¹ Chili likungululeni na kuli vandakana, eni mushovo ua kujeneka suama-- ² kulutue vashike lishiko lika mitanganetha na litangua lika hita ngue mujungu, kulutue vukalu vuakama vua Yehova vuaku vihya vihya kuli yeni. ³ Ethekeni Yehova, eni voshe vaka ku konkama hantci vaye voshe vana takametha lishiko lyendi! Ethekeni kuyela. Ethekeni kukonkama, halumo muka uana kumyohiela kulitangua lya kuvihya lya Yehova. ⁴ Mukonda Ngaza yika kala ngundu, na Asekelone yikapua limbalanda lya ngocho. Vaka sheka Asendonde mukati kalitangua, na Ekelone yika tukuka! ⁵ Chikele cha vaka mashangembo vaka nchongo ya ndonga Kalunga, vaka mushivo ua Celeteo! Yehova na mivindika, Kanana chifuti cha Filisteo. Ange njika kunongetha kuku kathala lalo mundambo uahi. ⁶ Keho kunchongo ya Kalunga ndonga kukakala vyama vya vashita na vinyongo vya vinjui. ⁷ Chifiti chaku nchongo ya ndonga chika kala cha visupo vya njivo ya Yunda, vakevo vaka lithilako matanga avo kuye. Vantu navo vaka ndanda oko ku chinguedhi na vinjivo vyava Asekelone, Muomu Yehova Kalunga kavo aka takametha naku va hiluithila vyavo. ⁸ Ange njinovu kutomba kua Moave na kuvuluka vantu va Amone muye muva shauile vantu vange na kuvihitha vingamba vyavo. ⁹ Ngocho vene, ngue munji yoya_ evi vikevyo vya kuanyene shukulu Yehova, Kalunga ka Yisaleli Moave aka kala ngue Sandoma, na vantu va Amone ngue Ngomola; Muhhela ua vinchoncho na mathima a mongua, mpambo ya ngocho. Vuno visupo vya vantu vange vaka vatambula, vaye vaka thalaho mushovo uange uka vafuka." ¹⁰ Evi vika yomboloka ku Moave na Amone mukonda ku lituntula kuavo, kutunda hova shaula na vukalu kuvantu va shukulu Yehova. ¹¹ Keho aka vovuitha lyova, mukonda aka vihitha tulunga tuavo tua hantci. Mushovo uoshe uka mutcikamena yakeye, mushovo uoshe ku muhela uavo, kutunda kunchongo ya chifuti na ku mishovo yoshe. ¹² Na vantu lalo njika vatuvanga na muele uange, ¹³ na Kalunga akapangetha livoko lyendi na ndhili kuvulahe na kuvihitha Asilya, keho akapuitha Ninivayi mpambo ya ngocho, ya kuma ngue mu vindinda. ¹⁴ Keho lika kala lya kundanda matangua, kathitu uoshe ua kulithatha; Kuoshe ku mpambo kua kala vatu kulu mampanda na tukulu mampanda va kateta muakama ku ntombi ntombi. Lijui lyavo lika tundilila ha vinjanena; vya ngocho vika kala ku vipampa vya vikolo; mukonda na fukula vya mukati. ¹⁵ Okuo kuakekuo kuyolela kua mu limbo kua kelemo na lyova lyahi, yiye ya kuanyenne mu mbunge yendi, "Ange, navimo vyahi nja lipua navyo." Vati yina hikunuka mpambo ya ngocho, muhela uva kahuimina vaka shuama. Uoshe uye akahitako aka yaya mukonda lyendi.