¹ Vaka chidhango, uno ukeuo mukanda uamu chivali unjina thono kulyeni, keho mu mikanda yoshe yivali njihindula vithinganyeka vyeni vya chili muku mivulukitha ² Linga mu vuluke majui ova na kuanya laya vapolofeto vakuyela na ku lijui lya lishiko lya Muene uetu na Muovole likelyo li vana hana ku hitila kuli vapostolu veni. ³ Ha kulivanga dhivukeni evi, ngechiye vaka ku shaula vakenja mu matangua aku manuthula. Vaka shaula na ku yengula kushuama ku mashungu avo vavenya. ⁴ Vaka handeka nguavo, ''Kuye kuli litavathano lya kuinja kuendi? Muomu kutunda litangua liye vatata vetu vayile mutulo, vyuma vyoshe vili vene ngue mu vyakele laya, ha kutunda ha kupanga kua chifuti.'' ⁵ Muomu vana chivala kutunda ku laya ku lijui lya Kalunga muilu na hantci vyedhile kutunda ku mema na ku mema, ⁶ kuhitila chifuti chiye ku ntcimbu yiye vachi vihithile, mu kushula na livadhi lya mema. ⁷ Ku lijui liye vene muilu na hantci vana vishuekela tuhya, muku vashueketha litangua lya kupangula, na kutca kua vantu vaka kuyeneka kuitava Kalunga. ⁸ Keti muivale chuma echi chiva muthonena yeni, vaka chidhango, ngechiye litangua limo kuli Muene lina pu ngue likulukadhi lya myaka, na likulukadhi lya myaka ngue litangua limo lika. ⁹ Muene ka kele na malanga kushuama lyuvuathano lyendi, ngue vamo veku handeka nguavo, ali malanga. Nambe, yendi ali na chivovo kulutue lyove. Yikeye kayongola umo ueni aka dhimbale, vuno ngechiye voshe vakenje ku ku tenguluka. ¹⁰ Vuno, na litangua lya Muene likenja ngue muka ku puanja: Lilu lika hita na muthindo ua kama. Na vyuma viliho vika uema na tuhya, keho na mavu na vipanga vaka vyala ho. ¹¹ Ntcimbu vyuma evi vyoshe vaka vivihitha mu ngila eyi, vantu muka eni muka pua? Muka kala na kuyela na kupangela Kalunga muono uoshe. ¹² Muku tatelela na ku livuayethela litangua lyakenja Kalunga. Ha litangua liye, lilu vaka livihitha na tuhya, keho na vyuma vika yengumuka ku tuhya tuakama. ¹³ Vuno kushuama ku lyuvuathano lyendi tutalela lilu lya liha na chifuti cha chiha, kuye kuka kala vungulu. ¹⁴ Ngocho vene, vaka chidhango, ntcimbu muli na ku tatelela vyuma evi, panga muakama linga vami uane chito chahi na kuyeneka mulonga kumesho endi, mu chivovo. ¹⁵ Lalo, thinganyekeni ngechiye kukanyama kua Muene uetu uka kale vuovoke, ngue muana mithonena mukuetu yitua yongola Paulu, kushuama ku mangana aye uva na muhana. ¹⁶ Paulu akuanya mu mikanda yendi yoshe, natu mbuilamo vyuma evi, muli yikeye mu vili vyuma vimo vya vikalu muku vyuvua, evi vaka kudhimbala na vantu kova kolele vali na kuvengetha, ngue muvye kupanga lalo vithoneka, vikuavo muku lihitha kuavo vavenya. ¹⁷ Ngocho vene, vaka chidhango, mu kudhivuka vyuma vyaku laya, litakametheni yeni vavenya linga keti muka uile muvyetheko kuli vaka vishaki vantu vaka kushevuka keho muna dhimbaletha lutcelelo lueni vavenya. ¹⁸ Vuno kuleni na likuto na mana a Muene uetu na Muovole Yesu Kilistu. Linga vungulu vukale kuli yikeye voshe mualolo na ku litangua lya yaye. Amen!