¹ Weno, shuvenu ngoli naghuntje ghudona, navipempa navintje,namakurenkito, nalifupa, ntani narushopo naruntje. ² Nkeneshi liyito mwanuke wamupe, ghuye kuhafera mashini ghapampepo, mukondashi kupitira mwagho ghukure muliyoghoro, ³ nangeshi mwamakera kughuwa wamuYogholi. ⁴ Yenu kwendi ghuye ndje liwe lyakuparuka olyo vashwena vantu, lyalyondyo ghahororora Karunga lyamulyo kwendi. ⁵ Anwe nka nanwe mwafana yira liwe lyaliparu olyo vatungira pa ndjugho yampepo mukukara ndjugho djambero yakupongoka oyo yatapango ndjambo yapampepo oyoghatambura Karunga kupitira mwaYesusi Kristusi. ⁶ Matjangwa kwakaramo vino: " Kenga, Ame kuna kutura muSiyoni liwe lyalitateko , vatoghorora ntani lyamulyo. Kehe ghuno waku pura mumwendi kapi ngakara nantjoni." ⁷ Mulyo, ntani, kwenu mwapuro. Mara kovovadiro kupura, " Liwe olyo vashwenine vatungi, lyalyo kunakara mutwe wakankotya," ⁸ ntani " liwe lyakupunduka ntani liwe lyakuva renkita vakugande."Vapundukire morwa mukudira kuvhulika kunkango-ovyo mbyo vyavatumbukiro varughane. ⁹ Enengoli anwe kwamutoghorora, mbunga yavadjambi, muhoko wapongoko, vantu vaKarunga vendi, mposhi muyaghure ghuwa wavineghedo kogho ghamuyito mutunde mumundema muyende mughuwa waghukenu. ¹⁰ Pakare anwe kapi mwakalire vantu, ntantani weno muna kara vantu vaKarunga.Kapi mwatambulire ghufenkenda, mara weno munatambura ghufenkenda. ¹¹ Vakuhora, ame kuna kumukorangeda anwe vantundwa virongo mukutunda muvininke vyapanyama, ovyo vyarwanitango monyo denu. ¹² Likukwatakano lyenu mukatji kavanavirongo likare lyalifumano, mposhi nange ghavakughamba ashi ove kurughana vininke vyavidona, mposhi ngavakenge ghuwa warughana nakufumadeka Karunga muliyuvha olyo ngahoroka. ¹³ Kara shirongwa kwakehe kulipangero lyamuntu mukonda yaKarunga. Vulika kwanavandje vaHompa mposhi mbovapangeli ¹⁴ ntani navapitameho, ovo vatuma ashi vapanguli vavininke vyavidona ntani pandurenu vakurughana vyaviwa. ¹⁵ Evino mbyo vyawapero Karunga, mukurughana vyaviwa kumweneka vaghambi valincenuno na vantu vamagova. ¹⁶ Mukukara vantu vakumanguruka, kapishi murughanite limanguruko lyenu mukuhoreka ghudona mara karenu yira vapikwa vaKarunga. ¹⁷ Fumadekenu vantu navantje. Horenu vaghunyenu. Tjirenu Karunga. Fumadekenu vahompa. ¹⁸ Vakareli, karenu virongwa kuvakurona venu nalifumadeko nalintje. Karenu virongwa kapishi kughuwa tupu ndi kulikudidipito kuvakurona, waronka kwavo vakurughana ghumbondo. ¹⁹ Vino mbyoviwa kupandayika ntjeneshi, morwa Karunga muyivi wanavintje, muntu kuvhura ghakare nalididimiko mumaruguvo mpiri ghuye nakuhepa mukaholyaholya. ²⁰ Mposhi vingashi ghuvhura kuwana ntjene ghunadjono ntani ntjeneshi ghudito wamasheteko? mara ntjeneshi ghunarughana ghuwa ntani ghuhepe pakukupa kashitiko, evino viwa nalifumadeko kwaKarunga. ²¹ Shino ntjo shitambo vamu yitira, morwa Kristusi naye kwamuhepera nwe. Kwashuvire shihonena mposhi mukwame mundjira dendi. ²² "Kapi ghatulire ndjo, ndi walye mapuko vawanine mukanwa kendi." ²³ Opo vamutukire , kapi ghavavyutire ghavatuke. Apa ghahepire, kapi ghavatjilitire, mara ghuye ghakutapire kwavo ovo vapangurango mughuhunga. ²⁴ Ghuye mwene kwa shimbire ndjo detu parutu rwendi kushitondo mposhi tufe natwe kundjo nakuparuka mughuhungami. Pavito vyendi mpomwaverukira. ²⁵ Namuvantje kwakalire yira ndjwi dakukombana, mara weno munakavyuka kwamushiti namukurona wakutakamita monyo denu.