¹ Vamunanana, nga muntu umo vamu uana na panga mulonga, eni vaye vaka mpundhi ya Kalunga mulongetheni ou na ku mu handekela muachili, evi muatha ku vipanga na kuli kehetha. Keho dhangameni, linga keti va myetheke lalo. ² Lyambatetheni umo na mukuavo ku milonga yeni, na ku puithamo lishiko lya Kilistu. ³ Muomu nga umo athinganyeka vimo yikeye ua ngocho, yikeye kakele na vimo vyahi, a likuitha endi vavenya. ⁴ Muntu ku muntu a litale ku vipanga vyendi, nga yikeye atha kuli shangala ha kanda kendi keti hali mukuavo. ⁵ Mukemo muntu kumuntu a kambata vutengi vuendi va venya. ⁶ Muntu uye uva longetha majui na pande ku tepa vyuma vyoshe vya chili a hane kuli uye a li na kumu longetha. ⁷ Keti muli kuithe. Kalunga kuve kumu tcopa, viye vyoshe vya kuna muntu vikevyo vyaka uana mu ku yangulu. ⁸ Kuli uye a kuna mbuto ku nthitu yendi, kuye ku nthitu aka yangula ku vihitha. Uye a kuna mbuto ku Mpundhi, ku Mpundhi aka yangula muono kaue kulenga. ⁹ Keti tu hone mu kupanga vya chili, muomu muye kuntcimbu ya chili tu ka yangula, nga ku tu hono. ¹⁰ Mukemo vene, mu tu uana chikati, tu pangeni vya chili ku vantu voshe, muakama kuli vushoko va kundama ku limbo lya lutcelelo. ¹¹ Taleni vukama vua mathona anji na mi thonekela na livoko lyange vavenya. ¹² Vaye voshe va vayongola kulovoka, ku mivila va yongola kuli shangala ngua vantu va chili. Vavi panga evi muku teua kuyanda ku chiti chaku livindakana cha Yesu. ¹³ Nambe vaye va li lovola vakevo vavenya kunyunga lishiko, vuno va yongola yeni lika mu lovoke linga vali shangale vya ha mivila. ¹⁴ Vuno keti nji kali hamethe ku vanga ha chiti chaku lindakana cha Muene Yesu Kilistu, hali yikeye mavu va a kulika kuli yange nange kuli akeo. ¹⁵ Nambe vulima, nambe kulovoka navimo vyahi, vuno viye vili na konda vya panga kua kuha. ¹⁶ Kuli vaye voshe vekuenda ku shuama ku chetheko echi, chivovo na ngodhi yikale navo, nambe hali va Isaleli va Kalunga. ¹⁷ Kutunda mualolo linga na umo uahi anji hana chishoti, kuli yange njambata vimuetho. ¹⁸ Kavumbi ka Yesu Kilistu ka kale mupundhi, vamuna-nana va vamala. Amen.