¹ Neli lya Sabata mangolangola, ku malungasiku no liiwa lyo matatekelo lya Sunda, Maliya Magdalena na Maliya mwakwaye na wiya ku mbumbo ku zi mona. ² Mumone, keo kwi kala lya mundandamo, kakuli lingeloi lya Mulimu no litunda ku wilu, na ku wiya kutundisa o liwe, na ku toomana po. ³ Oponahalo wendini mweetho, eyaapalo ku kena wendi ni mbundu. ⁴ A libeleli no mbumbo kwiyapa na kufeka alume akufa. ⁵ E lingeloi keo lya ambela aakazthi ngao, "Komu neyapa, nalimuka ngao mwa saela Jesu, oyu na ngongoteliwa. ⁶ Kali muno kao, kono ona bumbuka, kutha omu na ambela. Muwiye mu mone omu na lala Mulena. ⁷ Munyangupe muthe mu ka ambele alutiwa, 'Ona bumbuka kwa afu. Mone, ona kutangethe ku Galileya okwenu. Okoo mo mu kamu mona.' Mone, I na myambele." ⁸ Akazthi muwangu-wangu keo atunda ku mbumbo mu kuiyapa na kuwapela enene. ⁹ Mumone, Jesu keo o kuwana noo na kwaambela, "Mulumele!" Akazthi keo owiya, ku mukwata ku makondo na ku mulapela. ¹⁰ Jesu keo waamba okoo, "Kamu neyapa. Muthe mu kaambele akwange athe ku Galileya. Kuya mwa ka ni mona." ¹¹ Apo akazthi atha na kwenda, mumone, amweya no alibeleli no ma mwa natha mu tolopo kwa kulu no mapulisita ku katonweela yoshe ei inatendahala. ¹² A mapulisita apa na mana ku kuwana na akulu mu mukopano kwa ambaula eyi inatendahala, na shimba mali mangi kupa ku masole ¹³ na kwa ambela, "Mwa ambele anu ngao, 'Jesu' alutiwa aye ousiku anawiyi na kwiza o situpu saye otwe tu shilala.' ¹⁴ Kun ezi piho zthi ka kuma ku mubusisi, mo tu mususueza na ku tundisa opiaelo okwaye." ¹⁵ Keo o masole a shimba o mali na kutenda omu na ambeliwa." Ezthi piho keo zthi yanduluka ku Majuda oshe ku leta na pelo. ¹⁶ Kono alutiwa no likumi no mweya atha ku Galileya, ku lilundu okoo Jesu na toyela. ¹⁷ Apa na mu mona, na mu lumbeka, kono amweya na kakanya. ¹⁸ Jesu no wiya okoo na kwaambela, "O maata oshe no kuwilu na pashi ana piwa okwange. ¹⁹ Muthe mu kapange alutiwa mu mishobo thoshe. Mu ka kolobethe mu lizthina lya Tate, lya Mwana, na lya Mepo Thikenu. ²⁰ Mwa alute ku mamela einu yoshe ina miambele. Mone, Nekala nenu nako zthoshe, ku twala ku mamaneno no nako.