¹ Muku manuthula, munanana ua lyala, tumi lombelela na ku mimamuna muli Muene Yesu. Ngue yeni muna tambuile vilongetha kuli yetu vya vati muenda na ku toketha Kalunga, lalo mungila yiye vene muenda, linga yeni mupange ngocho nambe mua muingi. ² Muomu yeni muna dhivuka vika vilongetha vika vi tua mihanene ku hitila muli Muene Yesu. ³ Muomu eli liyango lya Kalunga, kuyela kueni, kuye kumi dhilitha muku panga vukuidhi, ⁴ linga yeni voshe mu dhivuke ku kala na vakentu veni mu ku yela na ka thingimiko. ⁵ keti na ku theta kua lishungu, ngue vaka Vifuti vaye va tca ku va dhivuka Kalunga. ⁶ Linga muntu apanga mulonga na ku viyithila va munayina ua lyala ku vyuma evi. Muomu Muene yikeye muka kulingula vyuma evi, ngue yetu tua minanguile laya na kuambulula vene. ⁷ Muomu Kalunga katu thanene vaka kuyeneka kuyela, vuno vaka kuyela. ⁸ Muye vene, uye avyana kavyana muntu, vuno Kalunga, uye ahana Mpundhi yendi Yakuyela kuli yeni. ⁹ Vuno vamuna nana va chidhango, kuvya mifuililile umo ami thonena vyo, muomu yeni vavenya vana longetha Kalunga muku yongola umo na mukuavo. ¹⁰ Muomu chili vene mu vipanga na voshe vamuna nana vaye vali mu Masendoniya yoshe. ¹¹ Yetu lalo tumi lombela mu ku mithetela kuetheka ku holoka, na ku panga na mavoko eni, ngue mu tua mishikile, ¹² Linga muende mua chili kumesho avaye vali hanja keho ku mu ka yeneka nachimo chahi. ¹³ Vuno kotua yonguele kumileketha, vamuna nana, vya kuli voshe vaye vana kotha, linga keti muvue vuthiua, ngue vaye kuva kele na ku tcelela. ¹⁴ Muomu nga tuna tcelela nguetu Yesu ua tcile na ku shituka lalo, nambe vene Kalunga aka neha Yesu kuli vaye vana kotha mutulo muli yikeye. ¹⁵ Muomu evi tu kuanya kuli yeni vya mathona aMuene, yetu vaye tuli na muono, vaye vana thile ku kuinja kua Muene, na hamo hahi tuka honena kulutue lya vaye vana kotha tulo. ¹⁶ Muomu Muene lyavenya aka tunda muilu. Akenja na mutambi ua kama, na lijui lya kangelu ua kama na mbendo ya Kalunga, na vatci muli Kilistu vaka shituka mbangelo. ¹⁷ Keho yetu vaye tuli na muono va thile, tuva voshe va ka tuambata hamo navo muma shelua keho tuka liuana na Muene mu mpundhi. Keho tuka kala na Muene ntcimbu yoshe. ¹⁸ Ngocho vene, likoletheni umo na mukuavo na mathona ano.