¹ Keo o lin'eloi li ni monisa o lyambai no meyu no kuyoya, kuesa wendi kristale. Mo no lisika ku tunda ku sipula sa Mulimu nesi no Ngu o munyonyo ² mukaci no mukwakwa no mulenen'i. Ku manyonga omeli no lyambai mo no kwikala o sitondo no upilo, esi si neemi likumi na ili ya yuyanu, na kushema o yuyanu kwethi na kwethi. O mashako no sitondo a ku yoyisa o matunga oshe. ³ Ko mbo kwikala sikute kao. O sipula no ulena wa Mulimu nou no Ngu o munyonyo mbo iwaniwa mu mulenen'i, keo a beleki aye mwa mutendela. ⁴ Mwa mona o lupala lwaye, keo o lithina lyae mo likala pa mapala oo. ⁵ Ko mbo kwikala usiku kao, kombo ku saeliwa liseli lya lambi kapa lya liiwa kao kakuli o Mulena Mulimu mwaa munyeka. Mwa busa ku twala okoo. ⁶ O lin'eloi mo no li ni ambela ngao, "Aa mataku a tusa kame a sikuma. Mulena, o Mulimu no mioya no mapolofita, mo natuma o lin'eloi ngao a monise eyi iswanela o kutendiwa ololo. ⁷ "Mutopele! Nitamba kuwiya! Oyu na fuyawethiwa oyu o netana o mai no upolofita no ethi buka." ⁸ Ome, Joani, ome no ni yuba na kumona eyi inu. Apa no ni yuba na ku imona, mono ni ngwa ku lapela ku maulu no lin'eloi eli no li nitonweelanga eyi inu. ⁹ Mo na ni ambela ngao, "Kona tenda ngeyo! No mubeleki wendini owe, naa kuloye o mapolofita, naa kuteka aa mai no ethi buka. Mulapele Mulimu!" ¹⁰ Keo o ni ambela ngao, "Ko mu na tiietha o upolofita no ethi muka, kakuli o nako pepi po thili. Oyu nakana kukena, mu muteneke a ekale ngeyo mu kukena ku ku kukenisa. ¹¹ Oyu li mu unyangunyu, mu muteneke ekale mu unyangunyu. Oyu no ku kukenisa mu muteneke a tende eyi no ku kukenisa. Oyu na kene, mu muteneke a ekethe o ku kena." ¹² "Mumone! Ni tamba kuwiya. O muputho okwange ko uli, kwika munu na munu kwei natenda. ¹³ Ome no Alfa na Omega, oyu no utangi na oyu no mamaneno, wa matangi na mamaneno. ¹⁴ Fuyawethi thatha kwaa ana kushu a macathi oo ngao nga wane o swanelo no kulya ku sitondo no moyo na kuingena mu mulenen'i mu kuingenena ku yelo. ¹⁵ Panze pekala ambwa, a lothi, o maule, epai, a lapela alimu, na anu oshe a wapela na kutenda ya ku onga. ¹⁶ Ome, no Jesu, ina tumu o lin'eloi lyange kuwiya ku ku pakela eyo inu ku ma keleke. Ome no mithithi kame no munu wa libumo lya Davida, o litungwethi no masikusiku.." ¹⁷ Moya na Munyaliwa amba ngaa, "Owiye!" Muteneke oyu yuba ambe ngaa, "Owiye!" Oyu fa oliwila, mu muteneke a wiye, kame yoshe oyu wapela, mu muteneke a kuwanene o meyu no kuyoya. ¹⁸ Na pakisa ku munu yoshe oyu yuba aa maii no u polofita no ethi buka, ndi munu a eketha kwei inu, Mulimu mwa muekeetha o ukalu ou anan'olo omu mubuka ethi. ¹⁹ Ndi munu mwa tundisa oinu mu mai no sipolofita,Mulimu mwa tundisa ei a kwite mu sitondo no upilo na mu mulenen'i o ukenu mwei inan'oliwa omu mubuka. ²⁰ Oyu o paka ei inu amba ngao, "Eni! Ni tamba kuwiya." Ameni! Owiye, Mulena Jesu! ²¹ O lilato lya Mulena Jesu muikale nalyo. Ameni.