¹ Mu ku manetha, va muna nana, yoleleni muli Muene. Muomu ange mu ku thona vyuma vimo lika kuli yeni, ku vi kanjihana vitanga kuli yange na ku mi ohiela. ² Dhangameni kutu tali. Dhangameni kuli vaye vapanga vya kuvihya. Dhangameni muomu vaka kulilovola. ³ Muomu yetu tu na kala vaka kulovoka, va ka kulemetha mu Mpundhi ya Kalunga, na ku lihametha muli Kilistu Yesu, na ku yeneka nadhili mu ntcitu. ⁴ Nambe ngocho, yange vavenya nji ne kuatha kutcelela mu vu tcitu. Nga umo ueka a thinganyeka ku tcelela mu nthitu, njika kala nevi vya vyingi. ⁵ Nja lovokele ha litangua lya mu chitanu na atatu, nja yandethele vantu va Yisaleli, va ku mushovo ua Mbenjami, ka Hevelu ua va Hevelu; ku viye vya ku lishiko , va Faliseo. ⁶ Ngue muomu lya ndhili, nja yandethele mbunga yaku chikungulukilo; ngue muomu kutcelela muintci lya lishiko, ange kova nji muene mulonga. ⁷ Vuno viye vya kele lukulu kuli yange , vikevyo vinja tambuile ngue vya kudhimbala muomu lya Kilistu. ⁸ Chili vene, mualolo njina tanda vyuma vyoshe linga vidhimbale muomu kutuvakana muakama kua ku dhivuka Kilistu Yesu Muene uange. Muomu yikeye nja hanene vyuma vyoshe_ keho nja vitandele ngue vishualukuta_linga nji uane Kilistu ⁹ keho linga va ku uane muli yikeye, ku yeneka ku uana vungulu muli yange vavenya kutunda ku lishiko, vuno ngachiye viye vili ha ku tcelela muli Kilistu_ua vungulu kuli Kalunga uye - nja uanene muli yikeye, keti na vungulu kuli Kalunga ua ku tcelela. ¹⁰ Ngocho mualolo njiyongola kudhivuka yikeye na ndhili ya shituka na kuli kunguiya kua ku yanda linga nji kale ngue yikeye ha kutca kuendi, ¹¹ nga hamo nji heta ku chishitukilo cha kutca. ¹² Keti ngue njili navyo laya vyuma evi, ndi ngue nji na vuaha , vuno nji shatukila kulutue nji ka mone nga njatha kukuata chiye cha na nji kuatele nacho Kilistu Yesu. ¹³ Vamuna nana, konja thinganyekele nguange yange vavenya ngue nja kuata laya. Vuno echi chimo njili na kupanga: Kuivala vika vili kunima na ku yombolola viye vili kulutue, ¹⁴ nji sha tukila kulutue kukumanethela ku chidhangametho cha ku thana kuye kua Kalunga muli Kilistu Yesu. ¹⁵ Ngocho vene etu voshe tuna kulu, tuka leni na vithinganyeka evi; nga mu thinganyeka vyeka, Kalunga aka mi yomboluelacho. ¹⁶ Vuno hoshe, tu kaleni neviye vyo tua uana laya. ¹⁷ Vamuna nana, kaleni vaka kunji temuinitha yange, keho taleni vaye vekuenda ngue yetu tua myethekela cho. ¹⁸ Vavengi venda- vakevo votuna na myambuluila ntcimbu yayingi, keho mualolo nji myambuluila na ku lila- ngue vitodhi va chiti chaku lindakana. ¹⁹ Kuhua kuavo kutca. Muomu Kalunga kavo memo, na vungulu vuavo vuli na shuama. va thinganyeka vyuma vya hantci. ²⁰ Vuno vundambo vuetu vuli muilu, kukekuo lalo tutatela Muovole, MueneYesu Kilistu. ²¹ yikeye aka panga mua muha muvila ua kuvihya kuetu linga uka lifue na muvila ua vungulu vuendi, ngue ku kupanga kuendi atha kuo nonuetha vyuma vyoshe kuli yendi vavenya.