¹ Vuno vya vintcimbu na myaka, vamunanana, kunja yonguele viye vimo vana thono kuli yeni. ² Muomu yeni vavenya mudhivuka vu chili ngachiye litangua lya Muene likenja ngue muka kupuanja kuma tciki. ³ Muye muva kuanya nguavo, '' Chivovo na kuovola,'' keho ku viyitha kua mulonga ku kenja kuli vakevo. Vika kala ngue mukentu uye ali na mivila yivali ovua ku vavala muku thema. Ko ku ka kala kushevuka. ⁴ Vuno yeni, vamunanana, ku muakele ku muthithi ngachiye litangua olyo lika mi uana ngue muka kupuanja. ⁵ Muomu muva voshe mu vana va cheke na vana va mutanya. Keti vana vama tciki ndi vamu muthithi. ⁶ Ngocho keho, linga keti tukothe tulo ngue voshe ve kupanga. Nambe, tukale mu ku vingila na ku yeneka kupenda. ⁷ Muomu kuli voshe vaye vakotha vapanga ngocho vya matciki, na vaye voshe va penda vapanga ngocho ku matciki. ⁸ Vuno etu tuva ka mutanya, keti tupende tu dhaleni ntelo ya kuntulo na ku tcelela neyi ya chidhango na lutcelelo lua vuovoke. ⁹ Muomu Kalunga katu hanguilile kuvu kalu, vuno mu ku tambula vuovoke muli Muene uetu Yesu Kilistu, ¹⁰ Uye ua tcile muomu lyetu, nambe tuna shuka ndi tu kotha tulo, tukovoke hamo lika nendi. ¹¹ Ngocho vene likoletheni umo na mukuavo, ngue muna vipanga laya. ¹² Vuno tumi kandelela, vamunanana, ku dhivukitha vaye vafuitangana ha kati keni na vaye va mishika muli Muene na vaye veku mimamuna, ¹³ Na ku yongola vakama kama na chidhango omo vipanga vyavo. Kaleni na chivovo hakati keni. ¹⁴ Yetu tumi mamuna, vamunanana: nanguleni vaye kuve kuenda mua chili, thimpitha vaka vuyeye, ku koletha vaka kudheya, na kuononoka ku voshe. ¹⁵ Taleni ngechiye naumo uahi ahiluithe kuli mukuavo ku mulonga na mulonga, vuno shuamangeyeni ntcimbu yoshe viye vya vingulu, umo na mukuavo na kuli voshe vene. ¹⁶ Yoleleni ntcimbu yoshe. ¹⁷ Kuvyoshe hana kushangala. ¹⁸ Muomu echi chikecho chidhango cha Kalunga muli Kilistu Yesu muomu yeni. ¹⁹ Keti mudhime mpundhi Yakuyela. ²⁰ Keti muyengule vya vupolofeto. ²¹ Ethekeni vyuma vyoshe. Kuateleleni viye vya vingulu. ²² Likeleni kupanga vyoshe vyaku vihya. ²³ Linga Kalunga ua chivovo ami tokethe yeni mua ku shulilila, linga mpundhi yove yoshe, na muvila ukale ua kushula noho ha kedhila Muene uetu Yesu Kilistu. ²⁴ Muka ku tcelela uye umo a mithana yeni, naumo uye lalo a vipanga. ²⁵ Vamunanana, lombeni netu lalo, ²⁶ Hinduitheni vamunanana na kutcemba kua kuyela. ²⁷ Njimi kunkula muli Muene linga mukanda ou vau tandele vamunanana voshe. ²⁸ Chivovo cha Muene uetu Yesu Kilistu chikale neni.