¹ Thino nako otwe tu kwite o maata tu shimbe o sibaka a kana ku kwata o maata, keo tuswanela ku ku wapelisa ambu otwe to foti kao. ² Tu mone ngao munu na munu a wapelise oyu ekala naye kunyonga mu inu iwa, mu ku mu nenepisa. ³ Shiwango Jesu no shemwa ku ku wapeisanga ambu yo foti. Shiwango ngeyo, mo no ku n'oliwa ngao, "O matuka no aa na kutukana mo na ngwela opange." ⁴ Kwei yoshe no in'oliwa ku manyima mo no in'oliwa otwe ngao tu ikon'eele mu ku ku keta na ku susuetho no ikututiwa ngo tu kwate sepo. ⁵ Thino nako na nyepa Mulimu o minya o kutiisa na susuetho a mipe mucima umweya wendini o mu ambela Jesu. ⁶ Twa nyepa ngao a tende ngeyo ngao mu mucima u mweya ngo mu lumbe Mulimu na Mulomo u mweya o yiwa Mulena Jesu Kelesite. ⁷ Keo mu ku kwatise wendini Kelesite omu ana mi amuele ngao ku lumbiwe Mulimu. ⁸ Namba ngao Kelesite o na tendiwa mupika wa mukande mu ku imanena o uniti wa Jesu, mu ku tiisetha o lisepiso na sepisa a ka nyakulyenu, ⁹ keo ku macaba ku lumba Mulimu baken'isa o sishemo saye. Wendini omu ana n'olele, "Keo mo ni lumba mukaci no macaba na ku imba tumbo ku lithina lyoye." ¹⁰ Mu ku ukelapo kame, "Mulumbe Mulena, omwe mwa macaba mwoshe." ¹¹ Kame, "Mulumbe Mulena, omwe mwa malicaba mwoshe; muteneke oshe anu a mulumbe." ¹² Kame, Isaya amba ngaa, "O muthithi tha Jesse mo thiwiya, o yo tumuka ku wiya ku busa o macaba; o kwaye o macaba mwa kwata sepo." ¹³ Thino nako na nyepa ngao Mulimu no sepo ekale o kwoye na kuwapela na kotho mu ku lumela, keo ngao o maata no Moya no ku kena mu kwate sepo thingi. ¹⁴ Ome shemwa ina misepe, mwa kwange. Nakwata sepo ngao o mwe shemwa mwa kwata uwa, wa kukwata thibo. Na kwata sepo ngao mwa twesa ku ku luta mwofoti. ¹⁵ Keo na tiisetha ku min'olela inu i mweya ngao ni mikengelise baken'isa o sishemo esi a na nipu Mulimu. ¹⁶ Ethi mpo tha talusa ngao na swanela ku piluka mubeleki wa Kelesite Jesu oyu no tumiwa ku litunga, ngao ni piluke mupulisita wa linzwi lya Mulimu, ngao ei a koleka o macaba i amueliwe, na ku kenisiwa ku Moya o u kenu. ¹⁷ Name ko sili esi ni ku tundumuna mu musebethi wange o u ni tendela Mulimu. ¹⁸ Ni shemwa ku amba saso kendi esi a natende Jesu o kwange ngao a macaba a yube ei ina tendele o macaba baken'isa o ku kuketa kwaoo. Ei ina tendiwa mu manzwi nei no kutenda mu maketho. ¹⁹ Mu maata nei no kumonisa na no ma makatho na maata no Moya o Ukenu. Ngao ku tunda Jerusalema, na kumanyonga mane na ku ka kuma ku Iliriko, no swanela ku kutatha o linzwi lya Kelesite ²⁰ Mu mukwa ou na tabela ngaa ni kutathe o linnzwi, kono koo ku na limukiwa o lithina lya Jesu kao, ngao ko ina umba apa nashaba mukwange kao. ²¹ Kono nithe ne i ina n'oliwa: "A nakana ku limukisiwa o yaye mba mumona, keo anakana ku yuba o yaye mba iyuba." ²² Baken'isa ngeyo po nyipo kame ina kanisiwa tungi-tungi ku wiya oko. ²³ Kono ngeno, ko ni kwite sibaka omo mu mutunga omo kao, ina shimbi myaka thingi tha ku shukela ku wiya oko. ²⁴ Na sepa ngao mo ni mimona apa ni wiya ku pita oko mu mweendo wange no kutha mu Spain na ku wiya ku nitusa mu mweendo oko, apa ni mana ku ikala nenu mu nako thi mweya. ²⁵ Kono ngeno natha ku Jerusalema, ku ka tusa aana Mulimu no kuluka. ²⁶ Kakuli a Masedonia na Akaya a na kolekele a utwi amweya aa no kuluka aali mu Jerusalema. ²⁷ E, mo na wapeela, kakuli ana siele o sikoloti. Kakuli a macaba apa anapiwa ku ufumu no Majuda kwei no Moya, nao a swanela kwei no lutu. ²⁸ Keo apa ni mana ou musebethi ou na ku apa ou muselo ou, mo ni tha ku Spain na ku mipotela o ni li mu mweendo. ²⁹ Na limuka ngao apa niwiya okwenu mo ni wiya na fuyawethi thingi tha Kelesite. ³⁰ Ngeno na mieletha, mwaa pange, mu Mulena wetu Jesu Kelesite, na uwa wa Moya ou kenu, ngaa mu like moshe mu ni lapelele ku Mulimu. ³¹ Mu ni lapelele ngao ni tenekiwe kwaa na kana ku lumela mu Judea na tuso ethi ni twala mu Jerusalema aanu a lumeli a thiamuela. ³² Mu ni lapelele ngaa ngombo ni wiye o kwenu o ina wapele mu tato tha Mulimu. Keo ni wiye ni katuluhele oko kwenu. ³³ Keo o Mulimu no kotho e kale nenu moshe. Amen