¹ Eyo apa no ipwa keo ni topela, na ku mona thelo thina shokololiwa kuwilu. Elii litangi noni yuba lyafeka wendi tolombita, lyamba ngao, "Owiye kuno moni kumonitha eyi itamba kutendaala mu manyima weli." ² Apo beni keo niikala mu Mepo Thikenu, naku nimona lubona luna pakiwa kuwilu kuna tomana munu. ³ Oyu no tomananga mwanafeka wendi liwe lya jasipe na Carneliani. Mono kuthinguluka n'ongolo ku lubona. E n'ongolo mwana kufeka wendi emeraluda. ⁴ O lubona mono lupakiwa mukachi no mabona makumi meeli na mane, kame pa lubona mono kutoomana akulu akutha pa makumi meeli namane, ana kumanga iito ikenu, ku mwitwi thoo ana kumanga makuwani a gauda. ⁵ Keo mu lubona kupana mweetho, namai, na mishisha tho mvula. Opotho no lubona mono kwi ikala malambi mutaanu nameeli a tumbuka, etho neli mepe mutaanu natwili ya Mulimu. ⁶ Potho no lubona paikala liwale lya thiiponi, wendi Kilisitale. Pakachi no lubona na ku manyonga no lubona kwa ikala ibupiwa no ku yoya iine, inoombu meo, kupotho aku manyima. ⁷ E sibupiwa thitangi mono thifeka wendi ndee, tho wiili wendi namani, tho waatu mono thikwata thipolo wendi tha munu, tho une mono thifeka wendini ngonga wa kutuka. ⁸ Eyi bupiwa ei yoya yoshe mone ikwata mambaba mutaanu na limweya, inombu mewo peulu na mushi. Uthiku na mushinonga njena kuteneka kuamba ngao, Mukenu, mukenu, mukenu Mulena Mulimu wo Maata oshe, oyu noikalako, noyu liko, oyu mbo wiya." ⁹ Apo ibupiwa no ku yoya ipa kanya, na likute, na uitumelo koyu no toomana pa lubona, oyu yoya nako thoshe. ¹⁰ Akulu makumi meli na ane keo angwela pashi optho no thipula tha lubona na ku lapela oyu yoya nako thoshe. Keo atubula makuwani oo no ulena na kupaka potho no lubona, na kuamba ngao, ¹¹ "Owe onyiko oswanela, o Mulena na Mulimu wetu, kupiwa kanya na likute na maata, kakuli owe onyiko no umba e inu yoshe, mu ku wapela koye noikala koo kame noiumbiwa."