¹ Cheke cha limbo lya kama lya kuvihya! Na vimpata na kupaketha. ² Ku chekutolilila ku lijui lya Kalunga, kutambula vuchili vua Yehova kuahi. Kathetelele Yehiva na kushena kuli Kalunga kuahi. ³ Vana va vimyene vava kentu vana kala vindumba vyakama mu kati keni. Dhingadhi dheni ku chinguedhi vanapu tungunga kuthi vimo vya yimene chimene. ⁴ Vapolofeto va kuyena kathingimiko na vamala va kuyena kutcelela. Va Sasendote va ku jualetha vya kuyela nava kakuvihitha mashiko. ⁵ Yehova ua yela muli yendi vavenya. Kekilinga mulonga. Ku chimene ku chimene ayombolola vuchili vuendi! Kuvu kavanda ku lambi, vaku yeneka vuchili kuva yidhiva shuama. ⁶ "Ange njika tundithako mishovo; na kushandola membo avo. Njina lingi vingila vyavo vyakama mavoko voko, linga naumo uahi aka vahite vakevo. Membo avo akama njina ashandolaho linga naumo uahi ahinge. ⁷ Ange nguange, mu vuchili unjuvuile lyova. Tambula kushungametha linga keti vaka miteteko kumembo eni na kuli voshe vinji nathinganyeka kulinga ndi kumilingila yeni; Vuno va hi ndukile chimenene vana shishua vatamekele kuvihitha vipanga vyavo vyoshe viva pangele. ⁸ Keho njitateleleni yange-nguendi Yehova nahaka litangua njikashama njilombele. Chitela change cha kukunguiya mishovo kuyi neha mu vumuene hamo, muku va palumuina matoto ange-nakuwemeka kuange kua kuvihya; Muomu livu lyoshe lika uema na tuhya tua lifuua lyange. ⁹ Yimba njikatengulula milomo ya vantu, linga voshe vaka tambakane lidhina lya Yehova na kumupangela kuvuchili na vuchili. ¹⁰ Kutundilila musinya liye lya ndonga ya Chush vaku njipangela-vantu vange vashandoka vaka nehya mulambu kuli yange. ¹¹ Kutunda ku litangua olyo konji kakuhaka kushuama kul vyoshe vyo vapanga kuli yangevya kuvihya, kutunda ha uola oyo njika tunditha mukati keni vaka kulituntula na vaka kulipamba, mukonda kuka lituntula lalo ku mukinya uange ua kuyela. ¹² Vuno njiakathana vantu va kuyanda na vihutu mukati kove, Na vakevo vaka teuela mulidhina lya Yehova. ¹³ Keho visupo vya Yisaleli kovipanga mulonga ndi kuka kuanya vishaki, ndi ndaka ya vishaki koyi kakala mutunua tuavo; keho vaka lithilako na ku ndandako, naumo uahi aka vovuitha lyova." ¹⁴ Himba, muna mukentu ua Siyono! Tambeka, Yisaleli. Yolela na kuvuahelela na mbunge yove yoshe, muna mukentu uamu Yelusalema. ¹⁵ Yehova na tunditha chihitho chove; nombila kuti vaka vidhindo vove! Yehova yakeye muene ua Yisaleli mukati keni. Komu kateua mulonga mukati keni lalo! ¹⁶ Kulitangua olyo vaka kuanya ku Yelusalema, "Keti uvue lyova, Siono. Keti utave mavoko ove adheye. ¹⁷ Yehova Kalunga kove muali muli yove, yakeye muene ue kukuohyela yove. Aka vuahelela hali yove na kuyolela; aka liholuetha hali yove na liyango lyendi; Aka vuahelela hali yove aka tambakana na kuyoyela. ¹⁸ Ange njika kunguiya hamo vaye vali na vushona, vaye vona lihanguilile, linga keti uka tambule shuama kuvikevyo. ¹⁹ Tala ku ntcimbu oyo njika kulinguila vaye voshe vaka kuyandetha. Ha uola oyo, Ange njikohyela vaye va venduka na ku kakunguiya vaye vovombilile kuti hanja. Keho njika linga chishangala, na shuama yavo njika yitengulula kuva dhivuka hantci hoshe. ²⁰ Ha ntcimbu oyo ange njika mituamena yeni; Hantcimbu oyo njika mikunguya hamo. Njika hana kumidhiva na kushangala vantu voshe hantci haye honji ka mivuanuetha nguendi Yehova.