¹ Kamukwa owo ko mutwethe kukuyaya,oyu munu,oyu wa tula,kakuli apa watula ehi yatenda mukoye yo nyiko kame eili okoye. Owe omukwa kwatula nawe onyiko yo tenda inu no ku kufeka. ² Kono twa limuka ngao o katulo tha Mulimu tha niti apa thingwela kwa ako kutenda eyi inu no ngeya. ³ Kono okengele esi,owe munu,watula ao atenda eyi inu owe ambu nawe kame yonyiko otendanga. Washimba nga mo banduka ku katulo tha Mulimu? ⁴ Kamba wa kengela mu ku nyenyafatha sifumu sa sishemo saye,oku liyehitha twaye o koto,na mucima waku kana kulwana wangu? Kana wa limuka ngao sishemo saye sa talusa ku kuleta ku ku baka? ⁵ Kanti etho mikaelo ethanu no kuku tatafatha kukana kuyuba na ku kana kutweneka uyi kwa micima thenu mwa kubulukela buhali muliywa lya kulwana kwa Mulimu,ili ngao,liywa no kupatuluha kwa katulo no kuluka kwa Mulimu. ⁶ Mwapa munu na munu kutha muitenda yaye; ⁷ Kwaya kutha muko ongotha kutenda misebethi thiwa ana saela kanya,likute,na ku kana kuola,mwa apa muoyo no kuyoya kutha kuhiile. ⁸ Kono kwaya apakela mangana no ku saela yoo ambu,awo a kana ku kuteka niti kono ayuba ehii no unyangunyu,uhali na kulwana kwa kwi yapisa mo ku wiya. ⁹ Mulimu mwa leta ukalu na kuyuba kukola ku munu oshe oyu otenda uyi,ku tateka na ma Juda,na kutwala ku Magerike. ¹⁰ Kono kanya,likute,na kotho mo ziwiya kwa munu oshe otenda yiwa,kutateka na Majuda,na ku Magerike. ¹¹ Kakuli njeko ketululo kwa Mulimu. ¹² Apa kuli ngao angi ana foso oku na ku limuka mulao nje mwa fa oku nombula mulao,angi ana foso a limuka mulao mba atuliwa na mulao. ¹³ Kaaya a yuba mulao ali no kuluka kwa Mulimu,kono aya atenda mulao onyiko apiluka no kuluka. ¹⁴ Kakuli aya malicaba,no mbula mulao,atenda inu ya mulao bene ku tundela mu pupo,ngeyo a kwite mulao mukaci koo,shango ka kwite mulao wa ku limukiwa. ¹⁵ Keo ngeya kwa monisa ngao musebethi ethe thi tokwahala kwa mulao thina ñoliwa mu micima thoo. Omaikuto ohoo apaka ngeyo,kame o mihupulo tho tha angetha kapa tha imanena. ¹⁶ na kwa Mulimu ngeyo,Eso mositeendahala mu lywa elyo Mulimu mwa atula o makunutu no anu oshe kutha mu evangeli thange, na Jesu Kereste. ¹⁷ Kono haiba wa kuisana ngao wo Mujuda na kwamba ngao wa kutinga pa mulao na ku kutumba ku Mulimu. ¹⁸ na ku limuka o tato na kumonisa o wuwa waye kakuli ona lutiwa kutundela mu mulao; ¹⁹ Kame haiba ona kukolwisisa wo mweteteleli wa sibofu, o liseli kwaya ali mu simbwi, ²⁰ omunangisi wa wanganu, omuluti wa anikana, kame wa kwata thibo na sikuma no mulao,owu muikaelo wa leta ngepi omu mo yoyela mu mooyo waye? ²¹ Owe omukwa kunanga a koye, kuku nanganga owe mute? Owe mukwa ku kutatha ngao kanaitha,owe eni wa ithanga? ²² Owe wa amba ngao kona buka,owe ni wa bukanga? Owe mukwa kuthimba ya ku lapela maswanisa,kana waithanga ehii no mutempele? ²³ Owe mukwa ku kutathaetha ya mulao,wa shwaulanga Mulimu mu ku kana ku kuteka mulao? ²⁴ yo nyiko ''omo lithina lya Mulimu li li na kukana ku kutekiwa mukaci ka malicaba bakeñisa owe,'' wetini omo ku na ñolelwe. ²⁵ Kakuli mukande wa tusa endi wa kuteka mulao,kono endi o muoli no mulao,o mukande woye wapiluka endi ka mukande kao. ²⁶ Endi,ngeno woya munu no shimwa kutha ku mukande wa kubuluka mulao,ku kana kutha kwaye ku mukande kushimwa ku shimbiwa shinani mukande? ²⁷ Oye mukwa ku kena kutha ku mukande kutha omwa na mwelekele mwa kunyatha oye oshi koñela ambu mulao? Kakuli owe wo kwite mulao no kuñoliwa na mukande,kono o mukwa kucola mulao! ²⁸ Kakuli o saniwa ngao Mujuda koya o mo nahala panthe no lutu. ²⁹ Kono Mujuda oya oli mukaci kalutu, na mukande o toyiwa ou no muama, na mu mepo,isiñi pa liñolo. Kulumbiwa koyu munu ko ku tindela kwa anu kao kono kwa Mulimu.