¹ Ningenti umhlatjelo wenkundzi ku Simakadze Nkulunkulu wenu nome invu lengekho kahle noma lenalokubi, ngoba loko kutawunyanyekisa ku Simakadze Nkulunkulu wenu. ² Nangabe kukhona emkhatsisini wenu, losemadolobheni enu Simakadze Nkulunkulu wenu laninika wona, noma nguyiphi indvodza noma umfati lowenta lokubi emehlweni a Simakadze Nkulunkulu wenu phindze angahloniphi sivumelwano, ³ noma ngumuphi losohambile phindze wayokhonta labanye bonkulunkulwana wase uyabakhotsamela, noma lilanga, inyeti, nakokonkhe lokusezulwini-kute lengikulayetele- ⁴ phindze nanitjeliwe ngaloku, noma nivile ngako, ngako kumele nicilonge ngekunaka. Nangabe kuliciniso phindze kungangabati kutsi lokunyanyeka kwenteke e Israyeli, loku ngulokumele nikwente. ⁵ Niletse leyo ndvodza noma umfati, lowente lentfo lembi, emadolobheni enu, yona leyo ndvodza noam umfati, phindze nimgcobe ngematje aze afe. ⁶ Nangabe babili bofakazi, noma batsatfu bofakazi, loyo lokumele afe makabulawe; kepha embikwa munye fakazi akangabulawa. ⁷ Sandla salofakazi kumele sibe sekucala kumubulala, phindze emvakwaloko kube tandla tabobonkhe batfu; phindze kususwe lobubi kini. ⁸ Nangabe kuvuka inkinga lematima kini kutsi niyehlulele-nangabe ngumbuto wekubulala nome kufa lokwenteke ngebungoti, kwelilungelo lamunye phindze lilungelo lalomunye, noma kungaba ngumbuto lonjani longalimata lowentiwe, nome kungaba nguyiphi inkinga , tinkinga tekungavani emadolobheni enu-ngako kumele nenyukele kulendzawo lapho Simakadze Nkulunkulu wenu latayikhetsa kubeka libito lakhe. ⁹ Niye kuba phristi, titukulwane ta Levi, phindze nasemajajini latabe asita kuleso sikhatsi; nitawucela umbono wabo, bese benta sincumo. ¹⁰ Bese nenta ngendlela labatsi yentani ngayo, kulendzawo Simakadze latayikhetsa. Nicaphele kwenta konkhe labanifundzisa kona. ¹¹ Landzelani umtsetfo labanifundzisa wona, bese nenta ngendlela labaninika ngayo tincumo. Ningagucuki eceleni kuloko labanitjela kona, ngesandla sangasekudla nome ngesencele. ¹² Loyo lowenta lokuphambene, kungalaleli umphristi lomele kusebenta phambi kwa Simakadze Nkulunkulu wenu, nome kungalaleli lijaji-loyo muntfu utokufa; notosusa lokubi kuma Israyeli. ¹³ Bonkhe bantfu mabeve phindze besabe, bese abasenti lokuphambene. ¹⁴ Nanifika kulendzawo lapho Simakadze Nkulunkulu wenu aninike yona, phindze nanibusa kuyo phindze nicale kuhlala kuyo, phindze bese nitsi, 'Ngitawubeka inkhosi etikwami, njengatotonkhe tive letidvutane nami,' ¹⁵ ngako empeleni kumele nibeke inkhosi etikwenu loyo Simakadze Nkulunkulu wenu atamkhetsa. Nitawubeka inkhosi etikwenu munye kubomnakenu. Ngeke nibeke sihambi, longasuye umnakenu, abengetulu kwenu. ¹⁶ Kepha akukameli atandzisele emahhashi, nobe ente labantfu babuyele eGhibhithe khona atotandzisela emahhashi, ngoba Simakadze utse kini, 'Kangeke nijike ngaleyandlela futsi.' ¹⁷ Angatitsatseli bafati labanengi, khona inhlitiyo yakhe ingeke igucuke. Akukameli andzise kakhulu lisiliva neligolide. ¹⁸ Nakahlala esihlalweni sebukhosi bakhe, kumele atibhalele yena encwadzini legocotwako umfanekiso walomtsetfo, kulomtsetfo losembikwebaphristi, labama Levi. ¹⁹ Lencwadzi legocotwako kumele ibe kuye, phindze ufundze kuyo onkhe emalanga ekuphila kwakhe, khona atofundza kuhlonipha Simakadze Nkulunkulu wakhe, khona kutogcinwa onkhe emagama alomtsetfo phindze naletimiso, igcinwe. ²⁰ Akwente loku khona angatikhandzi anguloncono kubomnakabo, phindze angetobalekela umtsetfo, ngesandla sangesekudla nome ngesencele, khona atokwadzisa emalanga akhe embusweni wakhe, yena nesitukulwane sakhe emkhatsini wa Israyeli.