¹ Simoni Petulu, ndungo na kapostolo ua Yesu Kilistu, kuli vaye vana tambula, netu kutcelela kumolika ngue kutua tambuile, kutcelela mu vungulu vua Kalunga ketu na Muovole uetu Yesu Kilistu. ² Chivovo chikale kulyeni muku dhivuka Kalunga na Muene uetu Yesu. ³ Ku ndhili yendi ya ku vuaha, vyuma vyoshe vya muono na vukalunga uoshe vuye vuva tuhanene kuhitila ku mana aKalunga, uye ua tuthanene kuhitila mu likuto lyendi vavenya na lutcimo. ⁴ Muye vene ua tuhana matavathano, endi akumona vuana vua kuvuaha na likuminyo lyakama, linga yove uka tambule mu chifua cha kuvuaha, muna shenduka mu lifuti lya kuvihya liye likelyo lipanga mashungu akuvihya. ⁵ Muomu evi vikevyo, panga muakama muku vuedha ku ku vuahelela ku lutcelelo luove, na ku vuahelela vuedhelelako mana, ⁶ Ku mana vuedheleleniko, kuli takametha yeni vavenya vuedheleleniko ku kanyama kueni, ku kukanyama kueni vuedheleleni ko vukalunga, ⁷ ku vukalunga vuendi vuedheleleniko chidhango cha vunayina, na ku chidhango chavunayina vuedheleleniko kuli yongola. ⁸ Nga vyuma evi vinapu vyeni keho vikula muli yeni, Kovimipuitha vaka vulua nambe vaye kuve kuima vushuka mukudhivuka Muene uetu Yesu Kilistu. ⁹ Vuno oye uoshe ayeneka vyuma evi yikeye kapuputua, nevala vana mutoketha ku milonga yendi ya laya. ¹⁰ Ngocho vene, vamunana, pangeni vyoshe mukupanga kuthana kueni na ku shovola, muomu nga mupanga vyuma evi ko mupunduka na hamo hahi. ¹¹ Mungila yiye vene vaka mihane muakama ku kovela mu vuMuene vuye kuvue kuhua vua Muene uetu yikeye Muovole uetu Yesu Kilistu. ¹² Ngocho vene ange njika kala na ku tatelela mu kumi vulukitha yeni ku vyuma evi, nambe mo muna vidhivuka, nambe muli na ndhili na vuchili muli navuo. ¹³ Njina thinganyeka muachili yange, ntcimbu yinjili mu mbalaka, yiminangula-na kumi vuluitha. ¹⁴ Muomu njidhivuka ngachiye mu kutunda mu mbalaka ya vungendhi vua vuathi-vuathi, muomu Muene uetu Yesu Kilistu na yombolola evi kulyange. ¹⁵ Njika panga ku ndhili yoshe kuli hangunuka ntcimbu yoshe kulutue lua kutca kuange ntcimbu yoshe mu ku thinganyeka vyuma evi. ¹⁶ Muomu kotua shuamene kudhangamena kua vithimo vyo vatele muye mova pangele muku mileketha kua ndhili na kuinja kua Muene uetu Yesu Kilistu, vuno tuakele dhimbangi vya kumona na mesho etu vungulu vuendi. ¹⁷ Muomu yikeye ua tambuile kathingimiko na vungulu vua Kalunga Tata muye lijui vali nehele kuli yikeye ku vungulu vua likuto, ua kuanyene nguendi, ''Ou yikeye Munange yinja yongola, yikeye ua njiya ku mbunge.'' ¹⁸ Netu vavenya tuo vuile lijui eli lya tundile muilu, motua kele nendi kumukinya ua kuyela. ¹⁹ Muomu tuli na lijui lya vupolofeto livana koletha muakama, likelyo lipanga mu ku tolilila ko ngue muna yinjui lyakutoka kumuhela ua muthithi noho litangua na ntanga-ntanga ya chimene-mene yi yomboloka mu mbunge yeni. ²⁰ Ku vyoshe evi, dhivukeni echi, ngechiye vuahiko vupolofeto vua ku vithoneka vulanguluka ku chidhango chaumo. ²¹ Muomu vupolofeto na vumo vuahi vuedhile ku chidhango cha muntu, vuno vantu vakuanyene vya Kalunga omo Mpundhi Yakuyela yava pangethele.