¹ Mu nako etho, mulena Heroda mu tetilaki oyuba n'uwa tha Jesu. ² Keo waambela apika aye ngao, "Oyu Joani mukolobezi; ona inguka kwaa afu. Ponyiko kutundeela yoshe eyo yo maata eyo ei belekiwa okwaye." ³ Kakuli Heroda mwa na manga Joani, na kumupaka mutolongo baken'isa Herodiasi, o mbiyama minaye Filipi. ⁴ Kakuli Joani mwa na mu ambela ngao, "Kaswanelo thoye nga o mupilue mbiyama woye kao." ⁵ Heroda mwana thaela ku mwipaa, kono mwana iyapa anu, kakuli mwana shimba ngao mupolofita. ⁶ Kono panako no mukiti no liiwa lyo kwelekiwa kwa Heroda, mwana Herodiasi keo no kina pakachi nonyangela na ku tabisa Heroda. ⁷ Mu kualaba, keo o musepisa ngao mwa mupa yoshe eyo athaela. ⁸ O mwana ka susuezo tha inawaye, keo wa amba ngao, "Onipe pano, o mutwi wa Joani mukolobezi." ⁹ Mulena no lwana mu kupo tha mwanaye, kono baken'itha owitamo natenda kame baken'itha anu nalya naye pa tafule, keo olaela ngao kutendiwe ngeyo. ¹⁰ Keo oitana ngao mutwi wa Joani ukambatuliwe mutolongo. ¹¹ Keo o mutwi ukaletiwe paka cenga na kuupa o musithana ona kutwala kwa inawaye. ¹² Keo alutiwa aye awiya, na kushimba e situpu, na ku kathi bumbeka. Mumanyima weyi, keo atha na ku kaambela Jesu. ¹³ Jesu apa nayuba ethi thiambo, keo ofuula mu sisepe nakutha kunyonga muliyungu. Onyangela apa thi yuba, keo atunda mu munzi nakumu kon'eela na makondo. ¹⁴ Jesu keo owiya o koo apanamona oungi onyangela. No ayubela n'eke na kupalisa akuli. ¹⁵ Omangolangola apa nakuma, alutiwa keo awiya okwaye na ku amba ngao, "Muno muliyungu, kame anliwa linazthi. Muuthe enyangela, aukele mu minzi na ku kakuulela ya kulya." ¹⁶ Kono Jesu keo waambela ngao, "Njeko tuso ethi a thela. Omwe shemwa mwatuse ya kulya." ¹⁷ Keo amuambela ngao, "Twakwata ambu inkwa mutaanu nathi mbiili." ¹⁸ Jesu keo waambela ngao, "Muzthi niletele." ¹⁹ Jesu keo waambela nyangela ngao atomane pashi pa muonyi. Keo oshimba inkwa mutaanu nathi mbiili. Keo otopela ku wilu, keo ofuyawetha na kucholaula othinkwa na kupa alutiwa aye, keo alutiwa apa o nyangela. ²⁰ Oshe nalya na kuikuta. Nashimba naufumwaazi no usiyalela kuilya-ingongolo likumi na ili kuumba. ²¹ Aa nalya mwana kuma pa mutaanu wa alule wa alume, kombula kubala akazi na aikana. ²² Apo bene keo wa ambela alutiwa aye ngao aingene mu sisepe na kukutangetha mushambwaliya, oyeyoshi utha nyangela. ²³ Mu manyima okuutha nyangela, keo otha pa lilundu yofoti ku ka lapela. O mangolangola apa na kuma, mwana ikala yofoti. ²⁴ Kono o sisepe sothil pakachi no lyambai, sosizukuzwa ku man'asha, kakuli o mepo mono thikuya enene. ²⁵ O nako no malungasiku Jesu keo owiya okwoo, kuno yoenda peulu no meyu. ²⁶ Alutiwa apana mumona yo enda pehulu no meyu, keo aiyapa nakuamba ngao, "Siumba," na kulila na kwiyapa. ²⁷ Kono keo Jesu wamba okwoo ngao, "Mutiye! Ome! Ko mune yapa." ²⁸ Keo Pitolosi o mutambula na kuamba ngao, "Mulena, haibandi owe, olaele ngao name ni wiye okoye pameyu." ²⁹ Jesu keo waamba ngao, "Owiye." Keo Pitolosi otunda muwato na kwenda pameyu kutha kwa Jesu. ³⁰ Kono Pitolosi apa namona olin'ungwa, keo owiyliwa umowa. Apa na tateka kuthama, keo okuwa na kuamba ngao, "Mulena, oniyoyithe!" ³¹ Wangu wangu Jesu keo oondoola makaa aye, na ku kwata Pitolosi nakumu ambela ngao, "Owe no tumelo thinyonyo,ike apona kakanya?" ³² Keo Jesu na Pitolosi aingena musisepe, o mepo keo thiteneka. kukuya. ³³ Keo alutiwa musisepe na lapela Jesu na kuamba ngao, "Shemwa o Mwana Mulimu." ³⁴ Apa nama kuupuka, keo natha mulitunga lithaniwa Genesareti. ³⁵ Alume nomo mulitunga aka limuka Jesu, keo atumena muibaka yoshe, na kumuletela akuli oshe. ³⁶ Keo amulomba ngao akwate shiwa ambu ku mungundo no chanzi waye, kame noungi oshe aana kwatako na yoya.