¹ Bakhumbute kutsi batfobele babusi netiphatsimandla, babalalele, balungele wonkhe umsebenti lolungile, ² kubete lokhuluma kabi ngalomunye, bangabi tilwi, babeketele, bakhombise buntfu kuwonkhe muntfu. ³ Ngoba natsi matfupha sake saba tilima futsi singalaleli. Besidukisiwe futsi sitigcili tetinkhanuko letehlukene letijabulisa tsine. Besiphila ebubini nasemoneni. Besitodzekile futsi sizondana sodvwa. ⁴ Kepha uma lokulunga kwaNkulunkulu uMsindzisi wetfu nelutsandvo lwakhe lolubonakaliswe kubantfu, ⁵ kwakungasiko ngemisebenti yekulunga lesayenta ,kepha ngemusa wakhe lowasisindzisa, ngekuhlantwa kwekutalwa kabusha nekuvusetelwa ngaMoya Longcwele, ⁶ lowatselwa tikwetfu nguNkulunkulu ngalokucicimako ngaJesu Khristu Umsindzisi, ⁷ khona ngemusa wakhe asente semukeleke, singaba tindlalifa sibe nelitsemba lemphilo yaphakadze. ⁸ Lomlayeto utsembekile. Ngifuna wena ugcizelele letintfo leti, khona labo labakholelwe kuNkulunkulu batsakasele kutimbandzakanya emisebentini lemihle. Letintfo leti tinhle futsi timcoka kwanome ngangubani. ⁹ Kepha gwemani kuphikisana lokubulima nekucabana ngemtsetfo. Letintfo leto atisitani futsi tilite. ¹⁰ Nibomkhweshela umuntfu lobanga kwehlukana emkhatsini wenu, emva kwetecwayiso letimbili noma sinye, ¹¹ wati kutsi bantfu labanjalo bagucukile etindleleni letikahle futsi wonile futsi utehlulele yena. ¹² Nase ngitfumele Athemasi noma Thikhikhusi lapho, phangisani nibuye kimi eNikhopholisi, lapho lasengincume kucitsa khona busika. ¹³ Yentani konkhe leningakwenta kutfumela Zenasi ummeli endleleni na Apolosi, kuze bangaswela lutfo. ¹⁴ Bantfu betfu kumele bafundze kutimbandzakanya emisebentini lemihle kuze banike lusito loluphutfumako, futsi bangabi ngulabangatseli titselo. ¹⁵ Bayakuvusela bonkhe laba labanami. Bingelela labo labasitsandza ngekukholwa. Umusa awube kini nonkhe.