¹ Muwiye ngeno, moshe mwa kwa ku fuma, mulile shemwa enene, pa unyangunyu ou umi wiyela. ² O u fumu wenu woshe unolo, eyapalo yenu yoshe ina liwa ku muwa. ³ E gauda na silibela thenu thoshe thina cinji, na ng'alawe thateni mo thi piluka upaki okwenu. Mo thi tumbeka o lulu lwenu wendi mulilo. Monu muku pakele o ufumu wenu ku twala eliwa lyo mafeleletho. ⁴ Mumone, iya no mu kana ku olitha anu na lima mu ilwa yenu ya lila munyima thenu. E thililo tha kwo ku cola thina ka kuma mu matwi a mulena o mukulu. ⁵ Mo mu ne kala mu ufumu mu litunga na kuku yoyela thiwana. Mo mu na nunitha e micima thenu ku lukisetha eliwa no kufa. ⁶ Mo mu na nyanditha na kwipa anu no ku luka. A no mbulo kutwetha ku ku lamulela. ⁷ Mukukete, ngeno, mwakwange, kutwala apa ma wiya Mulena. Mutopele akwo ku lima omwa ku ketela ku tatela e mbuto tho ngao thipane mu mumfu, ku twala apa mba lokela omfula no utangi no yu wo mamaneno. ⁸ Namwe, kame, mu kukete. Mutiithe e micima thenu kakuli oku wiya kwa Mulena kwe kala pepi. ⁹ Ko mu na ku tongoka, akwetu, mukaci kenu, anga mu kane ku nyathiwa. Mu mone, o muatuli one mana pa thelo. ¹⁰ Mu monene, akwetu, ku manyando na ku luka ko ma polofita, aya emaena ku kutatha mu lizthina lya Mulena. ¹¹ Mumone, mo twa mona aya no ku tiya wendi anu a fuyawethi. Mwa yuba o ku kutiitha kwa Jobo, kame mwa limuka e libaka na tendela ngeyo Mulena, O mwa kwatele n'eke na mucima uwa. ¹² Ku mafeleletho, akwetu, ko mu na ethanga, pa liwilu kapa pashi, kapa kwetha okulu koshe. Mutende ambu ngao, ndi mwetana "Eni" kutalusa ngao "Eni" kame "Inakana" atauluse "Kukana," ngao ka mbo mu na kengena mu katulo. ¹³ Kana mukaci kenu mwali oyu nyanda na matata? Mu mu ambele a lapele. Kwali oyu na wapele? Mu mu ambele eembe membo a ku lumba. ¹⁴ Mukaci kenu mwali oyu kola? Mu mu ambele akulu no keleki, awiye amu lapelele. A mu wethe na maathi mu lithina lya Mulena. ¹⁵ Tapelo tha tumelo tha yoyitha munu wa ku kola, kame Mulena mwa mu yoyitha. Endi mwana tende thibi, Mulimu mwa mu swalela. ¹⁶ Keo mu ku ambweethe e ibi yenu na akwenu kame mu ku lapele anga mu yoyithiwe. Tapelo tha munu wa tumelo thinene mu maata no ku thebetha. ¹⁷ Eliya neli munu wendi otwe. Mona lapela ngao ko ku na loka mfula, keo bene no shemwa ku loko mfula pa ilimo yatu na makwethi mutana na kwezthi ku mweya. ¹⁸ Keo Eliya o lapela kame. Keo mfula oloka, na litunga keo li menisa yoshe ya pa kaye. ¹⁹ Akwetu, ku mona mukwenu na yongo ku tunda mu niti, kame o mukwaye oka mu uta mu niti, ²⁰ oyo munu a limuke ngao, yoshe oyu no ku utha wo thibi ku mu tunditha ku thibi thaye ona mu tuthu ku mu tunditha ku liu kame keo na tunditha ibi ingiingi.