¹ Ngocho vene, vamuna nana vaka chidhango change vaye vonja yongola muakama, va kuyolela na nkata yange, yima neni na ndhili muli Kalunga, vaka chidhango change. ² Nji leketha Yondiya, keho nji leketha Sintike, va kale na mana aku lifua muli Kalunga. ³ Chili, nji ku hula ove lalo, mukuetu ua chili, mu ku kuatha vakentu ava vapangele mumo nange mukuilanetha mudhimbu ua chili, kumo na Kelemente na voshe vamo vakuetu veka vaka ku panga, madhina avo voshe ali muMukanda ua Muono. ⁴ Yoleleni muli Muene ntcimbu yoshe. Njika handeka lalo nguange, yoleleni. ⁵ Ngodhi yeni yi yomboloke ku vantu voshe. Kalunga ali mu hyehi. ⁶ Na vimo vyahi mu mina vi mbunge. Vuno, mu vyoshe muku lomba na muku kandelela ha mo na kushangala, tumbuleni vidhango vyeni kuli Kalunga, ⁷ naka kavumbi ka Kalunga, chiye cha tuvakana mangana, oshe chi ka katametha vi mbunge vyeni na vithinganyeka vyeni muli Kilistu Yesu. ⁸ Muku manethela, vamuna nana, nkala vyuma vya vungulu , nkala vyuma vya kathingimiko, nkala vyuma vya kuvuaha, nkala vyuma vili na lutcimo lua chili, nga kuvili vimo vi yongola vya chili, nga ku vili vimo vi uyongola kushangala, thinga nyekeni evi. ⁹ Vyuma ovyo vi mua lilongethele vimua tambuile vi mua vuile vi mua muene muli yange, panga vyuma ovyo, na Kalunga ua kavumbi aka kala muli yeni. ¹⁰ Vuno nji yolela muakama kama muli Muene muomu mualolo muku manethela muna shangumuka na ku njithinganyeka muomu yange. Eni chili mua nji thinganyekele vene ku lutue , vuno komua uanene mo vukovelelo vua kunji kuatha. ¹¹ Keti ngue nji na handeka vimo vinja yeneka. Muomu nja lilongethele muoshe munja kala. ¹² Njina dhivuka vika ku kala vuhutu, njina dhivuka lalo vika ku kala na vya vyingi. Mu nkala ngila na muvyuma vyoshe njina lilongetha mangana aye aku kuta na kukala njala kudhumbangeya na ku yongola. ¹³ Njatha vyoshe muli uye ueku nji koletha. ¹⁴ Ntcimbu yoshe, mua pangele muachili mu ku kala nange mu kayando. ¹⁵ Eni vaFilipu dhivukeni viye mu ku tameka kua mudhimbu uachili, muye munja tundile ku Macendoniya, cha hiko chikungulukilo muvi panga vya kuhana na ku tambula lika lyove. ¹⁶ Nambe muye munja kele kuTesalonika, mua tumine kunjikuatha muomu viyongola vyange vina tuvakana mumo. ¹⁷ Keti nja thetelele vuana. nambe , nja thetelele vushuka vuye vuli vuedhelela ku makongo ove. ¹⁸ Nja tambuile vyoshe vya kushula, nambe vya vyingi. ¹⁹ Njina vi hanene mua chili mualolo viye vinja tambuile kuli Epafonditus vyuma viye vyuna tumu. Vili na kunika mua chili, likumiyo vana litambula na ku lishangala kuli Kalunga. ²⁰ Kalunga kange aka tambula viyongola vyeni vyoshe vyeni kushuama kuvupite vuendi chivovo muli Kilistu Yesu. Mualolo kuli Kalunga ketu na Yishe akale chivovo kache kuhua ku myaka yoshe. Amen. ²¹ Hinduleni vantu va Kuyela va Kalunga muli Kilistu Yesu. Vamuna nana vaye vali nange vana mihinduithila ho. ²² Voshe vantu va Kuyela vaye vali kuno vana mihinduitha ho, ngue vaye voshe vaku njivo ya Cezale. ²³ Chivovo cha Muene Yesu Kilistu chikale cheni cha mpundhi ya kuyela.