¹ Vapolofeto va vishaki vedhile ku vantu, na valongithi va vishaki vakenja lalo kulyeni. Vakevo vaka neha kulishueketha chaku litepetha cha kutca kuli vakevo, na vakevo ku vyana vene Kalunga uye ua valandele. Vali kokela kutca kua vuathi-vuathi kulyavo vavenya. ² Vavengi vashumangeya vipanga vyavo vya kuvihya, keho vakevo ngila ya kuvuaha yikashauka. ³ Keho omo chipululu vaka haka vutumbe nendi majui aku kuitha. Chihitho chavo chenja laya, na chihitho chavo keti cha ku kotha. ⁴ Muomu nga Kalunga kovuilile tungelo vaye vapangele milonga, vuno ua vombilile ua vahakele muchina cha muthithi, linga vatatelele litangua lya kupangula kuavo, ⁵ keho nga kayandethele chifuti cha laya, vuno uo vuilile Noua ngodhi, hamolika na vaye vatanu na vavali muye vanele livadhi kuli vaka kuyeneka kutava Kalunga. Yikeye muka kuambulula vuchili, muye muanehele livadhi hantci-vaka kushaula Kalunga. ⁶ Kalunga ua puithile membo aSandoma na Ngomola lito na ku vahitha mu kutca ngue na puitha chimuetho kulyava vali na kupanga vya ku shaula Kalunga. ⁷ Vuno uo voluele muka vungulu Lote, uye uo mine mbunge muakama kama omo lya vithinganyeka lya vipanga vya kuvihya vya vantu. ⁸ Muomu uye muka vungulu ua kele hakati kavo ku litangua ku litangua, vamu yandethele mu vungulu vua muono uendi muomu kuli viye vamona na ku tolilila. ⁹ Muene na dhivuka kuovola ku vyetheko vya vaye va mupangela, na ku takametha vaka ku vihya na kayando noho litangua lya kupangula. ¹⁰ Vuno vene ava vekuendela muvu thitu mulishungu lya kuli jualetha vashaula vungulu. Vaka vuheve na vaka vidhango vyavo vavenya, Kuve kuteua ku shaula kua vungulu vumo. ¹¹ Tungelo nambe nga vana tuvakana ku vukama na ndhili, vuno kave ku vahitha vakevo kuli Muene. ¹² Vuno vantu ava, ngue tuthitu kava kele namana, vana vatheme ngue tuthitu vaye veku kuata na kuva tcihya. Vashaula vyuma viye ku vadhivuka, chili vene ku kutca chavo kuke kuo ku kava tcihya. ¹³ Vakatambula fueto yakuvihya vyevi vyova panga vya kuvihya. Vathinganyeka nguavo kuka kala kufuka kuli tangua olyo na kuyolela. Vakevo shuama na kuvihya. Vaka yolela vya vipanga ntcimbu yiye valile chiuano hamo lika neni. ¹⁴ Vali namesho akushula navu kuidhi; keho kavatha kulikela milonga. Vashongangeya vimbunge viye kovya kele, vali nambunge yinedhilila chipululu, vakevo vana pu vana vaku thinga! ¹⁵ Mukutha ngila yachili vadhimbalele, vana shuama ngila yaMbalame muna Mbeole, uye ua yonguele fueto yaku yeneka vungulu. ¹⁶ Vuno uamu vindikile muomu ku viyitha kuendi, chindongi keku kuanya, ua kuanyene na lijui lya vuntu ua vindikile vutha likelyo lijui lya kapolofeto. ¹⁷ Vantu ava vana pu nyondhi yaku yeneka mema na mbundu yaku pupa na mpundhi yakama. Vana va vua yethela ku dhivala kua muthithi. ¹⁸ Muomu mu kukuanya majui angocho aku lishangala ngocho. Vashongangeya mashungu avuthitu, na vipanga vya kuvihya, vaye vane kutameka kuli vaka kushevuka. ¹⁹ Vakevo vana leketha vuana vua chithemua, ntcimbu vakevo vana pu vindungo vya kuvihya. Muomu chiye chana hono muntu chikecho china mupuitha vundungo. ²⁰ Nga vana tameka kumadhilo ahantci muku dhivuka Muene yikeye muovole Yesu Kilistu keho lalo haku manetha kuavo kua kuvihya ku tuvakana, kua laya mua tamekele. ²¹ Muomu ku tuvakana kuvuaha nga kovadhivukile ngila yavuchili na kutha lijui lya lishiko lya kuyela lijui livava kundikile. ²² Chithimo chiye cha vungulu kuli vakevo: ''Katali nahilukila lalo kulyevi vya nashanjele endi vavenya, nangulu uye na tanene na hilukila ku lyalanga muli lombo.