¹ Ngeno mwakwetu,mutu lapelele,ngao elii lya Mulena li nyangupe na ku kanyithiwa,omuli lukanela kwekaela na kwenu, ² ngao nga twa lukuluwa kwa anu nombula kulika na anyangunyu,kakuli ka oshe akwite tumelo kao. ³ Kono Mulena wa kusepaala,mwa mi tiitha na ku mi thileletha kwooyu munyangunyu. ⁴ Tukwite ku tiithetha kwa Mulena bakeñithenu,ngao mutende na kutha potho ku tenda einu tumi laela. ⁵ Mulena aetelele emichima thenu ku wapela Mulimu na ku kuongotha kwa Kelesite. ⁶ Ngeno twa mi laela,mwakwetu mu lithina lya Mulena wetu Jesu Kelesite,ngao mukutape na mukwenu yoshe oyu enda munthila tho kulwa tokomelo na ku kana kwendeela na matuto muna amweele ku tundokwetu. ⁷ Omwe shemwa muna limuka kwa swanela kutu shengweena,kakuli noshemwa kwikala tandabale apa notwikala nenu. ⁸ Notu shemwa ku lya thilya tha munu kwa mbula ku thika,kono motu thebetha uthiku na mushinonga mu itenda na ku funyakela,ngao kotuna piluka muthiyo okwenu kao. ⁹ Mono tu tenda ngeya ka kwamba ngao kotu kwete unene kao, kono mo tu tenda ngeya kumi tha ku moenako okwenu,nga o mutushengweene. ¹⁰ Opo no twikala neni no tumi laela, ''Oyu no kukana kuthebetha aka nalya.'' ¹¹ Twayuva ngao amweya apenu ka enda thiwana kau,ka sebetha kau, kono aingena mu kwa na yambo ya ku fothaala. ¹² Ngeno ao nongeyo twa laela naku aeletha mwa Mulena Jesu Kelesite,ngao athebethe mu ku ombweela na kulya eithima yoo shemwa. ¹³ Kono omwe, mwakwetu,komuna kwanga ku tendo uwa. ¹⁴ Endi amweya nje ku yuva elii lili omu mu liñolo,mu mutopeele thiwana na ku ambuka ngao komuna shimba wendi wa thithimbo, ¹⁵ kono mumu lemuthe endi mukwenu. ¹⁶ Pano Mulena wo kotho oye shemwa amipe kotho enako thoshe namu nthila thoshe. Mulena aikale nenu moshe. ¹⁷ Ome,Paulusi, na ñola na likaa lyange,ethili thisupo pa liñolo lyoshe ni ñola. ¹⁸ Ethishemo tha Mulena wetu Jesu Kelesite thikale nenu. Amen.