¹ 1 Kamuru ma ta lu'uru ka kammuru ma li Fo'ofo bah param yisti, wo wasa nongyo abaring, ka be wu jeh ma ban kusu missu i wu bah she'ele mpuksheme a pisa ne a bol Yeso ku sormai ne a wolli. ² A chiwa ne do ku ban kam muru mani sa, chew wu bapina ko la'ahun i gbolo. ³ Yeso, i ku Betanya ku lah Saminu bah mangam, i mur girshi yiri ma lili, yima maam magina bar wara mpus mur ngis ndo yiru ma shimai, ma ngya'abolo bwana, yo wa'ana yi ku muri. ⁴ Ka li nchim wu gina bapina bah awo ho i, beh Yeso a lo'o ne. ⁵ "mur ngya'abolo yi mani, aha kura iyi ka ho ji denari lum gba'a lum tarung a pawa wu bah saya" mani ma'ana ka a swa'ana to'o iyi? ⁶ Beh Yeso ka lo'o wa ne, "Wu ji'inghi, wu mur ya'angah muri ne man? ⁷ Wuna njila ne wu kum obah saya gir, a ha bawun ma duk i duk, mi, mi do'o ha i wun ma duk, i duk sa. ⁸ Mam mani pa'a girshima, bah wa'a muru yi yiram ma shen da lishi. ⁹ Ngichewe mumur chew wun, bana bah ngya'a lo'am ko shene ha nzah mani, aho do dudung i maam mani i tumui ba pa'ana yam sa." ¹⁰ Yahuza Iskariyoti, mo'on ku chiri wu muna Ye'ele tumu Yeso ba lum kunya baring ma, shina ba bwajeh ma she'ele mpuknsheme ne i pawa yi ¹¹ Beh Ojeh ma she'ele mpuknsheme ma, ba a wo'o beh lo'o, bong nchimya bwana iyi, a yer lo'o ne aho pih ngya'abolo. ¹² Ku duk ma mo'on, ma kammuru ma li fo'ofoh bah param yisti ka yer nzur ma kammuru ma ta-lu'uru, wu beh bah ye'ele tumui ah mui ne,"su girshi beh ban l bila ku he? ¹³ Yeso ka tum baring ku chiri be wu muna ye'ele tumui ne, "Wu bor mashen chiri ngila, Wo mgbak i bura magina bah twala kwer mu'uru. ¹⁴ Lah bah na bwara ho, wu bor i chi'i wu lo'o yi be bwalah ne bwajeh ne "njila ban bah su kammursu ma ta-lu'uru, iwo bah ye'ele tumui'' ¹⁵ Ko sa wunu mor lah kalang, magina bah a girsai wu girshi su beh ban ho banai. ¹⁶ Be muna ye'ele tumui la'ahun shen beh chiri ngila, a kum ogir bwang bene bah chiwa wa, yima a girshi beh bilah ta-lu'uru. ¹⁷ I kurwa, yi bah ha pur iwo beh lum kunya baring. ¹⁸ Beh bah a ho mur lih i mur tebur yima Yeso ha chew wa ne, "bwara i chiri wun ba sumur li bila iyi, ko bwalam kur imi." ¹⁹ Beh gir su'uru nchimya, a mwe'ehi, mo'on mo'on ngichewe do mi sa? ²⁰ Yeso ha yerwa ne "mo'on i chiri wun beh lum kunwun baring mani, bah imu yis buhi ha kwa'anjin, imu li bila ko kur i mi" ²¹ Mun bapina ko shene bene bah beh ngya'a ngya'a lo'o chiwa bwara bah na kura iyi, wasa mi ka ho bong yi ne, a do bilai sa. ²² Bah a ho mu li, Yeso tol beh fo'ofoh mah ma'a buhi ku muri, bu'ungu pawa, ka chew ne "yiram yi mani wu ya'a" ²³ Twala koro, bwata yi Baku, Panawa, a ya'a no'oho ho beh bum koro. ²⁴ Chiwa wa ne, "Mani shilam ma yer lo'o, shila ba a swa'ana ta'a bapina bwana. ²⁵ Ngichewe mumur lo'o wun, mo do bassa nuh mu'uru bilnguni mani sa, wos ma du'u bah mo nou piwi ku lah Baku. ²⁶ Bah a mal ma'a njele ma so'o nzah pi Baku, a puru kwa njere mashen gbo'o Par. ²⁷ Yeso chew wa ne, "bwang wun, wo ngya'aha mgba'a wun, wu kwa'aha ta'am, a ngwa'ala ne, moo ngya bah ning lel wu nzur wu be nzur a ta Kpasang. ²⁸ Ana luasa mi mo shen ho dumwun mashen Galili." ²⁹ Bitrus ha chew yi ne wu ginasu na ho takpasang, mi mo do tunkun ne do shi'ila we sa. ³⁰ Yeso ha lo'o yi Bitrus ne "ngichewe ma mo lo'owo, i duhi mani bah wu kuko'oro ho do shi tongyo ma sa, wo tunku shi'ilam mgba'a tarung" ³¹ Bitrus ne, wih, "Suna ho wuh i weh, mo do tunkun shi'ilo sa." ³² A shina ban bah ai tu'uli ne, Getsamani, yi bah Yeso chiwa wa beh wu bah ye'ele tumui ne, ''Wu ning ha nini, mishi nere Baku" ³³ Ka toala Bitrus, Yakubu ka Yahaya, shina iya, yima paha zun chiri i suhu nchimi. ³⁴ Chiwa wa ne, nchimam i mur suhu bwana bene ngah wuh, wu ning ha bari ne wu kusu mishwun wu ta'ara. ³⁵ Yeso shina duwa ka kwana su'ula, nere Baku ne, na ho bong, beh ban mani, i bo'olo. ³⁶ Yeso ne, Aweh Dah, wu gir mbwang bwangya ku bo, tol beh korchiri mani, do chew ne mi njila sa, i ning ne moh. ³⁷ Yuana kuma ya a mur nong tolong, yima muna Bitrus ne, "Siman wu mur nong tolong? wWo do ngi ningyi ta'ara gima ma mu ban sa? ³⁸ Wu ningyi ta'ara, wu nere Baku, ne wu do bor gir biwa sa. Mpilar njila pa'a rah,Yiru mur bang ji'iri. ³⁹ Bassa shen ndah nere, ka pa chumu i ngya'a lo'o. ⁴⁰ Bassa bunyere yo kumya a mur nong tolong, ngya'a misya wo lu'ura ma a do she'ele gir ba a chewii sa. ⁴¹ Bunyere ma gba'a tarung ka cew wa ne, "Wush mur nong tolong i nos? I ning na'ah!Missai yuama. wu sunnu! A to mun bapina pawa ba pa'a girbiwa. ⁴² Wu la'ahun su shene, sunu, ba njila twalam pawa ba pa'a girbiwa i ha pwer." ⁴³ Wo shi mur lo'o, Judah Iskaroti bapina mo'on ku chiri lum kuni baring (nsoh) ka boro i wu bapina bwana a yo iyi, ai wu be'eu riding mur do'ola, iyo ba ajeh ma magana, i wu ba ngwo'olo-ngwo'olo, i wu jeh. ⁴⁴ Yi burama ka nsah buhi ka cew wa ne, ba boli kwanshere i ning lele yi" ⁴⁵ Muni-muni Judas yo bah Yeso ka lo'o ne, "Bwa-sah," kah nukuni. ⁴⁶ A boli kwanshere iyi. ⁴⁷ Mo'on ku chiri ya ba chila puer, wuk be'eu rijin, ka kor mo'on korom bwajeh magina ka kor Mbumburi tolo. ⁴⁸ Yeso ka chew wa ne, wu yuana ne was mi ba nshiwi wa wara be'eu rijin i do'olo ne wu bwalam? ⁴⁹ Mi iwun gbeng-gbi beng mu mur sah wun ku lah Baku. Wu do bwala mi sa, mani ningna ne ngya'a lo'oh Baku rusu. ⁵⁰ Wu bapina ba ai yi a bangna kwana nshere. ⁵¹ Musono magina ba wuangna ku gbar mili wu mur war ta'a Yeso. We wa suni a boli. ⁵² Ta puru nzhiingi wa bee twan ma yiri ka bangyah kwanshere dah. gbiri gbik (Ngbeng) yi. ⁵³ A war Yeso mashen ba mor Prist magina. A ka'a mah murya i wu muara ba jeh. wu jeh, i wu ba ngwo'olo ngwo'ola. ⁵⁴ Bitrus war ta'a Yeso ku yo pim-pim mashe chire kuso'oma muara bajeh, ka ning i wu ba ning lele i mur wo'oh bissah. ⁵⁵ Su muara bajeh i wu jeh ma reng-chew a pe'e nshere ku mur Yeso ne a woli. A do kum shere mo'on ba as woli sa. ⁵⁶ Wu bapina bwana a lo'o lilim ku muri, ^{57 57} Wu gahmur wun lahun war lilim ku muri a chew ne. ⁵⁸ "Suwa'anai i mur chew ne, moh she'ele ka'ana Baku bah a ba'ana ku juk tarung (3) mo'o ba'ah mo ba do banah i buhu sa." ⁵⁹ Beh muara reng kunya do ning chi'i mo'ona sa. ⁶⁰ beh muara bajeh la'ahun chele ho chiri ya ka mwe Yeso,"We do i girba wu chew sa? man ba wu bapina mani amur rengkunya ku muro?" ⁶¹ Yeso ning kiring, d chew ne gima sa. be muara bajeh bassa mui ne, We Kristi, mun ba a chihai buhu? ⁶² Yeso ka chewai ne, "mini mi wo sun be mun bapina, na ningna ku buhu ma lih i ngyar-ngya, ko yo i rungjung (kuko) iyo kalang." ⁶³ be muara bajeh la'ahun sa'anga twan yi ka mue ne, sushi njila ba reng kunu ku muri? ⁶⁴ Wu wa'a yi ba lo'o ma biwai. man ba wu chew ku muri? A be'enebe'ene bwara ba bwangya ne i wuh. ⁶⁵ Wu gamur ya a ta'aha titar ku muri, a kusu mishi a sa'anga yiri a mur chewai ne "Bah sun duwa!" wu jeh ma ning lele a tohli a ngyahi. ⁶⁶ Bitrus wuku man-sah ku chiri kuso'o, mo'on korom bwasari ma muara bajeh yo ku bii. ⁶⁷ Sun Bitrus ku mur wo'oh bissa ka suni dong. ka lo'o yi ne, weh ho chiri ba a yuana i Yeso ma Nazarete." ⁶⁸ Bitrus chun kun ne, mi do shilai ke do shila gir ba i mur lo'o ku mur sa.Bitrus pur iyo kun-kuzoo mashen nsah kuko'oro kah tongyo. ⁶⁹ be korom musari ka suni ka buhu yara chew wa ba a chila ho ne, "burah mani yi mo'on ku chiri ya. ⁷⁰ Ka chun kuni kpa ka nign chigee wu ba njila yo a lo'o yi Bitrus. "ma ngichewe we ho chiri ya. weh yo Galili.'' ⁷¹ Ka bor i pa'a kuhnu yi ka muri i kanbwa."mi do shi'ila burah mani ba wu mur lo'o ku muri sa." ⁷² Muni-muni kuko'oro tohngyo ma gba'a baring. Bitrus ka re'esh lo'oba Yeso wu chewai,"Ne kuko'oro nane i tong gba'a baring woo chun-kun i mi gba'a tarung." Bitrus kwa su'ula ningyi dah zolo.