¹ Cho mukulunu muka kulombelela wendekele ngwendi, "Ebi byuma binapu bya busunga?" ² Setefano wendekele ngwendi, "Bandolome na batate, njitolilileni yange: Njambi wabumpahu walisholwele kuli tate Abilahama muje mwa kele mu Misopotaniya, omwo te kanda achiye na kukakala ku Halane; ³ wendekele kuli ikeye ngwendi, 'Thethza lifuti lyobe na babushoko bwobe, cho uye ku lifuti lije njikakumwetha. ⁴ "Cho ikeye wathethzele lifuti lya Kalendiya cho waile nakukayoya mu lifuti lya Halani; kufuma haje, hanima ya kuthsa baishe, Njambi wamunenele mu lifuti lije, omwo ukakalamo. ⁵ Cho kanene naumo wahi kupwa wachithemwo kuli ikeye, kwahi, nambe kamo kakulyataho mwanja. Oloni wamukalahethele-nameme Abilahama kakele na mwana-ngwendi akamwana lifuti kupwa lyendi naba tekulwila kutunda ikeye. ⁶ Njambi wendekele kuli ikeye ngwendi, batekulwila baka kala thimbu yaindondo mu lifuti lya bungedzi, nabae babenya lifuti bakabapwitha bandungo na kubayandetha manene hamyaka bita biwana. ⁷ 'Oloni njika thompetha lifuti lije bakapangela,' Njambi wendekele, 'oloni munima ya byuma ebi bakebo bakatunda muje bakaija na kulemetha mutambela uno bene.' ⁸ Cho Njambi wanene Abilahama cilika cha mukanda, cho Abilahama wapwile ishe ya Isaki cho bamutuhwile hanima ya matangwa atanu na atatu; Isaki wapwile ishe ya Yakobo, na Yakobo baishe ya bana likumi nababali. ⁹ ''Mwafwa baje bana ba Yakobo bathzibilile chipululu Yosefa, cho bamulandethele mu Ingito; oloni Njambi wakele nendi ¹⁰ wamuyoyethele mutuyando twendi twoshe. Cho wanene wakutetela na mana Yosefa kumesho ya Falao, mwene wa Ingito, uje wamubwabethele kupwa ngubulu wa Ingito na njobo yendi yoshe. ¹¹ "Cho kwethzile njala yakalombolombo mu Ingito na Kanana, na tuyando twakama, na batate yetu kubathele kuwana bya kulya. ¹² Cho omwo Yakomba wathzibile ngwabo ku Ingito kuli bya kulya, watumine batate habungendzi bwa kulibanga. ¹³ Habungedzi bwa muchibali Yosefa babenya waliombwelele kuli bandolome bendi, na nanga ya Yosefa baitanekeyele kuli Falao. ¹⁴ Yosefa watumine bandolome bendi kwiluka nakukaleketha Yakoba baishe linga beje ku Ingito, hamo na nanga yendi, bapwile makumi atanu na abali na banu batanu boshe. ¹⁵ Cho Yakoba waile ku Ingito, cho wathsile, ikeye na batate. ¹⁶ Babambatele na kubatwala ku Shakeme na kukabaka muchihilo chie Abilahama walandele handando ya siliba ku bana ba Hamo mu Shakeme. ¹⁷ "Omwo thimbu ya kukulehetha yetele, chie kukulehetha cha Njambi wendekele kuli Abilahama, cho banu batumine na kuthemwinina mu Ingito, ¹⁸ kwetele hathimbu ba swanethele mwene mukwabo mu Ingito, mwene uje kakatanekeya Yosefa. ¹⁹ Wakwithile banu betu na kuba kakateya batate yetu linga bombile kuti tukeke twabo linga kethi bayoye. ²⁰ "Hathimbu ije Mosesa wathemuile; wapwile wa mubwa kumesho a Njambi cho bamunyungile munjibo ya baishe ha bingonde bitatu. ²¹ Cho omu bamutuhwile hanja, muna Falao wamunakathzi wa mwasmbatele nakumulela ngwe munendi. ²² Mosesa bamulongethele mana oshe abaka Ingito, cho wapwile wakama mu majwi na mubilinga. ²³ "Oloni hamyaka makumi awana yetile yendi, wathinganyekele mu mbunge yendi kuya nakukamenekela bandolome bendi, batekulwila ba Isilaela. ²⁴ Omwo wamwene ka Isilaela ali nakupangetha, Mosesa wa mwohyelele nakushunya nakuthsiya uje ka Ingito: ²⁵ cho wathinganyekele ngwendi bandolome bendi bathzubuka Njamba cho muliboko lyendi akaba patula, oloni bakebo kuba chithibithithile. ²⁶ Cho lya mukwabo wamwene banalume babali bali nakulwa cho wethekele kuba kanda, wenedekele ngwendi, 'Banalume, munapu bandolome; bikajo muli na kuli bulumwina umo na mukwabo?' ²⁷ "Oloni uje wabulumwine mukwabo wamunakwile, cho wendekele ngwendi, 'Iya nakupwitha mukaka swana na mukaka thompa hakati ketu? ²⁸ Kumani yobe ushaka kunjithsiya, ngwe muje unathsile uje ka Ingito ithau ndi?' ²⁹ Mosesa watewele hanima ya kuthziba awa majwi; cho waka pwile mungendzi mu lifuti lya Mindyani, uje waka kitile bana babali babanalume. ³⁰ "Hanima ya maumi awana a myaka, cho kangelo washolokele kuli ikeye mu mambo ya Munkinda wa Sinai, mu milangi ya tuhya muje mu chiputa. ³¹ Omwo Mosesa wamwene tuhya, walikomokelele ha chuma chije wamwene; omu washwenene muyehi nakutala, cho kwethzile lijwi lya Shukulu, lyendekele ngwabo, ³² 'Yange Njambi yaba kuku yobe, Njambi ya Abilahama, nawa Isaki, nawa Yakobo. 'Mosesa wajajele cho kataleleko nawa. ³³ "Cho Shukulu wendekele kuli ikeye ngwendi, 'Tunditha binkaku byobe kumendi obe, oho ha chela haunemana hanapu halibu lyau kujela. ³⁴ Njinamono kayando kakama mu banu bange mu Ingito; Cho njinathzibi kukekema chabo, cho injinaija hathi nakubamena; cho ija, Njikakutuma ku Ingito.' ³⁵ "Ou Mosesa uje ibabyanene, omwo bendekele ngwabo, 'Iyajo nakupwitha muka kutuyula na mukakusompa?' --ikeye uje batumine kuli Njambi kupwa ngwe mukakuyula na kwobola. Njambi wamutumine na liboko lya kangelo uje washolokele kuli Mosesa muje muchiputa. ³⁶ Cho Mosesa wabafumithile muje mu lifuti lya Ingito, hanima ya kulinga bikomowetha na buthzubukiso mu Ingito na ku Lishali Lyakubenga, na mu mambo a myaka makumi awana. ³⁷ "Ikeye bene Mosesa umolika ou wendeele kuli banu ba Isilaele ngwabo, 'Njambi akangula umo kapolofita hali bandolome bene, kapolofita ngwe yange.' ³⁸ Ou ikeye munalime wakele muchikungulukilo mu mamba na kangelo uje wendekele kuli ikeye ha Mukinda wa Sinai, ou wakele na batate yetu, nauje watambwile binanda byakuyoya na kutwana yetu. ³⁹ "Oloni batate yetu babyanene kumwononokela; ba munakulilile hanja, na mubimbunge byabo belukile ku Ingito. ⁴⁰ Hathimbu ije bendekele kuli Alone ngwabo, 'Tumungile binjambi aba batha kututwamena. Oloni ou Mosesa, ue watutundithile mu lifuti lya Ingito, kututhzibuka bika binalingwa kuli ikeye.' ⁴¹ Cho bamungwile muna ngombe mumatangwa aje na kuneha kupwa nkonkolo kuli kamponya, naku bwahela mwafwa byapwile bipangi bya maboko abo. ⁴² Cho Njambi wabathzethzele lika lyabo cho wabanene kulemetha bingongonothi bya mwilu, ngwe muje babisoneka mumabulu a bapolofita, 'Mwa njanene tuthitu bakubatula na binkombelo ha myaka makumi awana mu mambo, njibo ya Isilaele? ⁴³ Mwa tabethele mbalaka ya Molake na bingongonothi bya chifwa cha bunjambi ya Lefwane, na tumponya tweni tumwa mungile ngweni mukabalemethe: Cho njikamituma kulyala kutubakana Mbambiloni.' ⁴⁴ "Ba tate yetu bakele na mbalaka ya bukaleho mu mambo, muje Njambi wabashiile muje wendekele kuli Mosesa ngwendi, ngwabo abi banga muje bene mwa nabimwene. ⁴⁵ Hanima, batate betu, hathimbu ya Yoshwa, batambwile mbalaka na kuineha kuli bakebo omwo bambatele lifuti. Njambi wambatele libu kufuma ku mafuti cho wabashekelemo aba ba tate yetu. Mbalaka yakele mulifuti palanga nahathimbu ya Ndaviti, ⁴⁶ uje wawanene kutetela ku mesho a Njambi, cho walombele ngwendi awane chela chakutumamamo muje mu njibo ya Njambi wa Yakomba. ⁴⁷ Oloni Solomoni ikeye watungile njibo ya Njambi. ⁴⁸ "Mujebene, uje wakama kekukala mubi njibo bana panga na maboko, ngwe muje wendeele kapolofita, ⁴⁹ 'Lilu lyapwa litanda lyange, cho lalo hathi hapwa bulyatelo bwa lindi lyange. Njibo ya chifwa muka unathe kunjitungila yange? Njambi wendeele, chipwe mutambela mukajo njiaka hwiminamo? ⁵⁰ Kethi maboko ange apangele ebi byuma byoshe?' ⁵¹ "Yeni bakauluwa, mubimbunge na mu matwi, thimbu yoshe mukabyana Munthzinthzime wa ujela; Mukalingi muje balingile bakuku yeni. ⁵² Iya hali bapolofita uje bakuku yeni kuba yandethele? Bathsile bapolofita baje basholokele hakuli banga cha kwija cha Wakujela; cho lalo munapu baka bungungu na baka kuthsiya ikeye nawa, ⁵³ yeni banu mwatambwile mashiko aje tungelo babwabethele, oloni yeni kumwa ononekele." ⁵⁴ Omwo baka mbunga ya thzango bathzibile ebi byuma, ba tenukile mubi mbunge, nakuli shumanga ku mayo abo kuli Setefano. ⁵⁵ Cho ikeye, washulile Munthzinthzime wa Kujela, wakengele mwilu cho wa mwene bumpahu bya Njambi; cho lalo wa mwene Yesu nemana ku liboo lya Njambi. ⁵⁶ Setefano wendekele ngwendi, "Kenga, njinakumona lilu lina shokoloka, cho Muna Munu nemana kuliboko lya chilyo lya Njambi." ⁵⁷ Cho baka mbunga ya thzango balifwiile kumatwi abo, na kutambakana na lijwi lya kukanguka, baile lumbithi kuli ikeye na bithinganyeka bimo. ⁵⁸ Cho bamu pulunyilile hanja ya nganda nakuputuka kumwasha mamanya. Binjiho bathethzele buthalo bwabo ku mendi a munalume wa lithzina lya Saulu. ⁵⁹ Omwo bakele nakumwasha mamanya Setefano, wakele naku tambeka kuli Shukulu nakwendeka ngwedi, "Shukulu Yesu, tambula myonyo wange." ⁶⁰ Wathsikamene na kutambeka na lijwi lya kukanguka ngwendi, "Shukulu, kethi ukabanukile obu bubi hali bakebo." Omwo wamanethele kwendeka ebi, cho wathsile.