¹ Jesu wase ubitela ndzawonye bafundzi bakhe labalishumi nakubili, wabanika emandla etukwemimoya lemibi, ekutsi bayikhiphe, newekuphilisa tifo tonkhe nekugula konkhe. ² Nankha emabito ebaPostoli lebebalishumi nakubili. Wekucala ngu Simoni(lotsiwa ngu Phetro), nemnakabo Andreya; Jakobe nemnakabo longuJohane, emadvodzana aZebedi; ³ Philiphu naBhatalomewu; Thomasi naMatewu umtselisi; Jakobe, umsa waAlfiyose, naThadiyose; ⁴ Simoni wephathi yemakhenana, naJudasi Skariyothi lowatsengisa Jesu. ⁵ Jesu wawatfuma lamadvodza labelidhumi nakubili wawayala watsi, ''Ningangeni eveni lebetive nasemitini yemasamariya. ⁶ Esikhundleni saloko hambani niyewufuna timvu letilahlekile letisive semaIsrayeli. ⁷ Hambani nishumayele nitsi, '' Umbuso welizulu sewusondzele.'' ⁸ Philisani labagulako, nivuse labafile, niphilise emalephelo, nikhiphe emadimoni. Nemukeliswe ngesihle, ngako ke nani phanani ngesihle. ⁹ Ningaliphatsi ligolide, nesiliva, nesenti emakhikhini enu. ¹⁰ Ningaphatsi ngisho nemgodla wendlela, nemabhantji lamanye, neticatfulo, nentfonga, ngobe sisebenti sifanelwe kudla kwaso. ¹¹ Naningena edolobheni nobe emtini, nibofuna umuntfu lotimisele kunemukela bese nihlala naye nize nihambe. ¹² Naningena kuloyo muti nibobabingelela. ¹³ Nangabe bantfu balowo muti banemukela, shiyani sibusiso senu sekuthula sihlale khona. Kodvwa nangabe abanemukeli, sitsatseni sibusiso senu sibuyele kini. ¹⁴ Kantsi futsi nangabe anemukelwa, nelivi lenu lingalalelwa, nibotsi naniphuma kulelo dolobha nome umuti, nitsintsite lutfuli lwetinyawo tenu. ¹⁵ Ngicinisile ngitsi kini, kuyawuba ncono eveni laseSodoma nelaseGomora ngelilanga lekwehlulela kunakulowo muti. ¹⁶ "Bukani, Nginitfuma njengetimvu emkhatsini wetimphisi, ngako ke hlakaniphani njengetinyoka, nibete bucili njengematuba. ¹⁷ Nicaphele bantfu! Bayawunibopha banifake etinkantolo, banibhambabule emasinagogini abo. ¹⁸ Niyawumiswa embikwababusi nemakhosi ngelibito lami, kuze kube bufakazi kubo nakubetive. ¹⁹ Kepha nabanimangalele, ningahlupheki ngekutsi niyawutsini nekutsi nikusho njani ngobe nakufika leso sikhatsi, niyawunikwa lenifanele nikusho. ²⁰ Ngobe akusini leniyawukulum, kepha ngmoya weYihlo wasezulwini loyawukhuluma ngani. ²¹ Umuntfu uyawunikela umnakabo ekufeni, neyise umntfwanakhe. Bantfwana bayawuvukela batali babo babanikele ekufeni. ²² Niyawutondvwa bantfu bonkhe ngenca yelibito lami. Kodvwa lokhutsatelako kuze kubesekupheleni, uyawusindziswa. ²³ Nabanitingela kulelinye lidolobha , nibobalekela kulelinye, ngobe ngicinisile ngitsi kini, ningeke niwacedze onkhe emadolobha aka-Israyeli, iNdvodzana yemuntfu ingakabuyi. ²⁴ Kute umfundzi lomkhulu kunemfundzisi wakhe, futsi kute nenceku lengetulu kwenkhosi yayo. ²⁵ Ngako ke umfundzi kufanele eneliswe kutsi ufanana nemfundzisi wakhe, nenceku kufanele yeneliswe kutsi ifanana nenkhosi yayo. Nangabe inhloko yemuti kwatsiwa nguBhelzebule, emalunga alowo muti ayawubitwa ngemagama lamabi kakhulu! ²⁶ Ngako ke ningabesabi, ngobe kute lokumbonyiwe lokungayikwembulwa, nalokufihlakele lokungayikwatiwa. ²⁷ Loku lenginitjela kona lapha ekusitsekeni kukhulumeni ebaleni, naloku lenikuva etindlebeni kumemeteleni yonkhe indzawo. ²⁸ Ningesabi lababulala umtimba kodvwa babe bangeke bawubulale umphefumulo. Lokungenani, mesabeni yena lokwati kubulala umtimba nemphefumulo kokubili esihogweni. ²⁹ Abatsengiswa yini boncedze lababili ngasenti? Noko kute nome munye longawa phansi afe ngaphandle kwemvumo yeYihlo. ³⁰ Kodvwa kini babalwe ngisho netinwele tonkhe tenhloko yenu. ³¹ Ningesabi. Nibaluleke kakhulu kunaboncedze labanyenti. ³² Ngako ke wonkhe loyawungivuma phambi kwebantfu, nami ngiyawumuvuma phambi kwaBabe losezulwini. ³³ Kodvwa lowo longiphika phambi kwebantfu, nami ngiyawubaphika phambikwaBabe losezulwini. ³⁴ ''Ningacabangi kutsi ngitele kuletsa kuthula emhlabeni. Angiketeli kuletsa kuthula kepha inkemba. ³⁵ Ngitele kuphambanisa indvodzana neyise, indvodzakati nenina, malukatane neninatala. ³⁶ Titsa letinkhulu temuntfu kuyawuba takabo. ³⁷ Lotsandza uyise nome unina kwengca mine, akangifaneli; nalotsandza indvodzana yakhekwengca mine, akangifaneli. ³⁸ Longetjasi siphambano sakhe angilandzele, akangifaneli. ³⁹ Lofuna kutfola imphilo yakhe, uyawulahlekelwa ngiyo; nalolahlekelwa imphilo yakhe ngenca yami, uyakuyitfola. ⁴⁰ Lonemukelako wemukela mine, nalowemukela mine wemukela longitfumile. ⁴¹ Lowemukela umprofethi ngobe angumphrofethi, uyakutfola umvuzo wemprofethi, nalomukela lolungilengobe angulolungile, uyawemukela umvuzo walolungile. ⁴² Ngulowo nalowo loawunatsisa abe munye kulaba labancane nome yinye nje inkomishi yemanti, ngobe angumfundzisi wami, ngicinisile ngitsi kini, ngeke alahlekelwe ngumvuzo wakhe.''