekele ngwendi, "Nange njaneniko ebi binthzili, lalo, linga woshe inji kambeka maboko ange aka tambule Munthzinthzime Wakujela." ²⁰ Oloni Petulu wa mulekele ngwendi, "Nobe bene na bimbongo byobe munyonge hamo, omwo yobe unathinganyeka ngwobe watha kulanda bwana bwa Njambi na bimbongo. ²¹ Yobe kuwethi na mutambela nambe mwela omu mubipangi, mwafwa mbunge yobe kuyethi mwa mubwa kuli Njambi. ²² Ngechi tenguluka utunde omu mubukenya bwobe bwa bubi, ulombe kuli Shukulu, linga hamo a kukonekela ha biyongola byobe bya mumbunge. ²³ Mwafwa ijina mono ngwabge uli na bushungu bwa chipululu na mulenge ya bubi." ²⁴ Simoni wa tabele na kwendeka ngwendi, "Nilombeleleniko kuli Shukulu, linga ebi bi munendeka keti bika lingike kuli yange." ²⁵ Omwo banene bukaleo bwabo na kwambulula muthzimbu wa Shukulu, Petulu na Yowano belukile ku Yelusalema, kwambulula binanda bya bibwa mumembo amangi a baka Samaliya. ²⁶ Cho kangelo wa Shukulu wendekele kuli Filipu ngwendi, "Katuka uye kumbwela ku ngila ije itunda ku Yelusalema iya ku Ngaza." (Eingila yakala mumambo.) ²⁷ Wakatukile cho waile. Taleni, kwakele munalume waku Isopya, kayunuke mukulunu wa bulemu muli Candace, mwene wa munakathzi wa baka Isopya. Wakele mukulunu muka kubyunga bufuko bwendi bwoshe. Wethzile ku Yelusalema na kulemetha. ²⁸ Wakele nakwiluka na tumbama mulitemba lyendi, wakele nakutanda ka polofita Isaya. ²⁹ Munthzinthzime wendekele kuli Filipu ngwendi, "Ya shwenya kuyehi na litemba eli." ³⁰ Cho Filipu wa shatukilile kuli ikeye, wamuthzibile ali na kutanga Isaya ka polofita, cho wendekele ngwendi, "Uli na kuthzibithitha ebi uli na kutanda?" ³¹ Cho ikeye wendekele ngwendi, "Njithzibithitha bati, kubanga umo anji lumbunwine byo?" Cho walombele Filipu kulonda mulitemba linga a tumbame nendi.