¹ kobobo molekee bwa bea, biseemobii bise, bye tusukundu, ne boale ne kuinyekechea kose. ² kwe baana ba keke, mokonde mabee maachi me motema, ne kobobo mopate kokoa ne kooloka kwinu. mobobo mobaka kwiwe iwe. ³ kobobo mwasia kolomba boombe bwa KAKUA. ⁴ bobo, mobake kwewe awe we ie le mwecho, le konewe ne bando inde ne kwa KAKUA ne kwe kenyemu. ⁵ banu oyakae, bye iwe la mwecho moabokiwe bwe ndabo ye motema, mobe bwe bokao be ndabo ya KAKUA basokoka, ne koocha sadaka che motema chitokondewa na KAKUA mobabaa ya YESU KRISTO. ⁷ kwinu baanu basuimenya, awe ne bwaachi bakata, kobobo abo batasi kuimenya, lea iwe lya kona abo bobo lete iwe lekoo lemusingi. ⁸ ne iwe lele letakete bando batondoke; itanda lele letabakete bakee basotondoka kwe bobo batuimenya lea ikomo, inga wapangiwa abo kae. ⁹ banu ni bota lya teuliwa, ukoaniwe boombe bando baama to bando be ikesa ba KAKUA mwabekewa ko lena matendo ma koo ma KAKUA wabaetana kotoka ikunye nabaka mwengwa mwauma too. ¹⁰ ana komboa banu mobee nde bando ila banu mote bando ba KAKUA ona kombaa mobee ne munakonja lokwa bobo mokonja lokwa. ¹¹ banjinane batokondwa, natuikokea, mwasaba bye beni ne bekoeta munjia ana, motokeke mobwabea byelokwo bituchiana. ¹² mobe ne bikete byachi mwingya bando batasi kocheba kokwa, inge batabaoche bwe be koabea sambo, bamoe bikete binu byachi ne baeleleke KAKUA loa lusu lotabake awe. ¹³ muiyikye kwe ajili ya bwana mose mwe boombe base bando: inge ne mwene boombe kwe abongee. ¹⁴ kobobo wasaba ne mokota ukine. ao oso obaeleleka ne kobatuta be loone ne koendoa batoketa byachi. ¹⁵ kobobo ne kokonda kwa KAKUA ite kokoketa byachi muchimwe makomo me bobobo ne mebondo atasi ne lokani. ¹⁶ muchikae lye bando base kobobo mituanye kolekewa ite kuisiyekechia kwe kuketa bwabea bobo muchikae bwe bafakochi ba KAKUA. ¹⁷ motene bando base mokonde bae ne kuimenya kamoleonya KAKUA na motene baame. ¹⁸ banu ba cha muiyilewe ko baume binu baa baibinu bae ne koola ne baachi abo ingaa nane baa bae kinekine ¹⁹ mo bobo ne kwe bwachi ko mondo kuinyekea ko makomo machaba ne kuikombasa kwa KAKUA oleo. ²⁰ na bokee boombe ko mondo kwe kobeka ibae ase ku tutwa ko keta byabea ? kobobo inge osobeka ibae ase ne kosongoka kwe koketa bya mokonji kuimenyewa kabee kwe KAKUA. ²¹ banu mosuitanewa kobobo koetea KRISTO nawe konja mayombe koetea bunu ne kobasiyea we komoeya, momoyee mokabeya kake. ²² awe ndwa keta byabea wa malingo, ndemaeta kokamwa kake. ²³ omobengee awe ndabaotwea nane kaba bengea: okonje mayombe, ndabo tenesa bengea: ukumbatee KAKUA wanga kuukumu mondo byekoe. ²⁴ awe wende byabea byito komote we maakano, kolokoba lwake, bobo tuchie ngoba chito ko bwabea na bobo tuchikae mo bwe sambo, kubiyao bwake banu momoa mwecho. ²⁵ kobobo mobe muchimbea bwe mekoko, kobobo msootoka masange ne mokenge we metema yiinu.