¹ Vaye voshe va na kala vangamba va ku vundungo va yongole vimuene vyavo ngue vakathingimiko koshe muakama. Vana vuahela kupanga linga lidhina lya Kalunga na vilongetha keti vika yeneke kathingimiko. ² Keho vaye va li kutcelela muene keti vamuethe kuyeneka kathingimiko muomu vamunayina. Nambe, va pangele na liyango lya kama. Muomu voshe vaye vatambula viuanamo vya kutcelela na chidhango. Longetheni na ku yongola vyuma evi. ³ Nga umo alongetha lishiko lya vishaki na ku yeneka kutava majui avungulu aMuene uetu Yesu Kilistu na ku vilongetha vya Kalunga, ⁴ Yikeye nali kametha ngocho. Kadhivuka na kamo kahi vuno na dhalukila vinkanda vya kuhandeka na vimpata vya majui, vikevyo vye ku neha kuli veya, muyoyo, kushaula, navi thinganyeka vya kuvihya, ⁵ na kukandula vimpata ku vantu vaka kuvihya ku vi thinganyeka vyavo na vuchili ka va kele navuo vakevo va yongola nguavo kulemetha Kalunga kukekuo kunganyala. ⁶ Vuno kulemetha Kalunga kuna kala nganyo yakama, ⁷ muomu na chimo chahi tuedhile nako hano hantci, na chimo chahi tuka hiluka lalo. ⁸ Vuno omo tuli na vya kulya na madhalo, nevi vene tuka tumama na vyo. ⁹ Vuno vaye va yongola kufuka va uila mu vyetheko, na mu nganjo. Va ka uila muma shungu a mengi avu heve na ku vihya, ngechiye akeo eku dhivilitha vantu mu ku vetheka na mu ku tca. ¹⁰ Muomu chidhango cha vimbongo chikecho mudhi ua mulonga ueka na ueka. Vamo mu ku vishuama va na tenguluka mu ku tcelela keho va na lituvhu na vuthiua vua vuingi. ¹¹ Vuno ove, muntu ua Kalunga, teua vyuma evi. Keho shuamangeya vungulu, kulemetha Kalunga, kutcelela, chidhango, lukakateya na ku likehetha. ¹² Lua ndhita yiye ya ku tcelela kuata ku muono uye ka ue kuhua, ku kekuo ku va kuthanenene kukekuo vene ua li tavelele mu ku litavela mua chili kumesho ava kaleho vavengi. ¹³ Nji kulongetha ku mesho aKalunga, uye ahana muono kuvyuma vyoshe, na ku mesho a Kilistu Yesu, uye ua litavelele ku mesho aPontu pilatu, ¹⁴ ngechiye uka nyunga lijui lya lishiko na katoma kahi na ha kumushauila hahi, noho aka yomboloka Muene uetu Yesu Kilistu. ¹⁵ Kalunga aka yomboloka chikecho ku vi ntcimbu Kilistu yikeye aka yomboloka, yikeye uye umo lika muka kuhinga ua ku shangala, na Shuku uye atumina na Muene uye apangela, ¹⁶ yakeye lika kakele na kutca, atumama mu cheke ka chi tava ku shuena ko, yakeye na muntu na umo uahi na mumono. Kuli yakeye kukale kathingimiko na vukama vua myaka ya yaye. Ame. ¹⁷ Shika vaye vana fuku ku ntcimbu ya mualolo keti va tcelela vufuko vuye vue kutca. Nambe, vatcelele muli Kalunga. Yakeye ue ku tu hana mu ku fuka vyuma vyoshe mu ku vuaha. ¹⁸ Ngechiye lalo va pange mua ngodhi ngechiye va fuke na vipanga vya ku vuaha, ngechiye va kale na mbunge ya ku pangela vyavo, na chidhango cha ku hana. ¹⁹ Ngechiye va ka lihakela vavenya luvula lua ku vuaha lua ku ntcimbu yikenja ko, linga va kuate muono uye una kala muono ua vungulu. ²⁰ Timoteo, takametha viye vi va na kuhana, na ku teua vihandeka vya ngocho na kuvyana kua mana aye avishaki, ²¹ vakevo vamala vamo mu ku litumbuila vyo va nayi laya mu kutcelela. Kavumbi ka kale neni.