¹ Naniya emphini niyokulwa netitsa tenu, phindze nibone emahhashi,tincola, phindze nebantfu labanengi kunani, kumele ningabesabi; ngoba Simakadze Nkulunkulu wenu unani, loyo lowanikhokha eveni lema Gibhithe. ² Nasenitongena emphini, umphristi kumele asondzele bese uyakhuluma nalabantfu. ³ Kumele atsi kubo, 'Lalelani, Israyeli, niya emphini netitsa tenu. Ningavumeli tinhlitiyo tenu ticuleke. Ningesabi nome netfuke. Ningabesabi. ⁴ Ngoba Simakadze Nkulunkulu wenu nguye lohamba nani ayonilwela kuletitsa tenu phindze anincibise. ⁵ Labaholi kumele bakhulume nalabantfu batsi, 'Nguyiphi indvodza lelapho leyakhe indlu lensha phindze akakayinikeli? Akahambe abuyele endlini yakhe, khona angatokufa lemphini bese lenye indvodza iyayinikela. ⁶ Ukhona yini lohlanyele sivini phindze usengakatfokoteli sitselo saso? Akaye ekhaya, khona angatofela lemphini bese lenye indvodza iyasitfokotela sitselo saso. ⁷ Ndvodza yiphi lelapho letsembise kushada umfati kepha usengakamshadi? Akaye ekhaya khona angatofela lemphini bese lenye indvodza iyamshada.' ⁸ Labaholi kumele bachubeke bakhulume nalabantfu batsi, 'Ndvodza yiphi lelapho lesabekako nome leticulekisa inhlitiyo? Akahambe abuyele endlini yakhe, khona inhlitiyo yemnakabo ingetawuncibilika njengeyakhe inhlitiyo.' ⁹ Nasebacedzile labaholi kukhuluma kulabantfu, kumele babeke tindvuna ngetulu kwabo. ¹⁰ Nanihamba niyohlasela lelidolobha, niketani labantfu litfuba lekuthula. ¹¹ Nangabe bayalimukela lelitfuba phindze banivulele emagede, bonkhe bantfu labatfolakala ngekhatsi kumele babe tisebenti tenu ngenkhani phindze banisebentele. ¹² Kepha nangabe akulenti litfuba lekuthula kini, kepha kwente imphi kini, ngako nitaligegeletela, ¹³ phindze nangabe Simakadze Nkulunkulu wenu aniniketa kuncoba phindze ababeke kutsi baphatfwe ngini, nibulale wonkhe umuntfu kulelidolobha. ¹⁴ Kepha lomfati, labancane, timfuyo, phindze konkhe lokusedolobheni, phindze nako konkhe lokuphatsekako, nitotitsatsela lokumcoka. Nitawusebentisa lolokumcoka kwetitsa tenu, loko Simakadze Nkulunkulu wenu laninike kona. ¹⁵ Kumele nente ngalendlela lena kuya kuwo onkhe emadolobha lakhashane nani, emadolobha langasiwo emadolobha aletive letilandzelako. ¹⁶ Kulamadolobha alabantfu labo Simakadze Nkulunkulu wenu aninika kube yindlalifa, ningashiyi lutfo lokuphefumulako. ¹⁷ Kepha, nikubhubhise ngalokuphelelisiwe: ema Hittite, phindze nema Amorithe, ema Canaanite, ema Perizzite, ema Hivite, phindze nema Jebusite, njengoba Simakadze Nkulunkulu wenu alayetile kini. ¹⁸ Yentani loku khona bangatonifundzisa tento tabo letimbi, njengoba bentile kubo nkulunkulwana babo. Nangabe nenta, nitokona ku Simakadze Nkulunkulu wenu. ¹⁹ Nanigegeletela lelidolobha sikhatsi lesidze, nanihamba niyolwa emphini niyibambe, ningabulali tihlahla talo ngekutijuba ngelizembe. Ningadla kuto, ngako ningatijubi. Ngako sihlahla akusiso umuntfu lekumele nimgegeletele? ²⁰ Kuphela nguletihlahla lenitatiko letingasito tihlahla letidliwako, ningatibulala phindze nitijube; nitowakha sigegeletelo kulelidolobha lelenta imphi nani, lize liwe.