¹ E buka za mukowa wa Jesu Kelesite, mwana mulume wa Davida, mwana mulume wa Abulahama. ² Abulahama neli iwa Isaka, na Isaka iwa Jakobo, na Jakobo iwa Juda naa minaye nwa alume. ³ Juda neli iwa Perezi na Zera wa Tamare, Perezi iwa Hezironi, na Hezironi iwa Rami. ⁴ Rami neli iwa Aminadabi, Aminadabi kweleka Nahishoni, naye Nahishoni kweleka Salumoni. ⁵ Salumoni neli iwa Boazi wa Rahabe, Boazi o iwa Obedi kwa Ruti, Obedi o iwa Jesse. ⁶ Jesse neli iwa Davida o mulena, Davida kweleka Solomoni ku mbiyama waye Uria. ⁷ Solomoni mwaneleka Rehoboami, Rehoboami kweleka Abija, Abija o iwa Asa. ⁸ Asa neli iwa Jehoshafati, Jehoshafati o yiwa Joramu, na Joramu shekulya Uziya. ⁹ Uziya neli yiwa Jotami, Jotami oyu eleka Ahazi, Ahazi yiwa Hezekiya. ¹⁰ Hezekiya neli yiwa Manase, Manase kweleka Amoni, na Amoni kweleka Josiya. ¹¹ Josiya neli shekulya Jekoniya naa aminaye pa nako na chiseliwa ku Babilona. ¹² Munyima no ku muchisela ku Babilona, Jekoniya no ka eleika Shialiteli, Shialiteli neli shekulya Zerubabele. ¹³ Zerubabele kweleka Abiundi, Abiundi kweleka Eliakimi naye Eliakimi kweleka Azori. ¹⁴ Azori no eleka Zadok, Zadoki o yiwa Achimi, na Achimi neli iwa Eliudi. ¹⁵ Eliundi neli yiwa Eleaza, Eliazar o yiwa Matahani, naye Matahani kweleka Jakobo. ¹⁶ Jakobo neli yiwa Josefa o mukwamunza Maliya, oyo okwaye Jesu mwa nelekiwa, oyu ithaniwa Kelesite. ¹⁷ O masika oshe ku tunda kwa Abulahama ku leta kwa Davida neeli likumi na mane lya masika, kutunda kwa davida ku wiya apa nachizeliwela ku Babilona kwa pita masika aku kuza pa likumi na mane, na kutunda pa kuchizeliwela ku Babilona ku wiya pa Kelesite kwa pita masika likumi na mane. ¹⁸ O kwelekiwa kwa Jesu Kelesite mono kutendahala mungeya. Inawaye, Maliya, mwa na beleliwa kwa Josefa ngao a mulame, kono njekale ekale pa mweya, mwa na waniwa ngao mulemu kutunda ku Mepo Thikenu. ¹⁹ Kono Josefa, o mukwamunzi waye, neli mulume wa ku sepahala ni no shemwa ku saela ngao a mu swabise (Maliya) patalaza, keo o saela ku mulukula musimweni. ²⁰ Apa naza na kukengeela eyi, e lin'eloi lwa Mulimu keo liwiya kuku monahaza okwaye kutulo, "Josefa mwana Davida wa mulume, kone yapa kushimba Maliya kupiluka mbiyama woye, kakuli oyu mwana a nakushimbi mwana mu piwa ku Mepo Thikenu. ²¹ Mwaa eleka mwana wa mulume, mi momwi sana linthina lya Jesu, kakuli yona wiyi ku yooyisa anu oshe ku uyi woo." ²² Yosheyi moina tendahala ku taleleza ethi na amba Mulena kwa a polofita aye, ngawo, ²³ "Mumone, o kaombeli mwa kushimba na kweleka mwana mulume, mi mwa muisana lizina lya Imanuwelu"-ili litalusa ngao, "Mulimu oli netu." ²⁴ Josefa keo o tona mutulo na kutenda eyi lin'eloi lya Mulena noli mulaela, na ku shimba mbiyama waye ku mulama. ²⁵ Kono ka mulumukile musito kao kupitela apa na elekela mwanaye wo mulume. Keo o mwisana lizina lya Jesu.