Kotew Paulus Ye Ke Tolu Te KOrintus ¹ Ihe ye ke tolu kalin ye ab sulet tong ko. harus naan keterangan ke due atawa tolu saksi, jape nget pekara na ulek sah. ² Semale ye, ab apu nagur dali ye ngene dosa ali kawus ye bali ye. Nehe, bele ab sa sendro ko, ab nagur dali nget ye ab ene suang penyulet ab ye kedue, ye iro aka ab sulet eso, ab sa sagar ketasi dali, ³ leka ko nuntut bukti nget Kristus, ye bepander te suang ko ali ye sa lome terhadap ko, petendre kuasa te suang ko. ⁴ Se bene ye, Kristus ye na salib suang ke lome ye, et leka iro da bolum leka kuasa Allah. Sebab, kain ade lome te suang Da, et kain sagar bolum sendro ali Da leka kuasa Allah terhadap ko. ⁵ Uji unuk ko gegales dian kite, se ko tatap te suang iman ko. Periksa unuk ko gegales! atawa se ko sa ketaru unuk ko gegales nget Kristus Yesus naan te suang ko je aka ko gagal te suang ujian. ⁶ Ab beharap ko sagar ketoan nget kain sa lah ulun ye sa tahan uji. ⁷ Namun, kain bedoa tong Allah dian ko sa ngene kesala, sa dian kain na teneng tahan uji, et dian ko ngene se ye bujur bene bele na ite kain apu gagal ujian. ⁸ Kain sa mahan ngene kawan hal ye belawenan ali kebenean, kain harus ngunau ye bene. ⁹ Kain sanang kede kain lome ali ko ye gagah. Doa kain ye lei dian ko jaji sempurna. ¹⁰ Iro leka ye, ab nyurat kawan hal iro kede ab aro ke ko dian kede ab sulet, ab sa perlu batindak ali tamam kuasa ye Tuhan akoi tong ab dian ngebangun, ali sa dian peruntuh perusak ko. ¹¹ Pengawus ye, kawan erai butung, buen taka ego. Nelang beusaha dian tau jaji sempurna, hibur erai ali ye bali, erai ate suang, ali bolu suang damai ali Allah runa asi ali damai sejahtera sagar nyendro ko. ¹² Okoi lei tabe erai ali ye bali ali kasih ye kudus. ¹³ Kawus kawan ulun ngirim tabe dian ko. (13-14). Anugerah Tuhan Yesus Kristus, ali kasih Allah ali persekutuan ke Roh Kudus nyendro ko kawus.