¹ Jakobo o mupika wa Mulimu na Jesu Kelesite, ku mishobo likumi na ziili moshe mu na ku hasana: Namilumelisa! ² Mu mone ngao koshe ku wapela, omwe mwa apange, apo mu wana utata ungi-ungi. ³ Mumone ngao ao manyando mu wana mu tumelo thenu a tusa ku mi tiitha. ⁴ Muteneke oku tiya kwenu ku monithe o musethebezi angu mwikale a ku tuya enene na ku kana kulwa thinu. ⁵ Oyu yoshe othaela o utati, a like a lombe kwa Mulimu, oyu no kupa enene kame ka kanitha yoshe yu wa mulomba kau, oye wa kupa oshe ambu. ⁶ Oyu lomba yoshe a lombe na tumelo, kana lika ambu. Kakuli yoshe oyu lika ambu a feka wendi lin'asha lya mu liwate no ku ku kon'eela oku koshe ku the emepo. ⁷ Keo munu wa ngeyo kana kengeela ngao atwetha ku wana thinu thoshe kupana kwa Mulena; ⁸ kakuli oyo wo ngeyo munu wa mihupulo mbili, ka swalea kau mu yoshe eya tenda ⁹ Muteneke aya no ku twala pashi a tabele o kutha kwaye potho, ¹⁰ oya no ku fuma akengele o kungwa kwaye pashi, kakuli o mungwelo waye wendi lipalisa lya mu mwonyi. ¹¹ Kakuli eliwa apa liinve enene keo mwonyi woshe wa ukuta. E lipalitha keo lyangwa, na uwa walyo woshe wapwa. Mu mweya ngeyo, na munu wa ku fuma mwa ngwanga mu kaci ko ku fuma kwaye. ¹² Wa fuyawethi munu wa ku tiya mu manyando aye, kakuli mu manyima no ku tiya mu manyando, mwa piwa muputho wa mushukwe owo no u thepithiwa kwa oshe no ku wapela Mulimu. ¹³ Ko ku ne kala wa kwamba yoli mu muliko ngao, " Ngao a manyando ange aku ni letela Mulimu," kakuli Mulimu njena ku likiwa na unyangunyu, kapa oye yo n'ene ku lika munu. ¹⁴ Man'i na man'i oshe mwa likwa na mihano tho, ethi tha mu twala ku uyi na ku ka mu katatha. ¹⁵ Apa e minahano thi nyangungu thi mu bulela, keo tha mu letela na lifu. ¹⁶ Ko mu na oungiwa, omwe mwa apange. ¹⁷ Oi yoshe ei no ku wapa enene moya pana ku wilu. Moya wiya pashi ku tunda kwa Yiwetu no litwa. Okwaye ko kwe kala ku chinja-chinja kau kapa lififi baken'itha ku piluka-piluka. ¹⁸ Mulimu mona keta ku tupa kwelekiwa mu mai o niti, ngao anga tu piluke wendi icalo no utangi ku inu yoshe ei na umba. ¹⁹ Mu na limuka, omwe mwa pange na wapela: Man'i na man'i oshe a piluke wa ku yuba wangu, njena ku yakama mu ku amba, kame njena ku lwana wangu. ²⁰ Kakuli oku lwana kwa munu njena kwendela na kukena kwa Mulimu. ²¹ Keo mu ku tundithe o u nyangunyu woshe wo thibi. Mu ku ku utha pashi mu a mwele e lii lyaye, eli no ku twetha ku yoyitha e myoyo thenu. ²² Mutende o mu lyambela lii ka ku yuba ngambu kao, ku kwanga mwofoti. ²³ Munu wa ku yuba ngambu e lii kono njena kuli tenda, a feka wendi munu wa ku mona thiateo thaye mu thiponi. ²⁴ Ku mana ku ku mona keo katha kame popobene keo na bulama omu ana ku monene. ²⁵ Munu no ku topela thiwana mu milao no tukuluwo, na ku twalela ku tenda ngeyo, njena ku feka na ku yubambu na ku bulama, munu wo ngeyo mwa fuya wethiwa mweya tenda yoshe. ²⁶ Munu yoshe okengela ngao mulumeli kame njena ku mamela olu limi lyaye, a ku onga mu mucima waye kame o ulumeli waye wa ngayangaya. ²⁷ O ulumeli ou kenu kame wa mbua ku fothahala kwa Mulimu na Yiwetu, wa kututha angule na no ku fela alume o mu manyando oo, na ku ku babalela ku inyangunyu no litunga.